തിരുവനന്തപുരം: ഹരിത സാവിത്രിയുടെ ‘സിൻ’ എന്ന നോവലിന്റെ കോപ്പിയാണ് തന്റെ ‘കലാച്ചി’ എന്ന കൃതി എന്ന ആരോപണം തള്ളി എഴുത്തുകാരി കെ.ആർ. മീര രംഗത്തെത്തി. ഫേസ്ബുക്കിൽ പങ്കുവെച്ച ദീർഘ കുറിപ്പിലൂടെയാണ് മീര ആരോപണങ്ങൾക്ക് വിശദമായ മറുപടി നൽകിയത്.
2020 നവംബർ 16 മുതൽ ‘കലാച്ചി’ വെബ് സീരിയൽ രൂപത്തിൽ പ്രസിദ്ധീകരിച്ചിരുന്നുവെന്നും, 2022-ൽ പുറത്തിറങ്ങിയ ഒരു നോവലിന്റെ കോപ്പിയായി അതിനെ എങ്ങനെ വിശേഷിപ്പിക്കാനാകുമെന്നാണ് മീര ചോദിക്കുന്നത്. *‘കലാച്ചി’*യുടെ കഥാബീജം 2013-ൽ തന്നെ മനസ്സിൽ രൂപപ്പെട്ടതാണെന്നും 2019-ലാണ് എഴുത്ത് ആരംഭിച്ചതെന്നും അവർ വ്യക്തമാക്കി.
നോവലിന്റെ പശ്ചാത്തലമായ കസഖ്സ്ഥാനിലെ കലാച്ചി ഗ്രാമത്തെക്കുറിച്ചുള്ള പഠനവും യാത്രകളും നടത്തിയ ശേഷമാണ് കൃതി പൂർത്തിയാക്കിയതെന്നും മീര പറയുന്നു. കസഖ്സ്ഥാനിലേക്കും അസമിലേക്കും നേരിട്ട് യാത്ര ചെയ്താണ് നോവലിന്റെ ഭൂമിശാസ്ത്രവും പശ്ചാത്തലവും ഉറപ്പാക്കിയതെന്നും അവർ വിശദീകരിച്ചു.
ആരോപണം ഉന്നയിച്ച എഴുത്തുകാരി 2026 ജനുവരിയിൽ ‘കലാച്ചി’ വായിച്ച ശേഷം അതിനെ പ്രശംസിക്കുകയും തനിക്കുള്ള ആരാധന പ്രകടിപ്പിക്കുകയും ചെയ്തിരുന്നുവെന്ന് മീര ആരോപിച്ചു. പിന്നീട് സാഹിത്യോത്സവത്തിൽ കണ്ടപ്പോൾ അഭിനന്ദിക്കുകയും ഫോട്ടോകൾ എടുക്കുകയും ചെയ്ത ശേഷം ഇപ്പോൾ കോപ്പിയടി ആരോപണം ഉന്നയിക്കുന്നത് വിചിത്രമാണെന്നും അവർ പറഞ്ഞു.
തന്റെ നോവൽ പുസ്തകരൂപത്തിൽ എത്തുന്നതിന് മുമ്പ് തന്നെ നിരവധി പ്രമുഖ എഴുത്തുകാരും നിരൂപകരും ഡ്രാഫ്റ്റ് വായിച്ചിരുന്നുവെന്നും അവരാരും മറ്റൊരു കൃതിയുമായി സാമ്യം ചൂണ്ടിക്കാണിച്ചിട്ടില്ലെന്നും മീര കുറിപ്പിൽ വ്യക്തമാക്കി.
More Read
സത്യസന്ധതയില്ലാത്ത ആരോപണങ്ങളും ആത്മാർഥതയില്ലാത്ത അഭിനന്ദനങ്ങളും തന്നെ ബാധിക്കാറില്ലെന്നും, മുമ്പ് ‘ആരാച്ചാർ’ പോലുള്ള കൃതികളും സമാന ആരോപണങ്ങൾ നേരിട്ടിരുന്നുവെന്നും മീര കൂട്ടിച്ചേർത്തു.
ഹരിത സാവിത്രിയുടെ വെളിപ്പെടുത്തലിനെ തുടർന്ന് മലയാള സാഹിത്യലോകത്ത് കോപ്പിയടി വിവാദം സജീവ ചർച്ചയായി മാറിയിരിക്കുകയാണ്.
English Summary:
More Read
Writer K.R. Meera has strongly denied allegations that her novel Kalachi copied Haritha Savithri’s Sin. Meera stated that Kalachi had been serialized online since 2020, well before Sin was published in 2022, and described the plagiarism claim as baseless.
