ന്യൂഡൽഹി: വടക്കുപടിഞ്ഞാറൻ ഡൽഹിയിലെ വസീർപൂർ ഇൻഡസ്ട്രിയൽ ഏരിയയിലെ പാത്ര ഫാക്ടറിയിൽ 47കാരൻ തീകൊളുത്തി മരിച്ചു. വെള്ളിയാഴ്ചയാണ് സംഭവം.
ഉത്തർപ്രദേശിലെ സന്ത് കബീർ നഗർ സ്വദേശിയായ സന്ദീപാണ് മരിച്ചത്.വിവാഹിതനായ സന്ദീപ് ഭാര്യയ്ക്കും രണ്ട് കുട്ടികൾക്കുമൊപ്പമാണ് താമസിച്ചിരുന്നത്.
ഒരു സുഹൃത്തിന്റെ വീട്ടിൽ ഇടയ്ക്കിടെ എത്തിയിരുന്ന ഇയാൾക്ക് വസീർപൂരിലെ പാത്ര ഫാക്ടറിയിൽ ജോലി ചെയ്തിരുന്ന 20കാരിയായ യുവതിയുമായി ബന്ധമുണ്ടായിരുന്നുവെന്നാണ് പൊലീസ് പറയുന്നത്.
ഡൽഹിയിൽ ഒറ്റയ്ക്കാണ് യുവതി താമസിച്ചിരുന്നത്.വിവാഹാഭ്യർഥന നിരസിച്ചതിന് പിന്നാലെസന്ദീപ് യുവതിയെ ഇടയ്ക്കിടെ ഫോണിൽ വിളിച്ചിരുന്നെങ്കിലും കുറച്ചുനാളായി യുവതി ഇയാളോട് സംസാരിക്കുന്നത് നിർത്തിയിരുന്നു.
ഇതിൽ അസ്വസ്ഥനായ സന്ദീപ് വ്യാഴാഴ്ച ഡൽഹിയിലെത്തി. വെള്ളിയാഴ്ച രണ്ട് കുപ്പി പെട്രോളുമായാണ് ഫാക്ടറിയിലെത്തിയത്.
More Read
തന്നെ വിവാഹം കഴിക്കണമെന്ന് സന്ദീപ് യുവതിയോട് ആവശ്യപ്പെട്ടെങ്കിലും യുവതി വിസമ്മതിച്ചു. ഇതിന് പിന്നാലെ ഇയാൾ ദേഹത്ത് പെട്രോൾ ഒഴിച്ച് തീകൊളുത്തുകയായിരുന്നുവെന്ന് പൊലീസ് പറഞ്ഞു.
ആശുപത്രിയിലെത്തിച്ചെങ്കിലും രക്ഷിക്കാനായില്ല
തീ പടർന്നതോടെ ഫാക്ടറി തൊഴിലാളികൾ ഓടിയെത്തി രക്ഷാപ്രവർത്തനം നടത്തി. തീ അണച്ച ശേഷം സന്ദീപിനെ ദീപ് ചന്ദ് ബന്ധു ആശുപത്രിയിൽ എത്തിച്ചു. എന്നാൽ ചികിത്സയ്ക്കിടെ ഡോക്ടർമാർ മരണം സ്ഥിരീകരിച്ചു.
തങ്ങളുടെ സൗഹൃദം യുവതി അവസാനിപ്പിച്ചതാണ് ആത്മഹത്യയ്ക്ക് കാരണമെന്ന് സന്ദീപ് എഴുതിയ ആത്മഹത്യാക്കുറിപ്പിൽ പറഞ്ഞതായി പൊലീസ് അറിയിച്ചു. എന്നാൽ സന്ദീപുമായി യാതൊരു ബന്ധവുമില്ലെന്ന് യുവതി നിഷേധിച്ചതായും പൊലീസ് വ്യക്തമാക്കി.
More Read
മൃതദേഹം പോസ്റ്റ്മോർട്ടത്തിന്
സന്ദീപിന്റെ മൃതദേഹം പോസ്റ്റ്മോർട്ടത്തിനായി അയച്ചു. സംഭവത്തെക്കുറിച്ച് കുടുംബത്തെ പൊലീസ് അറിയിച്ചിട്ടുണ്ട്.
ആത്മഹത്യാക്കുറിപ്പിലെ വിവരങ്ങളും യുവതിയുടെ മൊഴിയും ഉൾപ്പെടെ സംഭവത്തിൽ പൊലീസ് അന്വേഷണം തുടരുകയാണ്.
English Summary : A 47-year-old married man, identified as Sandeep, died after setting himself on fire inside a utensil factory in Wazirpur Industrial Area, northwest Delhi, on Friday. Police said he had gone to the factory with petrol and allegedly set himself on fire after a 20-year-old woman refused his marriage proposal.Sandeep reportedly left a note stating that the woman ending their association was the reason for his suicide. His body has been sent for post-mortem, and his family has been informed.
