തമിഴ്നാട്ടിലെ തിരുവള്ളൂർ ജില്ലയിൽ മൂന്ന് വയസ്സുകാരി ലൈംഗിക അതിക്രമത്തിന് ഇരയായി കൊല്ലപ്പെട്ട സംഭവം രാജ്യത്തെയാകെ നടുക്കിയിരിക്കുകയാണ്. ഗമ്മിഡിപ്പൂണ്ടി സിപ്കോട്ട് വ്യാവസായിക മേഖലയിലാണ് മനസ്സാക്ഷിയെ മരവിപ്പിക്കുന്ന ഈ പൈശാചിക കൃത്യം അരങ്ങേറിയത്.
സംഭവവുമായി ബന്ധപ്പെട്ട് ബിഹാർ സ്വദേശിയായ യുവാവിനെ പോലീസ് അറസ്റ്റ് ചെയ്തു. കൊല്ലപ്പെട്ട പെൺകുട്ടിയുടെ കുടുംബവും ബിഹാറിൽ നിന്നുള്ളവരാണ്. ഇവർ തൊഴിലിന്റെ ഭാഗമായി കാലങ്ങളായി ഈ പ്രദേശത്താണ് താമസിച്ചുവരുന്നത്.
കഴിഞ്ഞ ദിവസം വീടിന് സമീപം കളിച്ചുകൊണ്ടിരുന്ന കുഞ്ഞിനെ പ്രതി ബിസ്ക്കറ്റ് നൽകി പ്രലോഭിപ്പിച്ച് വശത്താക്കുകയായിരുന്നു. തുടർന്ന് ആരും കാണാതെ സമീപത്തെ വിജനമായ പൊന്തക്കാട്ടിലേക്ക് കൂട്ടിക്കൊണ്ടുപോയി ക്രൂരമായ ലൈംഗിക പീഡനത്തിന് ഇരയാക്കിയെന്നാണ് പോലീസ് നൽകുന്ന പ്രാഥമിക വിവരങ്ങൾ.
ഏറെ നേരം കഴിഞ്ഞിട്ടും കുട്ടിയെ കാണാതായതോടെ വീട്ടുകാരും നാട്ടുകാരും ചേർന്ന് നടത്തിയ തിരച്ചിലിലാണ് ഗുരുതരമായ പരിക്കുകളോടെ ചോരയൊലിപ്പിച്ചു കിടക്കുന്ന നിലയിൽ കുട്ടിയെ കണ്ടെത്തിയത്.
വിജനമായ സ്ഥലത്ത് ഉപേക്ഷിക്കപ്പെട്ട നിലയിൽ കണ്ടെത്തിയ കുട്ടിയെ ഉടൻ തന്നെ വിദഗ്ദ്ധ ചികിത്സയ്ക്കായി ആശുപത്രിയിൽ എത്തിച്ചെങ്കിലും ആന്തരിക അവയവങ്ങൾക്കേറ്റ കടുത്ത പരിക്കുകളെത്തുടർന്ന് ഇന്ന് കുട്ടി മരണത്തിന് കീഴടങ്ങുകയായിരുന്നു. കൃത്യത്തിന് ശേഷം രക്ഷപ്പെടാൻ ശ്രമിച്ച പ്രതിയെ നാട്ടുകാർ സംഘടിതമായി തിരച്ചിൽ നടത്തി പിടികൂടുകയും പോലീസിന് കൈമാറുകയും ചെയ്തു.
More Read
ഈ ക്രൂരതയിൽ കൂടുതൽ പേർക്ക് പങ്കുണ്ടെന്ന സംശയത്തെത്തുടർന്ന് പ്രദേശത്ത് വലിയ സംഘർഷാവസ്ഥ നിലനിൽക്കുന്നുണ്ട്. കുറ്റകൃത്യത്തിൽ പങ്കുണ്ടെന്ന് സംശയിക്കുന്ന ചിലരെ നാട്ടുകാർ കൈകാര്യം ചെയ്തതായും സൂചനയുണ്ട്. എന്നാൽ ഇത് ഒരാൾ മാത്രം ചെയ്ത കുറ്റകൃത്യമാണെന്നാണ് നിലവിൽ പോലീസിന്റെ നിഗമനം.
സംഭവം തമിഴ്നാട്ടിൽ വലിയ രാഷ്ട്രീയ വിവാദങ്ങൾക്കും വഴിവെച്ചിരിക്കുകയാണ്. സ്ത്രീകൾക്കും കുട്ടികൾക്കും എതിരെയുള്ള അതിക്രമങ്ങൾ സംസ്ഥാനത്ത് വർധിച്ചുവരുന്നതിൽ ഭരണ-പ്രതിപക്ഷ കക്ഷികൾ തമ്മിൽ വാക്പോര് കടുക്കുകയാണ്.
പ്രതികൾക്ക് മാതൃകാപരമായ ശിക്ഷ നൽകണമെന്ന് ഡിഎംകെ ആവശ്യപ്പെടുമ്പോൾ, അടുത്തിടെ നടന്ന പല അനിഷ്ട സംഭവങ്ങളിലും ഭരണകക്ഷിയിലെ ചിലർക്ക് പങ്കുണ്ടെന്ന ആരോപണവുമായി പ്രതിപക്ഷവും രംഗത്തെത്തി.
More Read
ക്രമസമാധാന നില തകർന്നു എന്ന ആരോപണങ്ങൾക്കിടെ സർക്കാർ ഈ വിഷയത്തിൽ കർശന നടപടി സ്വീകരിക്കുമെന്ന ഉറപ്പിലാണ് പോലീസ് അന്വേഷണം മുന്നോട്ട് കൊണ്ടുപോകുന്നത്.
English Summary
A three-year-old girl was sexually assaulted and murdered in Thiruvallur, Tamil Nadu. A Bihar native was arrested for the crime after luring the child with biscuits. The victim succumbed to severe injuries in the hospital. The incident has sparked massive public outrage and political debates over women’s safety.
