തിരുവനന്തപുരം: നന്തൻകോട്ടെ നിർമ്മാണം നിലച്ച ഫ്ലാറ്റ് സമുച്ചയത്തിൽ നിന്ന് പുരുഷന്റേതെന്ന് സംശയിക്കുന്ന അസ്ഥികൂടം കണ്ടെത്തി. ഒന്നര വർഷമായി ആളനക്കമില്ലാതെ കാടുകയറിക്കിടന്ന കെട്ടിടത്തിൽ നിന്നാണ് അസ്ഥികൂടം ലഭിച്ചത്. എട്ടുമാസം മുൻപ് കാണാതായ വ്യക്തിയുടേതാണോ ഇതെന്ന സംശയത്തിലാണ് പൊലീസ് അന്വേഷണം.
നന്തൻകോട്ടെ ഫ്ലാറ്റിൽ അസ്ഥികൂടം കണ്ടെത്തിയത് ശുചീകരണത്തിനിടെ
നിയമപരമായ തടസ്സങ്ങളെ തുടർന്ന് കഴിഞ്ഞ ഒന്നര വർഷമായി ഫ്ലാറ്റിന്റെ നിർമാണം നിലച്ചുകിടക്കുകയായിരുന്നു. കെട്ടിടവും പരിസരവും കാടുകയറിയ നിലയിലായിരുന്നു.
നിർമാണം പുനരാരംഭിക്കുന്നതിന്റെ മുന്നോടിയായി പരിസരം വൃത്തിയാക്കാനെത്തിയ തൊഴിലാളികളാണ് ഉച്ചയോടെ അസ്ഥികൂടം കണ്ടെത്തിയത്. തുടർന്ന് പൊലീസിനെ വിവരമറിയിച്ചു.
ഫോറൻസിക് പരിശോധന നടത്തി
വിവരമറിഞ്ഞ് പൊലീസും ഫോറൻസിക് വിദഗ്ധരും സ്ഥലത്തെത്തി വിശദമായ പരിശോധന നടത്തി. അസ്ഥികൂടം പുരുഷന്റേതാണെന്നാണ് പ്രാഥമിക സംശയം.
അതേസമയം, അസ്ഥികൂടത്തിന്റെ വ്യക്തമായ തിരിച്ചറിയലിനും മരണവുമായി ബന്ധപ്പെട്ട വിവരങ്ങൾക്കും ഫോറൻസിക് പരിശോധനാഫലം നിർണായകമാകും.
എട്ടുമാസം മുൻപ് കാണാതായ വ്യക്തിയാണോ?
More Read
എട്ടുമാസം മുൻപ് തിരുവനന്തപുരം കൺടോൺമെന്റ് പൊലീസ് സ്റ്റേഷൻ പരിധിയിൽ നിന്ന് കാണാതായ വ്യക്തിയുടേതാണോ അസ്ഥികൂടമെന്ന സംശയവും പൊലീസിനുണ്ട്.
എന്നാൽ ഫോറൻസിക് പരിശോധനാഫലം പുറത്തുവരാതെ ഇക്കാര്യം സ്ഥിരീകരിക്കാനാകില്ലെന്ന് പൊലീസ് വ്യക്തമാക്കുന്നു. സംഭവത്തിൽ മറ്റ് നിയമനടപടികളും അന്വേഷണവും പുരോഗമിക്കുകയാണ്.
English Summary:
A human skeleton, suspected to belong to a man, was found in an unfinished apartment complex at Nanthancode in Thiruvananthapuram. Workers discovered it while clearing the overgrown premises ahead of the resumption of construction. Police and forensic experts examined the site. Investigators suspect it could belong to a person who went missing from the Cantonment Police Station limits eight months ago, but confirmation is pending forensic results.
