തിരുവനന്തപുരം: സർക്കാർ നിർദേശം മറികടന്ന് മൂന്ന് ബാറുകൾക്ക് ലൈസൻസ് അനുവദിച്ച സംഭവത്തിൽ നടപടിക്കൊരുങ്ങി എക്സൈസ് വകുപ്പ്. പുതിയ മദ്യനയത്തിൽ തീരുമാനമാകുന്നതുവരെ പുതിയ ബാർ ലൈസൻസുകൾ അനുവദിക്കരുതെന്ന നിർദേശം നിലനിൽക്കെയാണ് കോട്ടയത്തും എറണാകുളത്തുമായി മൂന്ന് സ്ഥാപനങ്ങൾക്ക് അനുമതി നൽകിയത്.
സംഭവത്തിൽ എക്സൈസ് മന്ത്രി എം. ലിജു കടുത്ത അതൃപ്തി രേഖപ്പെടുത്തി. വീഴ്ച വരുത്തിയ ഉദ്യോഗസ്ഥർക്കെതിരെ കർശന നടപടി സ്വീകരിക്കണമെന്ന് മന്ത്രി നിർദേശം നൽകിയതായാണ് വിവരം.
സർക്കാർ നിർദേശം മറികടന്ന് ലൈസൻസ്
യുഡിഎഫ് സർക്കാർ അധികാരമേറ്റശേഷമാണ് കോട്ടയത്തെ ഒരു ബാറിനും എറണാകുളത്തെ രണ്ട് ബാറുകൾക്കും തരംമാറ്റത്തിലൂടെ ലൈസൻസ് അനുവദിച്ചത്. പുതിയ മദ്യനയം സംബന്ധിച്ച തീരുമാനം വരുന്നതുവരെ പുതിയ ലൈസൻസുകൾ നൽകരുതെന്ന് സർക്കാർ നിർദേശിച്ചിരുന്നു.
എന്നാൽ ഈ നിർദേശം നിലനിൽക്കെയാണ് ബന്ധപ്പെട്ട എക്സൈസ് ഡെപ്യൂട്ടി കമ്മിഷണർ മൂന്ന് ബാറുകൾക്കും ലൈസൻസ് അനുവദിച്ചത്. ഇതാണ് വിവാദത്തിന് കാരണമായത്.
മന്ത്രിയുടെ ഇടപെടൽ; അന്വേഷണവും തുടങ്ങി
സംഭവം ശ്രദ്ധയിൽപ്പെട്ടതോടെ മന്ത്രി എം. ലിജു അടിയന്തരമായി ഇടപെട്ടു. വിഷയത്തിൽ എക്സൈസ് വകുപ്പിലെ ഉന്നത ഉദ്യോഗസ്ഥരുമായി കൂടിയാലോചന നടത്തി. സർക്കാർ നിർദേശം ലംഘിച്ച സംഭവത്തിൽ ഉത്തരവാദികളായവർക്കെതിരെ കർശന നടപടി വേണമെന്നാണ് മന്ത്രിയുടെ നിലപാട്.
More Read
അതേസമയം, സംഭവത്തിൽ എക്സൈസ് കമ്മിഷണർ പ്രാഥമിക അന്വേഷണം പൂർത്തിയാക്കിയിട്ടുണ്ട്. ലൈസൻസ് അനുവദിച്ച എക്സൈസ് ഡെപ്യൂട്ടി കമ്മിഷണർക്കെതിരെ വകുപ്പുതല നടപടി സ്വീകരിക്കാനാണ് നീക്കം.
ഡെപ്യൂട്ടി കമ്മിഷണർക്ക് സസ്പെൻഷൻ ഉണ്ടായേക്കും
ലൈസൻസ് അനുവദിച്ചതിൽ വീഴ്ച വരുത്തിയ ഉദ്യോഗസ്ഥനെ സസ്പെൻഡ് ചെയ്തേക്കുമെന്നാണ് സൂചന. അന്വേഷണത്തിലെ കണ്ടെത്തലുകളുടെ അടിസ്ഥാനത്തിലായിരിക്കും തുടർനടപടികൾ. സംഭവത്തിൽ വകുപ്പിന്റെ അന്തിമ തീരുമാനം പുറത്തുവന്നിട്ടില്ല.
English Summary : The Kerala Excise Department is preparing to take action after three bars were granted licences without government approval before the new liquor policy was finalised. The licences were issued to one bar in Kottayam and two in Ernakulam, allegedly violating government instructions. Excise Minister M. Liju has expressed strong displeasure and sought strict action against those responsible. The Excise Commissioner has conducted a preliminary inquiry, and the deputy commissioner who issued the licences may face suspension.
