പി.എസ്.സി നിയമന തട്ടിപ്പ്: അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ വിജ്ഞാപനത്തിലും തിരുത്തൽ

തിരുവനന്തപുരം: അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർമാരുടെ നിയമനത്തിൽ വേണ്ടപ്പെട്ടവർക്ക് അവസരം ഒരുക്കാൻ പി.എസ്.സി വിജ്ഞാപനത്തിൽ പോലും തിരുത്തൽ വരുത്തിയതായി എഫ്.ഐ.ആർ. പരീക്ഷാ-നിയമന ക്രമക്കേടുകൾക്ക് പിന്നിൽ പി.എസ്.സി ചെയർമാനും രാഷ്ട്രീയ പശ്ചാത്തലമുള്ള മൂന്ന് അംഗങ്ങളും അറസ്റ്റിലായ രണ്ട് ഉദ്യോഗസ്ഥരുമടങ്ങുന്ന ആറംഗ കോർഗ്രൂപ്പാണെന്നാണ് പ്രത്യേക അന്വേഷണസംഘത്തിന്റെ (എസ്.ഐ.ടി) കണ്ടെത്തൽ.

വിദ്യാഭ്യാസ യോഗ്യതയിൽ അവസാന നിമിഷം മാറ്റം

പി.എസ്.സി ക്രമക്കേടുമായി ബന്ധപ്പെട്ട നാലാമത്തെ കേസിലാണ് അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ നിയമന വിജ്ഞാപനത്തിലെ തിരുത്തൽ കണ്ടെത്തിയത്. അപേക്ഷ സമർപ്പിക്കാനുള്ള അവസാന തീയതിക്ക് മുൻപ് വിദ്യാഭ്യാസ യോഗ്യതയിൽ രണ്ട് കോഴ്സുകൾ കൂടി ഉൾപ്പെടുത്തിയെന്നാണ് എഫ്.ഐ.ആറിലെ ആരോപണം.

ശാരീരിക യോഗ്യതയില്ലാത്തവരെയും നിയമന നടപടികളിൽ ഉൾപ്പെടുത്തിയെന്നും പരാതിയിലുണ്ട്. പരീക്ഷയ്ക്കുള്ള 45 ചോദ്യങ്ങൾ ‘എസ്കാം വേദ ഓൺലൈൻ സ്റ്റഡി മെറ്റീരിയൽ പ്രൊവൈഡേഴ്സ്’, ‘സാൻഫോൺഡറി ഡോട്ട് കോം’ എന്നീ ഓൺലൈൻ സൈറ്റുകളിൽനിന്ന് പകർത്തിയതായും എഫ്.ഐ.ആറിൽ പറയുന്നു.

2024 സെപ്റ്റംബർ രണ്ടിന് പ്രസിദ്ധീകരിച്ച റാങ്ക് ലിസ്റ്റിൽനിന്ന് അനർഹരായ ഉദ്യോഗാർത്ഥികൾക്ക് നിയമനം നൽകിയെന്നും അന്വേഷണസംഘം ആരോപിക്കുന്നു. പെരുമ്പാവൂർ സ്വദേശി രാഹുൽ രാജിന്റെ പരാതിയിലാണ് കേസ് രജിസ്റ്റർ ചെയ്തത്. ഉദ്യോഗസ്ഥരെ പ്രതികളാക്കിയിട്ടുണ്ടെങ്കിലും എഫ്.ഐ.ആറിൽ ആരുടെയും പേര് പരാമർശിച്ചിട്ടില്ല. ക്രൈംബ്രാഞ്ച് ഡിവൈ.എസ്.പി എസ്.എ. പ്രദീപ് കുമാറിന്റെ നേതൃത്വത്തിലാണ് അന്വേഷണം.

പി.എസ്.സി സെക്രട്ടറിയെ മൂന്നുമണിക്കൂർ ചോദ്യംചെയ്തു

പി.എസ്.സി സെക്രട്ടറി സാജു ജോർജിനെ എസ്.ഐ.ടി മൂന്നുമണിക്കൂറോളം ചോദ്യം ചെയ്തു. ചെയർമാനും സംഘവും നടത്തിയതായി ആരോപിക്കപ്പെടുന്ന ക്രമക്കേടുകളെക്കുറിച്ചുള്ള വിവരങ്ങളും ബന്ധപ്പെട്ട രേഖകളും അദ്ദേഹം അന്വേഷണസംഘത്തിന് കൈമാറി.

