വൈദ്യുതി പ്രതിസന്ധിക്ക് ആശ്വാസം; ത്രിപുര, ബീഹാർ എന്നിവിടങ്ങളിൽ നിന്ന് കേരളത്തിന് 450 മെഗാവാട്ട്

തിരുവനന്തപുരം: വൈദ്യുതി പ്രതിസന്ധി നേരിടുന്ന കേരളത്തിന് ത്രിപുര, ബീഹാർ സംസ്ഥാനങ്ങളിൽനിന്ന് 450 മെഗാവാട്ട് വൈദ്യുതി ലഭ്യമാകും.

നവംബർ 15ന് ശേഷം വൈദ്യുതി ലഭിച്ചുതുടങ്ങുമെന്നാണ് കെ.എസ്.ഇ.ബി അറിയിക്കുന്നത്.

അധിക സാമ്പത്തിക ബാധ്യതയുണ്ടാക്കുന്ന ജി.എൻ.എ വൈദ്യുതി വാങ്ങൽ കരാറിനെച്ചൊല്ലി വിവാദം തുടരുന്നതിനിടെയാണ് പുതിയ ധാരണ.

പീക്ക് സമയത്തെ വൈദ്യുതി ആവശ്യകത നിറവേറ്റാൻ ലക്ഷ്യമിട്ടാണ് കെ.എസ്.ഇ.ബി ഇരു സംസ്ഥാനങ്ങളുമായും ചർച്ച നടത്തി ധാരണയിലെത്തിയത്.

ത്രിപുരയിൽ നിന്ന് 250 മെഗാവാട്ട്; ബീഹാറിൽ നിന്ന് 200 മെഗാവാട്ട്

പീക്ക് സമയത്ത് ത്രിപുരയിൽനിന്ന് 250 മെഗാവാട്ടും ബീഹാറിൽനിന്ന് 200 മെഗാവാട്ടും വൈദ്യുതി ലഭ്യമാക്കാനാണ് ധാരണ.

വൈദ്യുതി ആവശ്യകത കൂടുമ്പോൾ വാങ്ങുകയും ആവശ്യം കുറഞ്ഞ സമയത്ത് അധിക വൈദ്യുതി തിരികെ നൽകുകയും ചെയ്യുന്ന സ്വാപിംഗ് സംവിധാനത്തിലൂടെയോ പണം നൽകി വാങ്ങുകയോ ചെയ്യാം.

യൂണിറ്റിന് 10 രൂപയിൽ താഴെയായിരിക്കും വൈദ്യുതിയുടെ വിലയെന്നാണ് പ്രതീക്ഷിക്കുന്നത്.

ഹിമാചൽ പ്രദേശ്, ജി.എൻ.എ തുടങ്ങിയ കരാറുകൾ അധിക സാമ്പത്തിക ബാധ്യതയുണ്ടാക്കുമെന്ന ആശങ്കയ്ക്കിടെയാണ് താങ്ങാവുന്ന നിരക്കിൽ വൈദ്യുതി ലഭ്യമാക്കാനുള്ള ഈ നീക്കം.

അതേസമയം, പശ്ചിമ ബംഗാളിൽനിന്നും വൈദ്യുതി ലഭ്യമാക്കാനുള്ള ശ്രമം കെ.എസ്.ഇ.ബി തുടരുകയാണ്.

മഹാജെൻകോയിൽ നിന്ന് 540 മെഗാവാട്ട് വൈദ്യുതി

മഹാരാഷ്ട്രയിലെ മഹാജെൻകോ കമ്പനിയുടെ സിന്നാർ താപനിലയത്തിൽനിന്ന് ഡിസംബർ അവസാനത്തോടെ വൈദ്യുതി ലഭിച്ചുതുടങ്ങുമെന്നാണ് പ്രതീക്ഷ.

വൈദ്യുതി പ്രതിസന്ധിയുടെ പശ്ചാത്തലത്തിൽ കഴിഞ്ഞ സെപ്റ്റംബറിൽ കെ.എസ്.ഇ.ബി ഡയറക്ടർമാർ ഉത്തരേന്ത്യൻ സംസ്ഥാനങ്ങൾ സന്ദർശിച്ചപ്പോഴാണ് കമ്പനിയുമായി ധാരണയിലെത്തിയത്.

ഡിസംബർ അവസാനം മുതൽ 270 മെഗാവാട്ടും മാർച്ച് മുതൽ മറ്റൊരു 270 മെഗാവാട്ടും ലഭ്യമാക്കാനാണ് പദ്ധതി. ഇതോടെ ആകെ 540 മെഗാവാട്ട് വൈദ്യുതി ലഭിക്കും.

യൂണിറ്റിന് 5.50 രൂപ; ദീർഘകാല കരാറിന് ശ്രമം

യൂണിറ്റിന് 5.50 രൂപ നിരക്കിൽ വൈദ്യുതി നൽകാമെന്നാണ് മഹാജെൻകോ സമ്മതിച്ചിട്ടുള്ളത്. ഇതുമായി ബന്ധപ്പെട്ട് ദീർഘകാല കരാറിൽ ഏർപ്പെടാനാണ് കെ.എസ്.ഇ.ബി ശ്രമിക്കുന്നത്.

ത്രിപുര, ബീഹാർ സംസ്ഥാനങ്ങളിൽനിന്നുള്ള 450 മെഗാവാട്ടും മഹാജെൻകോയിൽനിന്നുള്ള 540 മെഗാവാട്ടും ലഭ്യമാകുന്നതോടെ കേരളത്തിന്റെ വൈദ്യുതി ലഭ്യതയിൽ ഗണ്യമായ വർധനയുണ്ടാകുമെന്നാണ് പ്രതീക്ഷ.

English Summary:

Kerala is expected to receive 450 MW of electricity from Tripura and Bihar after November 15. The proposed arrangement includes 250 MW from Tripura and 200 MW from Bihar, through power swapping or direct purchase at rates below ₹10 per unit. Additionally, Maharashtra-based MAHAGENCO is expected to supply a total of 540 MW from its Sinnar thermal power plant in phases, beginning in late December, at ₹5.50 per unit. KSEB is also exploring a long-term agreemen