തൃശൂർ: കെഎസ്ആർടിസിയുടെ സ്ത്രീകൾക്കുള്ള സൗജന്യ യാത്രാ പദ്ധതിയുടെ ഉദ്ഘാടന ദിനത്തിൽ തന്നെ യാത്രാ നിരക്ക് ഈടാക്കിയതായി പരാതി. തൃശൂരിൽ നിന്ന് ചാലക്കുടിയിലേക്ക് സർവീസ് നടത്തിയ ഓർഡിനറി ബസിലാണ് പദ്ധതി പ്രകാരമുള്ള സൗജന്യ യാത്ര നിഷേധിക്കപ്പെട്ടതെന്ന് യാത്രക്കാർ ആരോപിച്ചു.
സൗജന്യ യാത്ര ലഭിക്കുമെന്ന പ്രതീക്ഷയിൽ ബസിൽ കയറിയ സ്ത്രീകൾക്ക് ടിക്കറ്റ് എടുത്ത് യാത്ര ചെയ്യേണ്ടിവന്നതായാണ് പരാതി. പദ്ധതി പ്രാബല്യത്തിൽ വന്ന ആദ്യ ദിനത്തിലാണ് സംഭവം നടന്നത്.
സിസ്റ്റം അപ്ഡേറ്റ് പൂർത്തിയായിട്ടില്ലാത്തതിനാലാണ് ടിക്കറ്റ് നൽകേണ്ടിവന്നതെന്നാണ് കണ്ടക്ടർ യാത്രക്കാർക്ക് വിശദീകരണം നൽകിയതെന്ന് യാത്രക്കാർ പറഞ്ഞു. എന്നാൽ പദ്ധതിയുടെ ഉദ്ഘാടന ദിവസം തന്നെ ആവശ്യമായ സാങ്കേതിക ക്രമീകരണങ്ങൾ പൂർത്തിയാക്കാതിരുന്നതിൽ യാത്രക്കാർ അതൃപ്തി പ്രകടിപ്പിച്ചു.
പുതുക്കാട് ഭാഗത്ത് ബസിന് സ്വീകരണം നൽകിയ ശേഷമാണ് യാത്ര ആരംഭിച്ചതെന്നും രാവിലെ 9.34നാണ് ടിക്കറ്റ് എടുത്തതെന്നും ചില യുവതികൾ പറഞ്ഞു.
ഇന്ന് രാവിലെ തിരുവനന്തപുരം തമ്പാനൂർ ഡിപ്പോയിൽ നടന്ന ചടങ്ങിൽ മുഖ്യമന്ത്രി വി.ഡി. സതീശൻ പ്രിയദർശിനി പദ്ധതിയുടെ ആദ്യഘട്ടം ഉദ്ഘാടനം ചെയ്തു. ഗതാഗത മന്ത്രിക്കൊപ്പം മുഖ്യമന്ത്രിയും വനിതാ യാത്രക്കാർക്കൊപ്പം കെഎസ്ആർടിസി ബസിൽ യാത്ര ചെയ്തിരുന്നു. ഉദ്ഘാടന ചടങ്ങ് എൽഡിഎഫ് ബഹിഷ്കരിക്കുകയും ചെയ്തു.
More Read
സർക്കാർ അധികാരത്തിലെത്തി ഒരു മാസം പൂർത്തിയാകുന്നതിന് മുമ്പ് തെരഞ്ഞെടുപ്പ് വാഗ്ദാനം നടപ്പാക്കാൻ കഴിഞ്ഞത് അഭിമാനകരമാണെന്ന് മുഖ്യമന്ത്രി ഉദ്ഘാടന പ്രസംഗത്തിൽ പറഞ്ഞു.
പദ്ധതിയുടെ ഭാഗമായി സംസ്ഥാനത്തെ 3,125 ഓർഡിനറി ബസുകളിൽ പ്രായഭേദമന്യേ സ്ത്രീകൾക്കും ട്രാൻസ്ജെൻഡർ വിഭാഗത്തിനും സൗജന്യ യാത്ര അനുവദിച്ചിട്ടുണ്ട്. ഇതിനായി ബസുകളിൽ പ്രത്യേക ‘പ്രിയദർശിനി’ സ്റ്റിക്കറുകൾ പതിപ്പിച്ചിട്ടുണ്ട്. സൗജന്യ യാത്രയായാലും സീറോ ടിക്കറ്റ് നിർബന്ധമാണ്.
അതേസമയം, ഉദ്ഘാടന ദിനത്തിൽ തന്നെ ഉണ്ടായ സംഭവത്തെ തുടർന്ന് സാമൂഹിക മാധ്യമങ്ങളിലും വിമർശനം ഉയർന്നിട്ടുണ്ട്. വിഷയത്തിൽ കെഎസ്ആർടിസി അധികൃതർ വിശദീകരണം നൽകണമെന്ന ആവശ്യവും ശക്തമാകുകയാണ്.
More Read
English Summary
A complaint has emerged from Thrissur on the very first day of Kerala’s free travel scheme for women in KSRTC ordinary buses. Passengers alleged that fare was collected from women travelling from Thrissur to Chalakudy due to incomplete system updates. The incident has sparked criticism over the preparedness of the scheme’s implementation.
