ബ്രിട്ടീഷ് നടൻ റോബർട്ട് പാറ്റിൻസൺ പുതിയ ജെയിംസ് ബോണ്ടായി എത്തും. ഡാനിയൽ ക്രെയ്ഗിന് പിൻഗാമിയായാണ് 40കാരനായ പാറ്റിൻസൺ 007 കഥാപാത്രത്തെ അവതരിപ്പിക്കുന്നത്.
കാലം ടേണർ, ജാക്ക് ലോഡൻ, ജോഷ് ഒ’കോണർ, നിക്കോളാസ് ഹോൾട്ട് തുടങ്ങിയ ബ്രിട്ടീഷ് താരങ്ങളെ പിന്നിലാക്കിയാണ് പാറ്റിൻസൺ തിരഞ്ഞെടുക്കപ്പെട്ടത്.
ഒക്ടോബർ അവസാനത്തോടെ പാറ്റിൻസണും നിക്കോളാസ് ഹോൾട്ടും സ്ക്രീൻ ടെസ്റ്റിൽ പങ്കെടുത്തിരുന്നു.പുതിയ ബോണ്ടിനെ കണ്ടെത്തുന്നതിനുള്ള ഓഡിഷൻ സംവിധായകൻ ഡെനിസ് വില്ലെന്യൂവിന്റെ നേതൃത്വത്തിലായിരുന്നു.
ഇഒഎൻ പ്രൊഡക്ഷൻസ് നിർമിക്കുന്ന ഔദ്യോഗിക ബോണ്ട് സിനിമകളിൽ 007 ആയി എത്തുന്ന ഏഴാമത്തെ നടനാകും പാറ്റിൻസൺ.
ഏഴാമത്തെ ബോണ്ട് നടൻ
ഷോൺ കോണറി, ജോർജ് ലേസൻബി, റോജർ മൂർ, തിമോത്തി ഡാൽട്ടൺ, പിയേഴ്സ് ബ്രോസ്നൻ, ഡാനിയൽ ക്രെയ്ഗ് എന്നിവരാണ് പാറ്റിൻസണിന് മുമ്പ് ബോണ്ട് കഥാപാത്രത്തെ അവതരിപ്പിച്ചവർ.
40-ാം വയസ്സിലാണ് പാറ്റിൻസൺ 007 വേഷത്തിലെത്തുന്നത്.അതേസമയം, ഏറ്റവും പ്രായം കുറഞ്ഞ ബോണ്ട് നടനെന്ന റെക്കോർഡ് പാറ്റിൻസണിന് സ്വന്തമാകില്ല.
1969ൽ പുറത്തിറങ്ങിയ ‘ഓൺ ഹെർ മജസ്റ്റീസ് സീക്രട്ട് സർവീസ്’ ചിത്രീകരിക്കുമ്പോൾ 29 വയസ്സുണ്ടായിരുന്ന ജോർജ് ലേസൻബിക്കാണ് ഈ റെക്കോർഡ്.
ഹാരി പോട്ടറിൽ നിന്ന് ബാറ്റ്മാനിലേക്ക്
1986 മേയ് 13ന് ലണ്ടനിലാണ് റോബർട്ട് ഡഗ്ലസ് തോമസ് പാറ്റിൻസൺ ജനിച്ചത്. കുട്ടിക്കാലത്ത് സംഗീതത്തിലായിരുന്നു അദ്ദേഹത്തിന് കൂടുതൽ താൽപ്പര്യം.
പിയാനോയും ഗിറ്റാറും അഭ്യസിച്ച പാറ്റിൻസൺ കൗമാരകാലത്ത് ഒരു പ്രാദേശിക നാടകസംഘത്തിൽ ചേർന്നതോടെയാണ് അഭിനയത്തിലേക്ക് തിരിഞ്ഞത്.
2005ൽ പുറത്തിറങ്ങിയ ‘ഹാരി പോട്ടർ ആൻഡ് ദ ഗോബ്ലറ്റ് ഓഫ് ഫയർ’ എന്ന ചിത്രത്തിലെ സെഡ്രിക് ഡിഗറിയുടെ വേഷമാണ് പാറ്റിൻസന്റെ കരിയറിൽ വഴിത്തിരിവായത്.
പിന്നീട് ‘ട്വൈലൈറ്റ്’ സിനിമാ പരമ്പരയിലൂടെ അദ്ദേഹം ആഗോളതലത്തിൽ ശ്രദ്ധ നേടി. 2008 മുതൽ 2012 വരെ പുറത്തിറങ്ങിയ ചിത്രങ്ങളിൽ എഡ്വേർഡ് എന്ന വാംപയർ കഥാപാത്രത്തെയാണ് പാറ്റിൻസൺ അവതരിപ്പിച്ചത്.
കൗമാരക്കാരുടെ പ്രിയതാരം എന്ന പ്രതിച്ഛായയിൽ മാത്രം ഒതുങ്ങാതെ സ്വതന്ത്ര സിനിമകളിലേക്കും വ്യത്യസ്ത കഥാപാത്രങ്ങളിലേക്കും പാറ്റിൻസൺ ചുവടുമാറ്റി.
