ദോഹ: ഫുട്ബാൾ ലോകകപ്പ് ചരിത്രത്തിൽ ആദ്യമായി മലയാളി സാന്നിധ്യം രേഖപ്പെടുത്താനൊരുങ്ങുന്നു. ഖത്തറിന്റെ 26 അംഗ ലോകകപ്പ് ടീമിൽ കണ്ണൂർ സ്വദേശിയായ 19-കാരൻ തഹ്സിൻ മുഹമ്മദ് ജംഷീദിന് ഇടം ലഭിച്ചു.
കാലിക്കറ്റ് സർവകലാശാലയുടെ മുൻ ഫുട്ബാൾ താരമായിരുന്ന ജംഷീദിന്റെയും വളപട്ടണം സ്വദേശിനി ഷൈമയുടെയും മകനാണ് തഹ്സിൻ. 1996-ൽ ഖത്തറിലേക്ക് കുടിയേറിയ ജംഷീദ് നിലവിൽ അവിടെ ചീഫ് അക്കൗണ്ടന്റായി ജോലി ചെയ്യുകയാണ്. ഖത്തറിൽ ജനിച്ചു വളർന്ന തഹ്സിൻ ചെറുപ്പം മുതൽ പിതാവിനൊപ്പം ഫുട്ബാളിൽ പരിശീലനം ആരംഭിച്ചു.
ഖത്തറിലെ പ്രശസ്തമായ ആസ്പെയർ അക്കാദമിയിലൂടെയാണ് തഹ്സിൻ തന്റെ കഴിവ് തെളിയിച്ചത്. പിന്നീട് ഖത്തറിന്റെ വിവിധ ജൂനിയർ ടീമുകളിലൂടെ വളർന്ന് 17-ാം വയസിൽ അൽ ദുഹൈൽ ക്ലബിൽ ചേർന്നു. ഖത്തർ സ്റ്റാർസ് ലീഗിൽ കളിച്ച ആദ്യ ഇന്ത്യൻ വംശജനെന്ന നേട്ടവും അദ്ദേഹം സ്വന്തമാക്കി.
ഖത്തർ ദേശീയ ടീമിന്റെ അണ്ടർ-16, അണ്ടർ-17, അണ്ടർ-19 ടീമുകളിലും തഹ്സിൻ കളിച്ചിട്ടുണ്ട്. 2024 ജൂണിൽ അഫ്ഗാനിസ്ഥാനെതിരായ ലോകകപ്പ് യോഗ്യതാ മത്സരത്തിലൂടെയാണ് ഖത്തറിന്റെ സീനിയർ ടീമിൽ അരങ്ങേറ്റം കുറിച്ചത്.
തഹ്സിന്റെ ലോകകപ്പ് പ്രവേശന വാർത്ത കണ്ണൂരിലും വളപട്ടണത്തും വലിയ ആവേശമാണ് സൃഷ്ടിച്ചിരിക്കുന്നത്. നാട്ടിലെത്തുമ്പോൾ സുഹൃത്തുക്കൾക്കൊപ്പം പയ്യാമ്പലത്തെ മണൽപ്പരപ്പിലും വളപട്ടണത്തെ മൈതാനങ്ങളിലും പന്തുതട്ടുന്നത് തഹ്സിന്റെ പതിവാണ്.
More Read
പരിക്ക് മൂലം ഫുട്ബാൾ കരിയർ പൂർണതയിലെത്തിക്കാനാകാതെ പോയ പിതാവ് ജംഷീദിന്റെ സ്വപ്നങ്ങളാണ് ഇന്ന് മകനിലൂടെ സഫലമാകുന്നതെന്ന് ബന്ധുക്കൾ പറയുന്നു. മുൻ കേരള യൂത്ത് താരവും കാലിക്കറ്റ് സർവകലാശാല ടീമിന്റെ ഉപനായകനുമായിരുന്ന ജംഷീദ്, മകന്റെ നേട്ടത്തിൽ അഭിമാനത്തിലാണ്.
English Summary:
Kannur-origin footballer Tahsin Mohammed Jamsheed has been named in Qatar’s 26-member World Cup squad, marking a historic first for a Malayali player. Born and raised in Qatar, the 19-year-old striker rose through the Aspire Academy and Qatar’s youth teams before making the senior national team.
