കൊച്ചി: ഇന്ത്യൻ എസ്യുവി വിപണിയിൽ പുതിയ തരംഗം സൃഷ്ടിക്കാൻ ഒരുങ്ങുകയാണ് മഹീന്ദ്ര. കഴിഞ്ഞ സ്വാതന്ത്ര്യദിനത്തിൽ അവതരിപ്പിച്ച വിഷൻ X, വിഷൻ S, വിഷൻ T, വിഷൻ SXT എന്നീ നാല് കൺസെപ്റ്റ് വാഹനങ്ങളുടെ പ്രൊഡക്ഷൻ പതിപ്പുകൾ പുറത്തിറക്കാനുള്ള നീക്കങ്ങൾ കമ്പനി വേഗത്തിലാക്കിയിരിക്കുകയാണ്.
പുതിയ സ്റ്റിയറിങ് വീൽ ഡിസൈനുകൾക്ക് മഹീന്ദ്ര സമർപ്പിച്ച പേറ്റന്റ് അപേക്ഷകളാണ് ഈ വാഹനങ്ങൾ വിപണിയിലെത്തുമെന്ന സൂചന ശക്തമാക്കുന്നത്. രണ്ട് വ്യത്യസ്ത സ്റ്റിയറിങ് ഡിസൈനുകളാണ് പുറത്തുവന്നിരിക്കുന്നത്. ഇതിൽ ഒന്ന് വിഷൻ X-നായി ഉപയോഗിക്കുമ്പോൾ മറ്റൊന്ന് വിഷൻ T, വിഷൻ SXT മോഡലുകൾ പങ്കിടുമെന്നാണ് റിപ്പോർട്ടുകൾ.
ഈ നാല് വാഹനങ്ങളും മഹീന്ദ്രയുടെ പുതിയ എൻയു-ഐക്യു (NU-IQ) പ്ലാറ്റ്ഫോമിലാണ് വികസിപ്പിക്കുന്നത്. പെട്രോൾ, ഡീസൽ, ഇലക്ട്രിക് പവർട്രെയിനുകൾ ഉൾപ്പെടെ വിവിധ സാങ്കേതിക സംവിധാനങ്ങൾ ഉൾക്കൊള്ളാൻ കഴിയുന്ന മോഡുലാർ പ്ലാറ്റ്ഫോമാണ് ഇത്.
ഇതിനകം പരീക്ഷണ ഓട്ടം ആരംഭിച്ച വിഷൻ S, നാല് മീറ്ററിനുള്ളിൽ വരുന്ന പുതിയ എസ്യുവിയായിരിക്കുമെന്നാണ് സൂചന. സ്കോർപിയോയുടെ ചെറിയ പതിപ്പായി എത്താൻ സാധ്യതയുള്ള ഈ മോഡലിൽ ഓൾ-ഫോർ ഇൻഡിപെൻഡന്റ് സസ്പെൻഷൻ ഉൾപ്പെടെയുള്ള പ്രീമിയം ഫീച്ചറുകൾ ഉണ്ടായേക്കും.
വിഷൻ X-ന്റെ പ്രധാന ആകർഷണം അതിന്റെ വ്യത്യസ്തമായ സ്റ്റിയറിങ് വീലാണ്. സാധാരണ വൃത്താകൃതിക്ക് പകരം ദീർഘചതുരാകൃതിയിലുള്ള ഫോർ-സ്പോക്ക് സ്റ്റിയറിങ് വീൽ വാഹനത്തിന് ഭാവിയിലെ ഡിസൈൻ ഭാഷ നൽകുന്നു. 12.3 ഇഞ്ച് വലിപ്പമുള്ള ഇരട്ട സ്ക്രീനുകൾ, ഡിജിറ്റൽ കൺട്രോളുകൾ, ഡ്യുവൽ സോൺ ക്ലൈമറ്റ് കൺട്രോൾ തുടങ്ങിയവയും ഇന്റീരിയറിന്റെ പ്രത്യേകതകളായിരിക്കും.
More Read
കരുത്തും ഓഫ്-റോഡ് സ്വഭാവവും മുൻനിർത്തിയാണ് വിഷൻ T രൂപകൽപ്പന ചെയ്തിരിക്കുന്നത്. ഇത് മഹീന്ദ്ര താർ റോക്സിന്റെ ഇലക്ട്രിക് പതിപ്പാകാമെന്നാണ് വാഹനലോകത്തെ വിലയിരുത്തൽ. അഞ്ച് ഡോർ ബോക്സി ഡിസൈനിലാണ് വാഹനം എത്തുക.
അതേസമയം, വിഷൻ SXT ഒരു ലൈഫ്സ്റ്റൈൽ പിക്കപ്പ് ട്രക്ക് മോഡലായിരിക്കും. ചെറിയ ലോഡിങ് ബേയും ശക്തമായ ഡിസൈനുമാണ് ഇതിന്റെ പ്രത്യേകത. മഹീന്ദ്ര ബൊലേറോ ഇൻവേഡറിന്റെ ആധുനിക പതിപ്പിനെ ഓർമ്മിപ്പിക്കുന്ന രൂപത്തിലാണ് ഇത്.
ഇന്ത്യയ്ക്ക് പുറമേ ദക്ഷിണാഫ്രിക്ക, ഓസ്ട്രേലിയ തുടങ്ങിയ രാജ്യാന്തര വിപണികളെയും ലക്ഷ്യമിട്ടാണ് മഹീന്ദ്രയുടെ പുതിയ വാഹന നിര എത്തുന്നത്.
More Read
English Summary:
Mahindra is preparing production versions of its Vision X, Vision S, Vision T, and Vision SXT concept vehicles. New patent filings suggest advanced interiors, futuristic steering designs, EV-ready platforms, and global-market ambitions for the upcoming SUV range.
