പുനലൂർ: കേരള–തമിഴ്നാട് അതിർത്തി ഗ്രാമമായ പുളിയറയിൽ കാട്ടാന ആക്രമണത്തിൽ 70കാരനായ കർഷകന് ദാരുണാന്ത്യം. പുളിയറ ഇല്ലത്താർ തെക്കുതെരുവിൽ സുബ്ബയ്യയാണ് കൊല്ലപ്പെട്ടത്. തിങ്കളാഴ്ച രാവിലെ കൃഷിത്തോട്ടത്തിലേക്ക് പോകുന്നതിനിടെയായിരുന്നു ആക്രമണം.
ദക്ഷിണാമൂർത്തി ക്ഷേത്രത്തിന് പിന്നിലുള്ള കൊട്ടാവികുളത്തെ സ്വന്തം കൃഷിയിടത്തിൽ രാവിലെ ഒമ്പത് മണിയോടെ എത്തിയപ്പോഴാണ് കാട്ടാനയുടെ മുന്നിൽപ്പെട്ടത്. ആന അദ്ദേഹത്തെ ഓടിച്ചിട്ട് ചവിട്ടിക്കൊന്നതായാണ് പൊലീസിന്റെ വിശദീകരണം.
മൃതശരീരം മാറ്റാൻ അനുവദിക്കാതെ നാട്ടുകാരുടെ പ്രതിഷേധം
പുളിയറയ്ക്ക് തെക്കുമേട്ടിൽ കൊട്ടാവള്ളി കുളത്തിന് സമീപമാണ് സുബ്ബയ്യയുടെ മൃതദേഹം കണ്ടെത്തിയത്. പൊലീസ്, വനംവകുപ്പ് ഉദ്യോഗസ്ഥർ എന്നിവർ മൃതദേഹം പോസ്റ്റ്മോർട്ടത്തിനായി തെങ്കാശി സർക്കാർ ആശുപത്രിയിലേക്ക് മാറ്റാൻ ശ്രമിച്ചെങ്കിലും നാട്ടുകാരും ബന്ധുക്കളും തടഞ്ഞു.
പ്രദേശത്ത് വന്യമൃഗശല്യം രൂക്ഷമായിട്ടും ഫലപ്രദമായ നടപടികൾ സ്വീകരിക്കുന്നില്ലെന്ന് ആരോപിച്ചായിരുന്നു പ്രതിഷേധം. ജനരോഷം ശക്തമായതോടെ തെങ്കാശി ഡിവൈഎസ്പി സ്ഥലത്തെത്തി ചർച്ച നടത്തി.
More Read
വന്യമൃഗങ്ങളെ തുരത്താൻ നടപടി; ഉറപ്പിനെ തുടർന്ന് പ്രതിഷേധം അവസാനിച്ചു
കൃഷിയിടങ്ങളിലേക്ക് എത്തുന്ന കാട്ടാനകളെ തുരത്താൻ നടപടി സ്വീകരിക്കുമെന്ന് വനംവകുപ്പ് അധികൃതർ ഉറപ്പുനൽകി. ഇതോടെയാണ് ബന്ധുക്കൾ മൃതദേഹം ആശുപത്രിയിലേക്ക് കൊണ്ടുപോകാൻ അനുവദിച്ചത്.
കാട്ടാനകളും കാട്ടുപോത്തുകളും പതിവായി കൃഷിയിടങ്ങളിലേക്ക് കടന്നുവരുന്നത് തടയാൻ ഫലപ്രദമായ സംവിധാനം വേണമെന്നാണ് പ്രദേശവാസികളുടെ ആവശ്യം. സുബ്ബയ്യയുടെ കുടുംബത്തിന് അടിയന്തര നഷ്ടപരിഹാരം നൽകണമെന്നും നാട്ടുകാർ ആവശ്യപ്പെടുന്നു.
More Read
കടുവ ട്രെയിൻ തട്ടി ചത്തതും ആശങ്ക വർധിപ്പിക്കുന്നു
പുളിയറയ്ക്ക് സമീപത്തെ ഭഗവതീപുരത്ത് കഴിഞ്ഞ ബുധനാഴ്ച ജനവാസമേഖലയോട് ചേർന്ന റെയിൽവേ ട്രാക്കിൽ കടുവ ട്രെയിൻ തട്ടി ചത്തിരുന്നു. തുടർച്ചയായ വന്യമൃഗ സാന്നിധ്യവും ആക്രമണങ്ങളും പ്രദേശവാസികളുടെ ആശങ്ക വർധിപ്പിച്ചിട്ടുണ്ട്.
കൃഷിയിടങ്ങളിലേക്കുള്ള വന്യമൃഗങ്ങളുടെ കടന്നുകയറ്റം തടയാൻ സ്ഥിരമായ നിരീക്ഷണവും ഫലപ്രദമായ പ്രതിരോധ സംവിധാനങ്ങളും വേണമെന്നാണ് നാട്ടുകാരുടെ ആവശ്യം. സുബ്ബയ്യയുടെ മരണം അതിർത്തി ഗ്രാമങ്ങളിലെ വന്യമൃഗശല്യത്തിന്റെ ഗൗരവം വീണ്ടും ചൂണ്ടിക്കാട്ടുന്നു.
English Summary: A 70-year-old farmer, Subbaiya, was killed in a wild elephant attack at Puliyara, near the Kerala–Tamil Nadu border. The incident triggered protests by residents, who demanded compensation for the family and effective measures to prevent wild animals from entering agricultural land.
