തിരുവനന്തപുരം: സ്ത്രീകൾക്കും ട്രാൻസ്ജെൻഡർ വ്യക്തികൾക്കും കെ.എസ്.ആർ.ടി.സി.യുടെ ഓർഡിനറി ബസുകളിൽ സൗജന്യയാത്ര അനുവദിക്കുന്ന ‘പ്രിയദർശിനി’ പദ്ധതിക്ക് തിങ്കളാഴ്ച തുടക്കമാവുകയാണ്.
രാവിലെ 8.30-ന് തമ്പാനൂർ ബസ് ടെർമിനലിൽ വെച്ച് മുഖ്യമന്ത്രി വി.ഡി. സതീശൻ പദ്ധതിയുടെ ഔദ്യോഗിക ഉദ്ഘാടനം നിർവഹിക്കും. ഇതിന് പുറമെ, സംസ്ഥാനത്തെ ഓരോ ഡിപ്പോകളിലും ജനപ്രതിനിധികളുടെ നേതൃത്വത്തിൽ പ്രാദേശികതല ഉദ്ഘാടനങ്ങളും സംഘടിപ്പിക്കുന്നുണ്ട്.
ഉദ്ഘാടനത്തിന് മുൻപുള്ള യാത്രകളിൽ ഈ സൗജന്യം ബാധകമായിരിക്കില്ലെന്ന് അധികൃതർ അറിയിച്ചു.
സംസ്ഥാനത്തുടനീളമുള്ള 3125 ഓർഡിനറി ബസുകളിലാണ് ഈ സേവനം ലഭ്യമാകുക. ഈ ബസുകൾ എളുപ്പത്തിൽ തിരിച്ചറിയാനായി ‘പ്രിയദർശിനി’ എന്ന് രേഖപ്പെടുത്തിയ സ്റ്റിക്കറുകൾ പതിച്ചിട്ടുണ്ടാകും.
യാത്രക്കാർ പ്രത്യേക തിരിച്ചറിയൽ കാർഡുകൾ കൈവശം വെക്കേണ്ടതില്ല. പകരം, ബസിൽ കയറുമ്പോൾ കണ്ടക്ടറിൽ നിന്ന് ‘പ്രിയദർശിനി’ ടിക്കറ്റ് വാങ്ങേണ്ടതാണ്.
More Read
ഓർഡിനറി, സിറ്റി ഓർഡിനറി, ലിമിറ്റഡ് സ്റ്റോപ്പ് ഓർഡിനറി, ടൗൺ ടു ടൗൺ, ഫെയർസ്റ്റേജ് ലിമിറ്റഡ് സ്റ്റോപ്പ്, പോയിന്റ് ടു പോയിന്റ് ഓർഡിനറി, ഗ്രാമവണ്ടി എന്നീ വിഭാഗം ബസുകളിലെല്ലാം ഈ സൗജന്യം ലഭ്യമാകും.
യാത്രക്കാർക്ക് 15 കിലോഗ്രാം വരെയുള്ള ലഗേജ് സൗജന്യമായി കൊണ്ടുപോകാനുള്ള അനുവാദമുണ്ട്. അതേസമയം, സ്ത്രീകൾക്കൊപ്പം നാലു മുതൽ 11 വയസ്സുവരെയുള്ള ആൺകുട്ടികളുണ്ടെങ്കിൽ അവർക്ക് ഹാഫ് ടിക്കറ്റ് എടുക്കേണ്ടതാണെന്നും നിർദ്ദേശമുണ്ട്.
സംസ്ഥാനത്തെ ഗതാഗത സൗകര്യങ്ങൾ സ്ത്രീകൾക്കും ട്രാൻസ്ജെൻഡർ വ്യക്തികൾക്കും കൂടുതൽ പ്രാപ്യമാക്കുന്നതിനും സുരക്ഷിതമാക്കുന്നതിനുമുള്ള വലിയൊരു ചുവടുവെപ്പാണ് ഈ പദ്ധതിയെന്ന് കരുതപ്പെടുന്നു.
More Read
English Summary
The ‘Priyadarshini’ scheme, offering free travel for women and transgender individuals on KSRTC ordinary buses, launches this Monday, covering 3,125 buses across Kerala without requiring any ID cards.
