കൊല്ലം: ഹോട്ടലുകളിലും തട്ടുകടകളിലും ഉപയോഗശേഷം മാലിന്യമായി തള്ളുന്ന പഴകിയ പാചകയെണ്ണയ്ക്ക് വിപണിയിൽ ലിറ്ററിന് 55 മുതൽ 70 രൂപ വരെ വില. ഭക്ഷ്യസുരക്ഷാ വകുപ്പ് നടപ്പാക്കുന്ന റൂക്കോ പദ്ധതിയിലൂടെ അംഗീകൃത കമ്പനികളാണ് ഹോട്ടൽ ഉടമകളിൽനിന്ന് ഉപയോഗിച്ച എണ്ണ പണം നൽകി ശേഖരിക്കുന്നത്. വീണ്ടും പാചകത്തിന് ഉപയോഗിക്കുന്നത് തടഞ്ഞ് എണ്ണ സുരക്ഷിതമായി സംസ്കരിക്കുകയാണ് പദ്ധതിയുടെ ലക്ഷ്യം.
രണ്ട് മാസത്തിനിടെ ശേഖരിച്ചത് 4,844 ലിറ്റർ എണ്ണ
കൊല്ലം ജില്ലയിൽ ആഗസ്റ്റ്, സെപ്റ്റംബർ മാസങ്ങളിലായി 4,844 ലിറ്റർ ഉപയോഗിച്ച പാചകയെണ്ണ ശേഖരിച്ചു. 2018ലാണ് ഭക്ഷ്യസുരക്ഷാ വകുപ്പ് റൂക്കോ പദ്ധതി ആരംഭിച്ചത്. തുടക്കത്തിൽ വ്യാപാരികൾക്ക് താൽപര്യം കുറവായിരുന്നെങ്കിലും ഇപ്പോൾ പദ്ധതിക്ക് സ്വീകാര്യത വർധിച്ചിട്ടുണ്ട്.
അംഗീകൃത കമ്പനികൾ നൽകുന്ന പ്രത്യേക കാനുകളിലാണ് സ്ഥാപനങ്ങൾ ഉപയോഗിച്ച എണ്ണ സൂക്ഷിക്കേണ്ടത്. ആഴ്ചയിലൊരിക്കൽ ഏജന്റുമാർ സ്ഥാപനങ്ങളിലെത്തി എണ്ണ ശേഖരിക്കും. അളവനുസരിച്ച് ഉടമകൾക്ക് പണം നൽകുകയും ചെയ്യും.
ഒരു ലിറ്റർ മുതൽ കൈമാറാം; ആഴ്ചയിൽ നാലു ലിറ്റർ നിബന്ധന
ഒരു ലിറ്റർ എണ്ണ മുതൽ കൈമാറാൻ കഴിയുമെങ്കിലും ആഴ്ചയിൽ കുറഞ്ഞത് നാലു ലിറ്ററെങ്കിലും നൽകണമെന്നാണ് നിബന്ധന. ഹോട്ടലുകൾക്കും തട്ടുകടകൾക്കും പുറമെ പൊതുജനങ്ങളിൽനിന്നും ഉപയോഗിച്ച എണ്ണ ശേഖരിക്കുന്നുണ്ട്.
ഭക്ഷ്യസുരക്ഷാ വകുപ്പിന്റെ അംഗീകാരമുള്ള നാല് കമ്പനികൾക്കാണ് സംസ്ഥാനത്ത് ഈ രീതിയിൽ എണ്ണ ശേഖരിക്കാൻ അനുമതിയുള്ളത്. ശേഖരിക്കുന്ന എണ്ണ സംസ്കരിച്ചശേഷം ബയോഡീസൽ, സോപ്പ് എന്നിവയുടെ നിർമാണത്തിന് ഉപയോഗിക്കും.
വീണ്ടും ചൂടാക്കുന്ന എണ്ണ ആരോഗ്യത്തിന് ഭീഷണി
പാചകയെണ്ണ ആവർത്തിച്ച് ചൂടാക്കുമ്പോൾ അതിലെ ടോട്ടൽ പോളാർ കോമ്പൗണ്ട്സ് (ടി.പി.സി) ഘടകങ്ങളുടെ അളവ് വർധിക്കും. ടി.പി.സി അളവ് 25 ശതമാനത്തിൽ കൂടുതലുള്ള എണ്ണ പാചകത്തിന് ഉപയോഗിക്കാൻ പാടില്ലെന്നാണ് ഭക്ഷ്യസുരക്ഷാ മാനദണ്ഡം.
ഇത്തരം എണ്ണയുടെ ഉപയോഗം രക്തസമ്മർദം, കരൾരോഗങ്ങൾ, ഹൃദയാഘാതം തുടങ്ങിയ ആരോഗ്യപ്രശ്നങ്ങളുടെ സാധ്യത വർധിപ്പിക്കുമെന്ന് ഭക്ഷ്യസുരക്ഷാ വകുപ്പ് മുന്നറിയിപ്പ് നൽകുന്നു. ഡിജിറ്റൽ ടി.പി.എം മീറ്റർ ഉപയോഗിച്ചാണ് എണ്ണയുടെ ഗുണനിലവാരം പരിശോധിക്കുന്നത്.
ഓപ്പറേഷൻ തെളിമയുടെ ഭാഗമായി പരിശോധന ശക്തം
പഴകിയ എണ്ണ വീണ്ടും പാചകത്തിന് ഉപയോഗിക്കുന്നത് തടയാൻ ഓപ്പറേഷൻ തെളിമയുടെ ഭാഗമായി ജില്ലയിലും പരിശോധന ശക്തമാക്കിയിട്ടുണ്ട്. ഉപയോഗിച്ച എണ്ണ വീണ്ടും ഭക്ഷണം പാകം ചെയ്യാൻ ഉപയോഗിക്കുന്നതായി കണ്ടെത്തിയാൽ കർശന നടപടി സ്വീകരിക്കുമെന്ന് ഭക്ഷ്യസുരക്ഷാ വകുപ്പ് അറിയിച്ചു.
ഹോട്ടലുകളും പൊതുജനങ്ങളും വെബ്സൈറ്റ് വഴി റൂക്കോ പദ്ധതിയിൽ രജിസ്റ്റർ ചെയ്ത് ഉപയോഗശേഷമുള്ള എണ്ണ അംഗീകൃത ഏജൻസികൾക്ക് കൈമാറണം. പഴകിയ എണ്ണ സുരക്ഷിതമായി സംസ്കരിക്കുന്നതിനൊപ്പം അത് വീണ്ടും ഭക്ഷ്യശൃംഖലയിലേക്ക് എത്തുന്നത് തടയാനും ഇതിലൂടെ കഴിയും.
കൊല്ലം ഭക്ഷ്യസുരക്ഷാ വകുപ്പ് അസിസ്റ്റന്റ് കമ്മിഷണർ സക്കീർ ഹുസൈൻ ആണ് ഇക്കാര്യം അറിയിച്ചത്.
English Summary:
Under the Food Safety Department’s RUCO scheme, authorised agencies collect used cooking oil from hotels and street food outlets in Kerala at rates of ₹55 to ₹70 per litre. Kollam district recorded the collection of 4,844 litres in August and September. The collected oil is processed for biodiesel and soap production, preventing its reuse for cooking. The department has also intensified inspections under Operation Thelimai.