‘ഗുഡ് ടൈം’ (2017), ‘ദ ലൈറ്റ്ഹൗസ്’ (2019) തുടങ്ങിയ ചിത്രങ്ങളിലെ പ്രകടനങ്ങൾ ശ്രദ്ധിക്കപ്പെട്ടു. ക്രിസ്റ്റഫർ നോളന്റെ ‘ടെനെറ്റ്’ (2020) എന്ന സയൻസ് ഫിക്ഷൻ ത്രില്ലറിലും അദ്ദേഹം പ്രധാന വേഷത്തിലെത്തി.
2022ൽ മാറ്റ് റീവ്സ് സംവിധാനം ചെയ്ത ‘ദ ബാറ്റ്മാൻ’ എന്ന ചിത്രത്തിൽ ബ്രൂസ് വെയ്നായി പാറ്റിൻസൺ എത്തി. ഇപ്പോഴിതാ സിനിമാ ലോകത്തെ മറ്റൊരു ഐക്കോണിക് കഥാപാത്രമായ ജെയിംസ് ബോണ്ടിന്റെ വേഷമാണ് അദ്ദേഹത്തെ തേടിയെത്തിയിരിക്കുന്നത്.
ഡെനിസ് വില്ലെന്യൂവിന്റെ ബോണ്ട് ചിത്രം
ബോണ്ട് ഫ്രാഞ്ചൈസിയുടെ ചരിത്രത്തിലും പാറ്റിൻസന്റെ വരവ് നിർണായകമാണ്. എംജിഎമ്മിനെ ഏറ്റെടുത്തതിന് പിന്നാലെ ഫ്രാഞ്ചൈസിയുടെ സൃഷ്ടിപരമായ നിയന്ത്രണം ആമസോൺ എംജിഎം സ്റ്റുഡിയോസിലേക്ക് മാറിയ ശേഷമുള്ള ആദ്യ ബോണ്ട് ചിത്രമായിരിക്കും ഇത്.
ദീർഘകാലമായി ബോണ്ട് സിനിമകളുടെ പിന്നിൽ പ്രവർത്തിച്ചിരുന്ന ബാർബറയും മൈക്കൽ ജി. വിൽസണും 2025ൽ ഫ്രാഞ്ചൈസിയുടെ ക്രിയേറ്റീവ് നിയന്ത്രണം കൈമാറിയിരുന്നു.
ഏമി പാസ്കലും ഡേവിഡ് ഹെയ്മാനുമാണ് ഇപ്പോൾ നിർമാണച്ചുമതല വഹിക്കുന്നത്. ‘ഡ്യൂൺ’, ‘അറൈവൽ’, ‘ബ്ലേഡ് റണ്ണർ 2049’ തുടങ്ങിയ ചിത്രങ്ങളിലൂടെ ശ്രദ്ധേയനായ ഡെനിസ് വില്ലെന്യൂവാണ് പുതിയ ബോണ്ട് ചിത്രം സംവിധാനം ചെയ്യുന്നത്.
‘പീക്കി ബ്ലൈൻഡേഴ്സ്’ സൃഷ്ടിച്ച സ്റ്റീവൻ നൈറ്റാണ് തിരക്കഥ ഒരുക്കുന്നത്.ഡാനിയൽ ക്രെയ്ഗിന് ശേഷം പുതിയ 007ഡാനിയൽ ക്രെയ്ഗിന്റെ അവസാന ബോണ്ട് ചിത്രമായ ‘നോ ടൈം ടു ഡൈ’ (2021)ക്ക് ശേഷമാണ് പുതിയ ചിത്രം എത്തുന്നത്.
2006ൽ പുറത്തിറങ്ങിയ ‘കാസിനോ റോയൽ’ മുതൽ അഞ്ച് ചിത്രങ്ങളിൽ ക്രെയ്ഗ് 007 ആയി വേഷമിട്ടിരുന്നു.ഇപ്പോൾ റോബർട്ട് പാറ്റിൻസണിലൂടെയാണ് ബോണ്ട് ഫ്രാഞ്ചൈസി പുതിയ അധ്യായത്തിലേക്ക് കടക്കുന്നത്.
ലോകസിനിമയിലെ പ്രശസ്ത ചാരകഥാപാത്രത്തിന് പുതിയൊരു മുഖവും ഭാവവും നൽകാനുള്ള ശ്രമത്തിന്റെ ഭാഗമായാണ് പാറ്റിൻസന്റെ വരവ്.
English Summary : Robert Pattinson has been officially selected as the new James Bond, succeeding Daniel Craig as Agent 007. The 40-year-old British actor was chosen after screen tests and will become the seventh actor to play Bond in the official EON Productions film series. Denis Villeneuve will direct the new Bond film, with Steven Knight writing the screenplay.
