ജന്മനാ അസ്ഥിരോഗം ബാധിച്ച കൊടനാട് അഭയാരണ്യത്തിലെ കുട്ടിയാന മായയ്ക്ക് വിദഗ്ധ ചികിത്സയ്ക്കായി പുതിയ പ്രതീക്ഷ. ദയാവധം നിർദേശിക്കപ്പെട്ടിരുന്ന മായയെ തുടർ വൈദ്യപരിശോധനയ്ക്കും ചികിത്സയ്ക്കുമായി ഗുജറാത്തിലെ ജാംനഗറിലുള്ള വൻതാരയിലേക്ക് മാറ്റി. വൻതാര ഫൗണ്ടേഷൻ ചാർട്ടർ ചെയ്ത പ്രത്യേക വിമാനത്തിലാണ് കുട്ടിയാനയുടെ യാത്ര.
കുട്ടിയാന മായയ്ക്ക് പ്രത്യേക വിമാനയാത്ര
നവംബർ ആറിന് വെള്ളിയാഴ്ച ഉച്ചയ്ക്ക് 1.30ഓടെയാണ് വിമാനം കൊച്ചി അന്താരാഷ്ട്ര വിമാനത്താവളത്തിൽനിന്ന് പുറപ്പെട്ടത്. സുരക്ഷിതമായ യാത്രയ്ക്കായി കൊച്ചി അന്താരാഷ്ട്ര വിമാനത്താവളത്തിലെ സിയാൽ എയർ കാർഗോ വിഭാഗം പ്രത്യേക ക്രമീകരണങ്ങൾ ഒരുക്കി.
സിയാലിന്റെ ആഭ്യന്തര കാർഗോ ടെർമിനലിലാണ് മായയുടെ വിമാനയാത്രയ്ക്കുള്ള സൗകര്യങ്ങൾ ഒരുക്കിയത്. പ്രത്യേകമായി സജ്ജീകരിച്ച കൂട്ടിലാണ് കുട്ടിയാനയെ വിമാനത്തിലേക്ക് മാറ്റിയത്.
ദയാവധം നിർദേശിച്ച ആനയ്ക്ക് ചികിത്സാ പ്രതീക്ഷ
ജന്മനാ അസ്ഥിരോഗമുള്ള മായയ്ക്ക് നേരത്തെ ദയാവധം നിർദേശിച്ചിരുന്നു. ഈ വിവരം അറിഞ്ഞതിനെത്തുടർന്നാണ് വൻതാര അധികൃതർ ഇടപെട്ടത്. തുടർ വൈദ്യപരിശോധനയ്ക്കും വിദഗ്ധ ചികിത്സയ്ക്കുമായി കുട്ടിയാനയെ ഏറ്റെടുക്കുകയായിരുന്നു.
വിമാനയാത്രയ്ക്കുള്ള ചെലവ് പൂർണമായും വൻതാരയാണ് വഹിച്ചത്. മായയുടെ ആരോഗ്യനില പരിഗണിച്ച് യാത്രയ്ക്ക് മുമ്പും വിമാനത്തിനുള്ളിലും വെറ്ററിനറി സംഘം നിരീക്ഷണം നടത്തി.
വനംവകുപ്പ് സംഘവും യാത്രയെ അനുഗമിച്ചു
More Read
മായയുടെ സുരക്ഷിതമായ യാത്ര ഉറപ്പാക്കാൻ വനംവകുപ്പിന്റെ പ്രത്യേക സംഘവും ഒപ്പമുണ്ടായിരുന്നു. സിയാൽ എയർപോർട്ട് ഡയറക്ടർ മനു ജി., കാർഗോ വിഭാഗം മേധാവി സതീഷ് ജെ. പൈ എന്നിവർ ആഭ്യന്തര കാർഗോ ടെർമിനലിലെത്തി ക്രമീകരണങ്ങൾ വിലയിരുത്തി.
വനംവകുപ്പ്, വൻതാര പ്രതിനിധികൾ, വെറ്ററിനറി ഡോക്ടർമാർ, മറ്റ് ഉദ്യോഗസ്ഥർ എന്നിവരും യാത്രാ നടപടികളുടെ ഏകോപനത്തിനായി സ്ഥലത്തെത്തി.
English Summary:
Maya, a young elephant with a congenital bone disorder from Kodanad Abhayaranyam, was flown to Vantara in Jamnagar, Gujarat, for expert medical evaluation and treatment. A special chartered aircraft arranged by the Vantara Foundation departed from Cochin International Airport at around 1:30 pm on November 6, 2026. CIAL’s Air Cargo division made special arrangements for the elephant’s safe transportation. A veterinary team monitored Maya before and during the flight, while a special Forest Department team accompanied her. Vantara covered the cost of the air journey.
