കൊച്ചിയിൽ അമിത ശബ്ദമുണ്ടാക്കി ചീറിപ്പായുന്ന വാഹനങ്ങൾക്കും നിയമവിരുദ്ധമായി രൂപമാറ്റം വരുത്തിയ വാഹനങ്ങൾക്കുമെതിരെ മോട്ടോർ വാഹന വകുപ്പിന്റെ നടപടി. ‘ഓപ്പറേഷൻ നൈറ്റ് ഹണ്ട്’ എന്ന പ്രത്യേക രാത്രികാല പരിശോധനയിൽ 60 വാഹനങ്ങൾക്കെതിരെ നടപടിയെടുത്തു. നിയമലംഘകരിൽനിന്ന് ആകെ 2,74,500 രൂപ പിഴ ഈടാക്കി.
ഓപ്പറേഷൻ നൈറ്റ് ഹണ്ട്; 60 വാഹനങ്ങൾക്കെതിരെ നടപടി
നവംബർ 5-ന് രാത്രി എട്ടിന് ആരംഭിച്ച പരിശോധന നവംബർ 6 പുലർച്ചെ 5.30 വരെ നീണ്ടു. എംവിഡി ആർടിഒ എൻഫോഴ്‌സ്‌മെന്റിന്റെ നേതൃത്വത്തിൽ നാല് സ്ക്വാഡുകളായി തിരിഞ്ഞായിരുന്നു പരിശോധന.
നഗരത്തിന്റെ വിവിധ ഭാഗങ്ങളിലായി നൂറിലധികം വാഹനങ്ങൾ പരിശോധിച്ചു. ഇതിൽ നിയമലംഘനം കണ്ടെത്തിയ 60 വാഹനങ്ങൾക്കെതിരെയാണ് നടപടി സ്വീകരിച്ചത്.
അനധികൃത സൈലൻസറും ലൈറ്റ് മാറ്റങ്ങളും കുടുങ്ങി
വാഹനങ്ങളിൽ നിയമവിരുദ്ധമായി വരുത്തിയ മാറ്റങ്ങളാണ് പരിശോധനയിൽ പ്രധാനമായും കണ്ടെത്തിയത്. അനധികൃത സൈലൻസർ മാറ്റങ്ങൾ, നിയമവിരുദ്ധമായ ലൈറ്റുകൾ, നമ്പർ പ്ലേറ്റ് മറച്ചുവെക്കൽ തുടങ്ങിയവയ്ക്കെതിരെ നടപടിയെടുത്തു.
ഇതിനുപുറമെ ഹെൽമെറ്റ് ധരിക്കാതെ യാത്ര ചെയ്യുക, പുക പരിശോധനാ സർട്ടിഫിക്കറ്റ് ഇല്ലാതെ വാഹനം ഓടിക്കുക, ഇരുചക്രവാഹനങ്ങളിൽ മൂന്നുപേർ യാത്ര ചെയ്യുക തുടങ്ങിയ നിയമലംഘനങ്ങളും കണ്ടെത്തി.
രാത്രികാല പരിശോധന തുടരുമെന്ന് എംവിഡി
More Read
രാത്രികാലങ്ങളിൽ അമിത ശബ്ദമുണ്ടാക്കി പൊതുജനങ്ങൾക്ക് ബുദ്ധിമുട്ടുണ്ടാക്കുന്ന വാഹനങ്ങൾക്കെതിരെയും ഗതാഗതനിയമങ്ങൾ ലംഘിക്കുന്നവർക്കെതിരെയും പരിശോധന ശക്തമാക്കാനാണ് മോട്ടോർ വാഹന വകുപ്പിന്റെ തീരുമാനം.
അനധികൃതമായി സൈലൻസറുകൾ മാറ്റി വലിയ ശബ്ദമുണ്ടാക്കുന്ന ബൈക്കുകൾ, രൂപമാറ്റം വരുത്തിയ വാഹനങ്ങൾ, നിയമവിരുദ്ധ ലൈറ്റുകൾ ഘടിപ്പിച്ച വാഹനങ്ങൾ എന്നിവയാണ് ഓപ്പറേഷൻ നൈറ്റ് ഹണ്ടിന്റെ പ്രധാന പരിശോധനാ ലക്ഷ്യം. വരും ദിവസങ്ങളിലും ഇത്തരം പരിശോധനകൾ തുടരും.
English Summary:
The Motor Vehicles Department (MVD) took action against 60 vehicles during a special night inspection drive, Operation Night Hunt, in Kochi. The department collected a total fine of ₹2,74,500. More than 100 vehicles were inspected between 8 pm on November 5 and 5:30 am on November 6. Violations included illegal silencer modifications, unauthorised lighting changes, riding without helmets, missing pollution certificates, triple riding and concealed number plates. The MVD said strict inspections will continue.
