കുട്ടികൾക്ക് ജലദോഷ മരുന്ന്: കേന്ദ്രത്തിന്റെ നിർണായക വിലക്ക്

ന്യൂഡൽഹി: നാല് വയസിൽ താഴെയുള്ള കുട്ടികൾക്ക് ചില ജലദോഷ മരുന്നുകൾ നൽകുന്നതിന് കേന്ദ്ര സർക്കാർ നിയന്ത്രണം ഏർപ്പെടുത്തി. ക്ലോർഫെനിറാമിൻ മാലിയേറ്റ്, ഫെനൈൽഫ്രൈൻ ഹൈഡ്രോക്ലോറൈഡ് എന്നിവ അടങ്ങിയ എല്ലാ ഫിക്സഡ് ഡോസ് കോമ്പിനേഷൻ (FDC) മരുന്നുകളുടെ നിർമ്മാണം, വിൽപ്പന, വിതരണം എന്നിവയ്ക്കാണ് വിലക്ക്.

ജലദോഷ മരുന്നിന് കേന്ദ്രത്തിന്റെ നിയന്ത്രണം

ക്ലോർഫെനിറാമിൻ മാലിയേറ്റ്, ഫെനൈൽഫ്രൈൻ ഹൈഡ്രോക്ലോറൈഡ് എന്നിവ അടങ്ങിയ എഫ്.ഡി.സി മരുന്നുകൾ നാല് വയസിൽ താഴെയുള്ള കുട്ടികളിൽ ആരോഗ്യപ്രശ്നങ്ങൾക്ക് കാരണമാകാൻ സാധ്യതയുണ്ടെന്ന വിദഗ്ധ സമിതിയുടെ വിലയിരുത്തലിനെ തുടർന്നാണ് നടപടി.

ഡ്രഗ്സ് ടെക്നിക്കൽ അഡ്വൈസറി ബോർഡും (DTAB) നിയന്ത്രണം ശുപാർശ ചെയ്തിരുന്നു. കൂടുതൽ സുരക്ഷിതമായ ബദൽ മരുന്നുകൾ ലഭ്യമാണെന്നും കേന്ദ്ര ആരോഗ്യമന്ത്രാലയം വ്യക്തമാക്കി.

പാക്കറ്റിൽ മുന്നറിയിപ്പ് നിർബന്ധം

നാല് വയസിൽ താഴെയുള്ള കുട്ടികൾക്കുള്ള ജലദോഷ മരുന്ന് ഉപയോഗവുമായി ബന്ധപ്പെട്ട മുന്നറിയിപ്പ് മരുന്നിന്റെ ലേബലിലും പാക്കേജ് ഇൻസർട്ടിലും വ്യക്തമായി രേഖപ്പെടുത്തണം.

പരസ്യപ്രചാരണ സാമഗ്രികളിലും ‘നാല് വയസിൽ താഴെയുള്ള കുട്ടികളിൽ ഉപയോഗിക്കരുത്’ എന്ന മുന്നറിയിപ്പ് ഉൾപ്പെടുത്തണമെന്നും നിർദേശിച്ചിട്ടുണ്ട്.

എല്ലാ എഫ്.ഡി.സി മരുന്നുകൾക്കും നിയന്ത്രണം

നേരത്തെ ക്ലോർഫെനിറാമിൻ മാലിയേറ്റ്-ഫെനൈൽഫ്രൈൻ ഹൈഡ്രോക്ലോറൈഡ് അടങ്ങിയ ചില മരുന്നുകൾക്ക് മാത്രമായിരുന്നു നിയന്ത്രണം.

എന്നാൽ പുതിയ തീരുമാനത്തോടെ ഈ രണ്ട് ഘടകങ്ങളും അടങ്ങിയ എല്ലാ എഫ്.ഡി.സി മരുന്നുകൾക്കും നിയന്ത്രണം ബാധകമായി. ഇതോടെ ഇത്തരം മരുന്നുകളുടെ നിർമ്മാണം, വിൽപ്പന, വിതരണം എന്നിവയ്ക്ക് കൂടുതൽ കർശനമായ നിയന്ത്രണമുണ്ടാകും.

എന്താണ് ഈ മരുന്നുകളിലെ ഘടകങ്ങൾ?

ക്ലോർഫെനിറാമിൻ മാലിയേറ്റ് അലർജി ലക്ഷണങ്ങൾ കുറയ്ക്കാൻ ഉപയോഗിക്കുന്ന ആന്റിഹിസ്റ്റാമിനാണ്. അതേസമയം, ഫെനൈൽഫ്രൈൻ ഹൈഡ്രോക്ലോറൈഡ് മൂക്കടപ്പ് കുറയ്ക്കാൻ ഉപയോഗിക്കുന്ന ഡീകോൺജസ്റ്റന്റാണ്.

ഇരുഘടകങ്ങളും ചേർന്ന എഫ്.ഡി.സി മരുന്നുകളാണ് പുതിയ നിയന്ത്രണത്തിന്റെ പരിധിയിൽ വരുന്നത്. കുട്ടികളുടെ സുരക്ഷ കണക്കിലെടുത്താണ് നടപടി.

എഫ്.ഡി.സി മരുന്നുകൾക്കെതിരെ തുടർച്ചയായ നടപടി

എഫ്.ഡി.സി മരുന്നുകളുടെ സുരക്ഷ സംബന്ധിച്ച് കേന്ദ്ര സർക്കാർ സ്വീകരിച്ചുവരുന്ന നിയന്ത്രണ നടപടികളുടെ തുടർച്ചയാണ് പുതിയ തീരുമാനം.

ഇക്കൊല്ലം ജൂണിലും 16 എഫ്.ഡി.സി മരുന്നുകൾക്ക് കേന്ദ്ര സർക്കാർ വിലക്ക് ഏർപ്പെടുത്തിയിരുന്നു. കൂടുതൽ സുരക്ഷിതമായ ചികിത്സാ മാർഗങ്ങൾ ലഭ്യമാണെന്ന വിലയിരുത്തലും ഇത്തരം നിയന്ത്രണങ്ങൾക്ക് പിന്നിലുണ്ട്.