ഡൽഹിയിൽ ദീപാവലിക്കുശേഷം വായുമലിനീകരണം രൂക്ഷം; എക്യുഐ 376

ന്യൂഡൽഹി: ദീപാവലി ആഘോഷങ്ങൾക്കു പിന്നാലെ രാജ്യതലസ്ഥാനമായ ഡൽഹിയിൽ വായുമലിനീകരണം വീണ്ടും രൂക്ഷമായി. 

ഞായറാഴ്ച രാത്രി വ്യാപകമായി പടക്കം പൊട്ടിച്ചതോടെ തിങ്കളാഴ്ച രാവിലെ വായുനിലവാര സൂചിക (എക്യുഐ) 376 ആയി ഉയർന്നു. 

ഇതോടെ വായുനിലവാരം ‘വളരെ മോശം’ വിഭാഗത്തിലെത്തി. പുകമഞ്ഞ് നഗരത്തെ മൂടിയതോടെ വിമാനഗതാഗതത്തിലും തടസ്സങ്ങളുണ്ടായി.

2021നുശേഷമുള്ള മോശം ദീപാവലി വായുനിലവാരം

തിങ്കളാഴ്ച രാവിലെ നഗരത്തിന്റെ ഭൂരിഭാഗം പ്രദേശങ്ങളും പുകയും മൂടൽമഞ്ഞും നിറഞ്ഞ നിലയിലായിരുന്നു. 

രാവിലെ പത്തുമണിയോടെ എക്യുഐ 371 ആയി കുറഞ്ഞെങ്കിലും മലിനീകരണത്തിന്റെ തീവ്രതയിൽ കാര്യമായ മാറ്റമുണ്ടായില്ല.

2021നുശേഷമുള്ള ഏറ്റവും മോശം ദീപാവലി വായുനിലവാരമാണ് ഇത്തവണ ഡൽഹിയിൽ രേഖപ്പെടുത്തിയതെന്ന് കേന്ദ്ര മലിനീകരണ നിയന്ത്രണ ബോർഡിന്റെ കണക്കുകൾ വ്യക്തമാക്കുന്നു. 

2021ലെ ദീപാവലി ദിനത്തിൽ എക്യുഐ 382 ആയിരുന്നു. കഴിഞ്ഞ വർഷം ഇത് 345 ആയിരുന്നു.

51 നിരീക്ഷണ കേന്ദ്രങ്ങളിൽ മലിനീകരണം ഉയർന്നു

ഡൽഹിയിലെ 51 നിരീക്ഷണ കേന്ദ്രങ്ങളിൽ നിന്നുള്ള കണക്കുകൾ പരിശോധിക്കുമ്പോൾ 14 ഇടങ്ങളിൽ വായുനിലവാരം ഗുരുതര വിഭാഗത്തിലും 33 ഇടങ്ങളിൽ വളരെ മോശം വിഭാഗത്തിലുമാണ്. 

ശേഷിക്കുന്ന നാല് കേന്ദ്രങ്ങളിൽ മോശം വായുനിലവാരവും രേഖപ്പെടുത്തി.

ഡൽഹി സാങ്കേതിക സർവകലാശാല സ്ഥിതിചെയ്യുന്ന പ്രദേശത്താണ് ഏറ്റവും ഉയർന്ന മലിനീകരണ തോത് റിപ്പോർട്ട് ചെയ്തത്. 

ഇവിടെ എക്യുഐ 439 ആയി. നഗരത്തിന്റെ വിവിധ ഭാഗങ്ങളിൽ മലിനീകരണം ഉയർന്ന നിലയിൽ തുടരുന്നതായാണ് കണക്കുകൾ സൂചിപ്പിക്കുന്നത്.

പുകമഞ്ഞിൽ വിമാനഗതാഗതം തടസ്സപ്പെട്ടു

അന്തരീക്ഷത്തിൽ പുക കനത്തതോടെ ഡൽഹിയിലെ പ്രധാന കാലാവസ്ഥാ നിരീക്ഷണ കേന്ദ്രങ്ങളിലെല്ലാം കാഴ്ചാപരിധി ഗണ്യമായി കുറഞ്ഞു.

 ഇതിന്റെ പ്രത്യാഘാതം വിമാനഗതാഗതത്തെയും ബാധിച്ചു. പുകമഞ്ഞ് കാരണം 26 വിമാന സർവീസുകൾ തടസ്സപ്പെട്ടതായി റിപ്പോർട്ടുണ്ട്.

റൺവേ വ്യക്തമായി കാണാൻ കഴിയാത്തതിനെ തുടർന്ന് 11 വിമാനങ്ങൾ ഏറെനേരം ആകാശത്ത് വട്ടമിട്ടു പറന്നു. ഇതിൽ ഒരു വിമാനം ബെംഗളൂരു വിമാനത്താവളത്തിലേക്ക് തിരിച്ചുവിട്ടു.

 ദീപാവലി ആഘോഷങ്ങൾക്കുശേഷം ഡൽഹിയിൽ വായുമലിനീകരണം വീണ്ടും രൂക്ഷമായത് പൊതുജനാരോഗ്യത്തെയും ഗതാഗതത്തെയും കുറിച്ചുള്ള ആശങ്ക വർധിപ്പിച്ചിട്ടുണ്ട്.

English Summary:

Air pollution worsened in New Delhi after widespread firecracker use during Diwali celebrations. The Air Quality Index (AQI) reached 376, placing the city in the ‘very poor’ category. Thick smog reduced visibility and disrupted 26 flight services, while 11 aircraft reportedly had to circle in the sky.