വിവാഹത്തിന് വിസമ്മതിച്ച് കാമുകൻ; യുപിയിൽ വാട്ടർ ടാങ്കിന് മുകളിൽ കയറി യുവതി

കൗശാമ്പി (ഉത്തർപ്രദേശ്): വിവാഹം കഴിക്കാൻ കാമുകൻ വിസമ്മതിച്ചതിനെത്തുടർന്ന് 23കാരി നിർമാണത്തിലിരിക്കുന്ന വാട്ടർ ടാങ്കിന് മുകളിൽ കയറി.

ഉത്തർപ്രദേശിലെ കൗശാമ്പി ജില്ലയിൽ ശനിയാഴ്ചയാണ് സംഭവം. ഒരു മണിക്കൂറോളം നീണ്ട അനുനയശ്രമത്തിനൊടുവിൽ പൊലീസ് യുവതിയെ സുരക്ഷിതമായി താഴെയിറക്കി. പിപ്രി പൊലീസ് സ്റ്റേഷൻ പരിധിയിലെ മഖൗപൂർ ഗ്രാമത്തിലാണ് സംഭവം നടന്നത്.

വർഷങ്ങൾ നീണ്ട പ്രണയബന്ധം

സരായ് അകിൽ പൊലീസ് സ്റ്റേഷൻ പരിധിയിലെ ഒരു ഗ്രാമത്തിൽ നിന്നുള്ള യുവതിയാണ് വാട്ടർ ടാങ്കിന് മുകളിൽ കയറിയത്.

ഇതേ പൊലീസ് സ്റ്റേഷൻ പരിധിയിലെ മറ്റൊരു ഗ്രാമത്തിൽ നിന്നുള്ള 26കാരനുമായി വർഷങ്ങളായി പ്രണയത്തിലായിരുന്നുവെന്ന് പൊലീസ് പറഞ്ഞു.എന്നാൽ യുവാവ് ഇപ്പോൾ വിവാഹത്തിന് തയ്യാറാകുന്നില്ലെന്നാണ് യുവതിയുടെ ആരോപണം.

ഇതിൽ അസ്വസ്ഥയായാണ് ഗ്രാമ സെക്രട്ടേറിയറ്റിന് സമീപം നിർമാണത്തിലിരിക്കുന്ന വാട്ടർ ടാങ്കിന് മുകളിൽ കയറിയതെന്നും പൊലീസ് വ്യക്തമാക്കി.

ഒരു മണിക്കൂർ നീണ്ട അനുനയശ്രമം

വിവരമറിഞ്ഞതോടെ നിരവധി ഗ്രാമവാസികൾ സ്ഥലത്ത് തടിച്ചുകൂടി. സബ് ഡിവിഷണൽ മജിസ്‌ട്രേറ്റ് പ്രേരണ ഗൗതം, സർക്കിൾ ഓഫീസർ ശിവാങ്ക് സിങ് എന്നിവർ പൊലീസ് സംഘത്തോടൊപ്പം സ്ഥലത്തെത്തി.

യുവതിയെ താഴെയിറക്കാൻ ഉദ്യോഗസ്ഥരും പൊലീസും ഏറെനേരം ശ്രമിച്ചു. ഒടുവിൽ വനിതാ കോൺസ്റ്റബിൾമാർ ഇടപെട്ട് ഒരു മണിക്കൂറോളം നീണ്ട അനുനയശ്രമത്തിനുശേഷം യുവതിയെ സുരക്ഷിതമായി താഴെയിറക്കുകയായിരുന്നു.

കുടുംബത്തിന് കൈമാറി

യുവതിയുടെ കുടുംബാംഗങ്ങളെ വിവരമറിയിച്ച് സ്ഥലത്തേക്ക് വിളിച്ചുവരുത്തിയതായി സർക്കിൾ ഓഫീസർ അറിയിച്ചു.

തുടർന്ന് യുവതിയെ കുടുംബാംഗങ്ങൾക്ക് കൈമാറി. സംഭവത്തിൽ കൂടുതൽ വിവരങ്ങൾ പൊലീസ് പുറത്തുവിട്ടിട്ടില്ല.

English Summary : A 23-year-old woman climbed an under-construction water tank in Makhaopur village in Uttar Pradesh’s Kaushambi district on Saturday after her boyfriend allegedly refused to marry her. Police and officials persuaded her for nearly an hour before women constables safely brought her down. She was later handed over to her family.