തന്റെ പുതുക്കിയെടുത്ത പാസ്പോർട്ടിന്റെ മുൻകവറിലെ ഒരു ചെറിയ മാറ്റം കണ്ട് കൗതുകം തോന്നിയ പൂജ എന്ന എക്സ് (ട്വിറ്റർ) ഉപയോക്താവിന്റെ പോസ്റ്റാണ് ഇപ്പോൾ സോഷ്യൽ മീഡിയയിൽ വലിയ രീതിയിലുള്ള ചർച്ചകൾക്ക് വഴിവെച്ചിരിക്കുന്നത്. മുൻപ് കയ്യിലുണ്ടായിരുന്ന പാസ്പോർട്ടിൽ ഇല്ലാതിരുന്ന, തിളങ്ങുന്ന ഒരു ചെറിയ സ്വർണ്ണ ചതുര ചിഹ്നമാണ് യുവതിയെ അദ്ഭുതപ്പെടുത്തിയത്. എന്താണ് ഈ ചിഹ്നത്തിന്റെ അർത്ഥമെന്ന് മനസ്സിലാകാതെ അവർ സോഷ്യൽ മീഡിയയിൽ പങ്കുവെച്ച സംശയം പെട്ടെന്ന് തന്നെ ജനശ്രദ്ധ ആകർഷിക്കുകയായിരുന്നു.
ഈ ചെറിയ ചിഹ്നം പാസ്പോർട്ടിന്റെ സുരക്ഷ വർദ്ധിപ്പിക്കാൻ പുതുതായി ചേർത്തതാണോ, അതോ യാത്രക്കാരെ നിരീക്ഷിക്കാനുള്ള വല്ല രഹസ്യ ട്രാക്കിംഗ് ഉപകരണമാണോ എന്നൊക്കെയായിരുന്നു പൂജയുടെ പ്രധാന സംശയങ്ങൾ. വിമാനത്താവളങ്ങളിലും അതിർത്തികളിലും പരിശോധന കർശനമാക്കുന്നതിന്റെ ഭാഗമായി കൊണ്ടുവന്ന മാറ്റമാണോ ഇതെന്നും അവർ ചോദിച്ചിരുന്നു. വൈകാതെ തന്നെ പരിചയസമ്പന്നരായ അന്താരാഷ്ട്ര യാത്രക്കാരും സാങ്കേതിക വിദഗ്ദ്ധരും ഈ ചോദ്യത്തിന് മറുപടിയുമായി രംഗത്തെത്തുകയും വിഷയത്തിന്റെ ചുരുളഴിക്കുകയും ചെയ്തു.
കമന്റുകളിലൂടെ പലരും വ്യക്തമാക്കിയതുപോലെ, ഈ സ്വർണ്ണ ചതുര ചിഹ്നം അന്താരാഷ്ട്ര തലത്തിൽ ഔദ്യോഗികമായി അംഗീകരിക്കപ്പെട്ട ഒരു ബയോമെട്രിക് സൂചകമാണ്. ഈ ചിഹ്നം പതിപ്പിച്ചിട്ടുള്ള പാസ്പോർട്ടുകൾക്ക് ഉള്ളിൽ ഒരു ഇലക്ട്രോണിക് മൈക്രോചിപ്പ് അടങ്ങിയിരിക്കുന്നു എന്നാണ് ഇതിനർത്ഥം. മുൻപുണ്ടായിരുന്ന പാസ്പോർട്ടുകൾ പരമ്പരാഗതമായ നോൺ-ഇലക്ട്രോണിക് പതിപ്പുകൾ ആയിരുന്നതിനാലാണ് പഴയ രേഖകളിൽ ഈ പ്രത്യേക ചിഹ്നം കാണാതിരുന്നതെന്ന് യാത്രക്കാർ യുവതിക്ക് വിശദീകരിച്ചു നൽകി.
വിമാനത്താവളങ്ങളിലെയും അതിർത്തി നിയന്ത്രണ കേന്ദ്രങ്ങളിലെയും പരിശോധനകൾ കൂടുതൽ സുരക്ഷിതവും സുഗമവുമാക്കാൻ ഈ ചിപ്പ് സഹായിക്കും. യാത്രക്കാരുടെ വ്യക്തിഗത വിവരങ്ങളും ചിത്രങ്ങളും ഡിജിറ്റലായി കൈമാറുന്നതിനും അവയുടെ ആധികാരികത ഉറപ്പുവരുത്തുന്നതിനുമായി ഇതിൽ എൻ.എഫ്.സി. (NFC) അല്ലെങ്കിൽ ആർ.എഫ്.ഐ.ഡി. (RFID) സാങ്കേതികവിദ്യയാണ് ഉപയോഗിക്കുന്നത്. രേഖകളിലെ കൃത്രിമത്വവും വ്യാജന നിർമ്മാണവും തടയാൻ ഈ ചിപ്പുകൾക്ക് സാധിക്കും.
യാത്രാ രേഖകൾ ആധുനികവൽക്കരിക്കുന്നതിന്റെയും ഡിജിറ്റലൈസ് ചെയ്യുന്നതിന്റെയും ഭാഗമായാണ് ഇന്ത്യ ഉൾപ്പെടെയുള്ള രാജ്യങ്ങൾ ഈ മാറ്റം നടപ്പിലാക്കിയിട്ടുള്ളത്. ഇത്തരം ഡിജിറ്റൽ സൗകര്യങ്ങളുള്ളതും മെഷീനുകൾക്ക് പെട്ടെന്ന് വായിച്ചെടുക്കാൻ സാധിക്കുന്നതുമായ ഇ-പാസ്പോർട്ടുകൾ ഇപ്പോൾ ആഗോളതലത്തിൽ തന്നെ പ്രധാന മാനദണ്ഡമായി മാറിയിരിക്കുകയാണെന്നും സോഷ്യൽ മീഡിയയിലെ പ്രതികരണങ്ങളിലൂടെ പൊതുജനങ്ങൾ കൂട്ടിച്ചേർത്തു.
More Read
English Summary
An X user’s post went viral after she questioned a small gold square symbol on her renewed passport. Experienced travelers clarified that it is the international biometric symbol indicating an embedded microchip. This e-passport feature utilizes RFID/NFC technology for secure, digital border-control verification.
