മധ്യപ്രദേശിലെ മൊറേന ജില്ലയിൽ വ്യാജവാർത്ത പരത്തിയ പരിഭ്രാന്തിയെ തുടർന്ന് ഒട്ടേറെ യാത്രക്കാർ ട്രെയിൻ തട്ടി ദാരുണമായി മരണപ്പെട്ട വാർത്തയാണ് ഇപ്പോൾ പുറത്തുവരുന്നത്. മൊറേനയിലെ ഹേതാംപുർ റെയിൽവേ സ്റ്റേഷന് സമീപം വൈകുന്നേരത്തോടെയാണ് നാടിനെ നടുക്കിയ ഈ വലിയ ദുരന്തം സംഭവിച്ചത്. ട്രെയിനിന് തീപിടിച്ചെന്ന തെറ്റായ വിവരത്തെ തുടർന്ന് പ്രാണരക്ഷാർത്ഥം ട്രാക്കിലേക്ക് ചാടിയിറങ്ങിയ യാത്രക്കാരുടെ മേൽ മറ്റൊരു ട്രെയിൻ പാഞ്ഞുകയറുകയായിരുന്നു.
ഖജുരാഹോയിൽ നിന്നും ഉദയ്പുരിലേക്ക് സർവീസ് നടത്തിയിരുന്ന ഇന്റർസിറ്റി എക്സ്പ്രസ് ട്രെയിനിലാണ് ദുരന്തത്തിന് ആസ്പദമായ സംഭവങ്ങളുടെ തുടക്കം. ട്രെയിനിന്റെ ജനറൽ കോച്ചിൽ യാത്ര ചെയ്തിരുന്ന ഒരാൾ പെട്ടെന്ന് അലാറം ചെയിൻ വലിച്ചതിനെ തുടർന്ന് വണ്ടി പെട്ടെന്ന് നിന്നു.
എന്നാൽ ഈ സമയത്ത് ട്രെയിനിനുള്ളിൽ വൻ തീപിടുത്തം ഉണ്ടായി എന്ന തരത്തിലുള്ള വ്യാജമായ വാർത്ത യാത്രക്കാർക്കിടയിൽ നിമിഷനേരം കൊണ്ട് പടരുകയായിരുന്നു. ഇതോടെ പരിഭ്രാന്തരായ ആളുകൾ ജീവൻ നിലനിർത്താനായി കൂട്ടത്തോടെ ട്രെയിനിന് പുറത്തേക്ക് ചാടിയിറങ്ങി.
ഇങ്ങനെ പുറത്തിറങ്ങിയ യാത്രക്കാർ തൊട്ടടുത്ത ട്രാക്കിലേക്ക് മാറി നിൽക്കുന്ന സമയത്താണ് എതിർദിശയിൽ നിന്നും ഫിറോസ്പുർ-സിയോണി പാതാൾകോട്ട് എക്സ്പ്രസ് അതിവേഗത്തിൽ ട്രാക്കിലൂടെ പാഞ്ഞു വന്നത്.
ട്രാക്കിൽ ആളുകൾ നിൽക്കുന്നത് കണ്ട് പെട്ടെന്ന് ബ്രേക്ക് ചെയ്യാൻ സാധിക്കാതിരുന്ന ട്രെയിൻ യാത്രക്കാർക്കിടയിലേക്ക് പാഞ്ഞുകയറുകയായിരുന്നു. അപകടത്തിൽ ഒട്ടേറെ പേർ സംഭവസ്ഥലത്തു തന്നെ മരണപ്പെടുകയും നിരവധി പേർക്ക് കഠിനമായ പരിക്കേൽക്കുകയും ചെയ്തു.
More Read
സംഭവം നടന്ന ഉടൻ തന്നെ റെയിൽവേ അധികൃതരും പോലീസും ജില്ലാ ഭരണകൂടവും ഉദ്യോഗസ്ഥരും സ്ഥലത്തേക്ക് കുതിച്ചെത്തി അതീവ ഗുരുതരമായ സാഹചര്യത്തിൽ രക്ഷാപ്രവർത്തനങ്ങൾ ഏകോപിപ്പിച്ചു വരികയാണ്. പരിക്കേറ്റവരെ സമീപത്തെ ആശുപത്രികളിലേക്ക് മാറ്റിയിട്ടുണ്ട്.
അപകടത്തിൽ മരണപ്പെട്ടവരുടെ കൃത്യമായ കണക്കുകൾ റെയിൽവേ ഇതുവരെ ഔദ്യോഗികമായി പുറത്തുവിട്ടിട്ടില്ലെങ്കിലും മരണസംഖ്യ ഇനിയും ഉയരാൻ സാധ്യതയുണ്ടെന്നാണ് പ്രാഥമിക വിവരങ്ങൾ സൂചിപ്പിക്കുന്നത്.
English Summary
More Read
A tragic train accident occurred in Madhya Pradesh’s Morena district when passengers, panicked by a false fire rumor, jumped off the Khajuraho-Udaipur Intercity Express. While standing on the adjacent track, they were struck by the fast-moving Patalakot Express. Numerous passengers died, and several others were injured.
