മലയാള സിനിമാ ചരിത്രത്തിലെ എക്കാലത്തെയും വലിയ സൂപ്പർ ഹിറ്റുകളിൽ ഒന്നായ ‘യോദ്ധ’ എന്ന ചിത്രത്തിന്റെ ഷൂട്ടിങ്ങിനിടയിൽ തനിക്കുണ്ടായ ഭീതിപ്പെടുത്തുന്നൊരു അനുഭവം തുറന്നുപറഞ്ഞിരിക്കുകയാണ് നടി മധുബാല.
മോഹൻലാൽ നായകനായി തിളങ്ങിയ ഈ ചിത്രത്തിലെ ഏറ്റവും ജനപ്രിയമായ ‘കുനു കുനെ ചെറു കുറുനിരകൾ…’ എന്ന ഗാനത്തിന്റെ ചിത്രീകരണത്തിനിടയിലാണ് സംഭവം നടക്കുന്നത്. തന്റെ ഏറ്റവും പുതിയ ചിത്രമായ ‘ചിന്ന ചിന്ന ആശൈ’ എന്ന സിനിമയുടെ പ്രൊമോഷന്റെ ഭാഗമായി ജനപ്രിയ അവതാരക പേർളി മാണിയുടെ യൂട്യൂബ് ചാനലിന് നൽകിയ പ്രത്യേക അഭിമുഖത്തിലാണ് നടി അന്നത്തെ ആ നടുക്കുന്ന ഓർമ്മകൾ പങ്കുവെച്ചത്.
ചിത്രത്തിന്റെ പ്രധാന ഭാഗങ്ങളെല്ലാം നേപ്പാളിൽ വെച്ചായിരുന്നു ഷൂട്ട് ചെയ്തിരുന്നത്. ചിത്രീകരണത്തിന്റെ ആദ്യത്തെ ഒരു മാസം തന്റെ അച്ഛൻ ഒപ്പമില്ലാതിരുന്നതിനാൽ എങ്ങനെയെങ്കിലും ഷൂട്ടിങ് പൂർത്തിയാക്കി വീട്ടിൽ തിരിച്ചെത്തിയാൽ മതി എന്ന ചിന്തയിലായിരുന്നു താനെന്ന് മധുബാല ഓർക്കുന്നു.
എന്നാൽ അന്യദേശത്തെ ആ ഷൂട്ടിങ് ദിനങ്ങളിൽ തന്നെ ഏറ്റവും കൂടുതൽ കംഫർട്ടബിൾ ആക്കിയത് സംവിധായകൻ സംഗീത് ശിവനും ക്യാമറാമാൻ സന്തോഷ് ശിവനും നായകൻ മോഹൻലാലുമായിരുന്നു എന്ന് താരം നന്ദിയോടെ സ്മരിക്കുന്നു.
നേപ്പാളിലെ ഒരു പ്രാദേശിക മാർക്കറ്റ് പരിസരത്തുവെച്ചായിരുന്നു ‘കുനു കുനെ’ എന്ന ഗാനത്തിന്റെ ചിത്രീകരണം നടന്നിരുന്നത്. അവിടുത്തെ നാട്ടുകാരിൽ ഭൂരിഭാഗവും വൈകുന്നേരം ആറ് മണിയാകുന്നതോടെ കള്ളുകുടിക്കുന്ന ശീലമുള്ളവരായിരുന്നു.
More Read
അത്തരമൊരു സമയത്താണ് അവിടുത്തെ ഒരു പ്രശസ്തമായ പഗോഡയുടെ മുകളിൽ വെച്ച് നൃത്തരംഗങ്ങൾ ക്യാമറയിൽ പകർത്തിയിരുന്നത്. ഷൂട്ടിങ്ങിനിടയിൽ താഴെ നിന്നിരുന്ന ജനക്കൂട്ടം പഗോഡയുടെ മുകളിലേക്ക് കയറിവരുന്നതായി മധുബാലയ്ക്ക് തോന്നി. താരം തന്റെ അസിസ്റ്റന്റുമാരോട് ഇത് സംബന്ധിച്ച് ചോദിച്ചെങ്കിലും അവർ അത് കാര്യമാക്കിയില്ല.
എന്നാൽ പെട്ടെന്നാണ് ഒപ്പമുണ്ടായിരുന്നവർക്ക് അപകടം മനസ്സിലായത്. പൂർണ്ണമായും മദ്യപിച്ച അവസ്ഥയിലായിരുന്ന വലിയൊരു ആൾക്കൂട്ടം തങ്ങളിൽ നിന്നും വെറും മൂന്നടി മാത്രം അകലത്തിൽ എത്തിക്കഴിഞ്ഞിരുന്നു.
ഈ സമയം അപകടം മണത്ത മോഹൻലാൽ ഒട്ടും സമയം കളയാതെ രംഗത്തിറങ്ങി. മധുബാലയുടെ ഒരു കൈയിൽ മോഹൻലാലും മറു കൈയിൽ സന്തോഷ് ശിവന്റെ അസിസ്റ്റന്റായ ബിജോയ്യും ചേർന്നുപിടിച്ച് പഗോഡയുടെ പടവുകളിൽ നിന്നും താഴേക്ക് ചാടുകയായിരുന്നു.
More Read
യാതൊരു വിധത്തിലും നിയന്ത്രിക്കാൻ കഴിയാത്തത്ര വലിയ ജനത്തിരക്കായിരുന്നു ആ സമയത്ത് അവിടെ ഉണ്ടായിരുന്നത്. പഗോഡയ്ക്ക് താഴെ കാത്തു കിടന്നിരുന്ന കാറിലേക്ക് മധുബാലയെയും ഒപ്പമുണ്ടായിരുന്ന മറ്റ് എട്ട് വനിതാ ഡാൻസർമാരെയും സുരക്ഷിതമായി കയറ്റി അവർ നേരെ അടുത്തുള്ള പോലീസ് സ്റ്റേഷനിലേക്കാണ് പോയത്.
ജനക്കൂട്ടത്തിൽ നിന്നും രക്ഷപ്പെടാൻ പോലീസ് സ്റ്റേഷനിൽ അഭയം തേടേണ്ടി വന്ന ആ അനുഭവം യോദ്ധയുടെ ലൊക്കേഷനിൽ തനിക്ക് ഒരിക്കലും മറക്കാൻ സാധിക്കാത്ത ഒന്നാണെന്ന് മധുബാല അഭിമുഖത്തിൽ കൂട്ടിച്ചേർത്തു.
English Summary
Actress Madhoo shared a scary memory from the shooting of the iconic movie ‘Yoddha’ in Nepal. During the song ‘Kunu Kune’, a drunk crowd surrounded them on a pagoda. Mohanlal and cinematographer Santhosh Sivan’s assistant rescued her by jumping down and taking her to a police station.
