റാഞ്ചി: ഡിജിറ്റൽ മാധ്യമങ്ങളുടെ ശക്തി ദുരുപയോഗം ചെയ്ത് യുവാക്കളെ തെറ്റായ വഴിയിലേക്ക് നയിക്കാൻ അനുവദിക്കില്ലെന്ന് ബിജെപി ദേശീയ മേധാവി നിതിൻ നബിൻ. ജാർഖണ്ഡിലെ റാഞ്ചിയിൽ നടന്ന പാർട്ടി പരിപാടിയിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
ഡൽഹിയിൽ നടന്ന കോക്രോച്ച് ജനതാ പാർട്ടിയുടെ പ്രതിഷേധ പരിപാടിയെ പരോക്ഷമായി പരാമർശിച്ച നിതിൻ നബിൻ, രാജ്യത്തെ യുവാക്കളെ നെഗറ്റീവ് രാഷ്ട്രീയത്തിലേക്ക് വലിച്ചിഴക്കാനുള്ള ശ്രമങ്ങൾ വിജയിക്കില്ലെന്ന് പറഞ്ഞു.
“ഇന്ത്യയുടെ വളർച്ചയും പുരോഗതിയും യുവാക്കളുടെ അധ്വാനത്തിലും കഴിവിലുമാണ് അധിഷ്ഠിതമായിരിക്കുന്നത്. അതിനാൽ യുവജനങ്ങളെ തെറ്റായ രാഷ്ട്രീയ അജണ്ടകളിലേക്ക് നയിക്കാൻ ശ്രമിക്കുന്നവർക്ക് രാജ്യം മറുപടി നൽകും. ജനാധിപത്യത്തിൽ പ്രതിഷേധത്തിന് അവകാശമുണ്ടെങ്കിലും ജനാധിപത്യത്തിന്റെ മൂല്യങ്ങൾ തകർക്കാൻ അനുവദിക്കില്ല,” അദ്ദേഹം പറഞ്ഞു.
ചിലർ വിദേശത്ത് ഇരുന്നുകൊണ്ട് ഇന്ത്യയിലെ യുവാക്കൾക്ക് ദിശാബോധം നൽകാൻ ശ്രമിക്കുന്നുവെന്നും എന്നാൽ ഇന്ത്യൻ യുവാക്കൾ ഗ്രാമങ്ങളിലും വിദ്യാഭ്യാസ സ്ഥാപനങ്ങളിലും സമൂഹത്തിനിടയിലും ജീവിച്ചാണ് രാജ്യനിർമാണത്തിൽ പങ്കാളികളാകുന്നതെന്നും അദ്ദേഹം ചൂണ്ടിക്കാട്ടി.
ഡിജിറ്റൽ മാധ്യമങ്ങൾ രാജ്യവികസനത്തിനും യുവജനശാക്തീകരണത്തിനും ഉപയോഗിക്കേണ്ടതാണെന്നും എന്നാൽ ചിലർ അതിനെ സമൂഹത്തിൽ ആശയക്കുഴപ്പവും നിരാശയും സൃഷ്ടിക്കാൻ ഉപയോഗിക്കുന്നതായും അദ്ദേഹം ആരോപിച്ചു.
More Read
രാജ്യത്തെ യുവജനങ്ങൾ വികസിത ഇന്ത്യയുടെ സ്വപ്നസാക്ഷാത്കാരത്തിനായി ഒരുമിച്ച് പ്രവർത്തിക്കണമെന്നും ഡിജിറ്റൽ പ്ലാറ്റ്ഫോമുകൾ സൃഷ്ടിപരമായ മാറ്റങ്ങൾക്ക് ഉപയോഗിക്കണമെന്നും നിതിൻ നബിൻ ആഹ്വാനം ചെയ്തു.
English Summary:
BJP national leader Nitin Nabin said that digital platforms should not be misused to push Indian youth in a negative direction. Speaking at a party event in Ranchi, he criticized attempts to influence young people through disruptive political campaigns and emphasized that India’s youth would continue to support constructive and development-oriented politics.