തട്ടിപ്പിൽ സെക്രട്ടറിക്ക് പങ്കില്ലെന്നാണ് എസ്.ഐ.ടിയുടെ പ്രാഥമിക നിഗമനം. അന്വേഷണവുമായി സഹകരിക്കുമെന്ന് അദ്ദേഹം മാധ്യമങ്ങളോട് വ്യക്തമാക്കി. പി.എസ്.സിയിൽനിന്ന് ക്രൈംബ്രാഞ്ചിന് രേഖകൾ കൈമാറുന്നതിനായി രൂപീകരിച്ച പ്രത്യേക സെല്ലിന്റെ തലവനായിരുന്നു സെക്രട്ടറി.

അതേസമയം, പരീക്ഷാ കൺട്രോളർ ബിനി കെ. എബ്രഹാമിനെ ചൊവ്വാഴ്ച ചോദ്യംചെയ്യും. ചില ഉദ്യോഗസ്ഥരെ തിങ്കളാഴ്ചയും ചോദ്യംചെയ്യാനാണ് തീരുമാനം. 12 കമ്മിഷൻ അംഗങ്ങൾക്കും ചോദ്യംചെയ്യലിന് ഹാജരാകാൻ നോട്ടീസ് നൽകിയിട്ടുണ്ട്.

ആറംഗ കോർഗ്രൂപ്പിന് നിർണായക ചുമതലകളിലെല്ലാം പങ്ക്

പരീക്ഷാ ചോദ്യപേപ്പർ തയ്യാറാക്കൽ, അഭിമുഖ സമിതി രൂപീകരണം, മാർക്കിടൽ, റാങ്ക് ലിസ്റ്റ് തയ്യാറാക്കൽ, നിയമനം തുടങ്ങിയ നിർണായക നടപടികളിലെല്ലാം ആറംഗ കോർഗ്രൂപ്പിന് പങ്കുണ്ടെന്നാണ് എസ്.ഐ.ടി കണ്ടെത്തൽ.

പരീക്ഷാ കൺട്രോളർക്ക് ഉത്തരവാദിത്തത്തിൽനിന്ന് ഒഴിഞ്ഞുമാറാനാകില്ലെന്നും അന്വേഷണസംഘം വ്യക്തമാക്കുന്നു. ക്രമക്കേടുകളുടെ വ്യാപ്തി കണക്കിലെടുത്ത് കൂടുതൽ ഉദ്യോഗസ്ഥരെയും കമ്മിഷൻ അംഗങ്ങളെയും ചോദ്യംചെയ്യാനുള്ള നടപടികളും പുരോഗമിക്കുകയാണ്.

കൂടുതൽ കേസുകൾക്ക് ഗവർണറുടെ അനുമതി തേടിയേക്കും

പി.എസ്.സി ചെയർമാനെയും അംഗങ്ങളെയും കൂടുതൽ കേസുകളിൽ പ്രതികളാക്കാനും അറസ്റ്റ് ചെയ്യാനും ഗവർണറുടെ മുൻകൂർ അനുമതി തേടിയേക്കുമെന്ന് സൂചനയുണ്ട്. അഴിമതി നിരോധന നിയമത്തിലെ 17(എ) വകുപ്പ് പ്രകാരമാണ് അനുമതി തേടുന്നത്.

ആസൂത്രണബോർഡ് തട്ടിപ്പ് കേസിൽ പ്രതികളാക്കിയപ്പോൾ മുൻകൂർ അനുമതി തേടിയിരുന്നില്ല. ഇതിനെ ഹൈക്കോടതിയിൽ ചോദ്യം ചെയ്തിട്ടുണ്ട്. വിഷയം തിങ്കളാഴ്ച ഹൈക്കോടതി പരിഗണിക്കും. വിചാരണയ്ക്ക് മുൻകൂർ അനുമതി മതിയെന്നാണ് ക്രൈംബ്രാഞ്ചിന് ലഭിച്ച നിയമോപദേശം.

English Summary:
The SIT probing alleged Kerala PSC recruitment irregularities has found that the notification for Assistant Motor Vehicle Inspector posts was allegedly altered to include additional educational qualifications before the application deadline. The FIR also alleges irregularities in physical eligibility, question-paper preparation and appointments. Investigators have identified an alleged six-member core group and are questioning PSC officials and members. The PSC secretary has been questioned, with the SIT reportedly finding no role for him in the alleged scam.