വയനാട് ജില്ലയിൽ ഷിഗെല്ല രോഗബാധ പടരുന്ന സാഹചര്യത്തിൽ പ്രതിരോധ പ്രവർത്തനങ്ങളും നിരീക്ഷണങ്ങളും ആരോഗ്യവകുപ്പ് ശക്തമാക്കിയിരിക്കുകയാണ്. ഏറ്റവും പുതിയതായി ജില്ലയിൽ ഒരു കുട്ടിക്ക് കൂടി ഷിഗെല്ല സ്ഥിരീകരിച്ചതോടെ ഇവിടുത്തെ ആകെ രോഗബാധിതരുടെ എണ്ണം ഒമ്പതായി ഉയർന്നു.
രോഗബാധയുടെ പശ്ചാത്തലത്തിൽ പകർച്ചവ്യാധി നിരീക്ഷണവും പ്രതിരോധ നിയന്ത്രണ ബോധവത്കരണ പ്രവർത്തനങ്ങളും ജില്ലയിലെ മുഴുവൻ പ്രദേശങ്ങളിലേക്കും വ്യാപിപ്പിച്ചതായി ജില്ലാ മെഡിക്കൽ ഓഫീസർ ഡോക്ടർ കെ.ടി രേഖ വ്യക്തമാക്കുന്നു. നിലവിൽ രോഗം സ്ഥിരീകരിച്ച് ചികിത്സയിൽ കഴിയുന്ന എല്ലാവരുടെയും ആരോഗ്യനില തൃപ്തികരമാണെന്നത് ആശ്വാസം പകരുന്ന കാര്യമാണ്.
ഇതുവരെ ജില്ലയിൽ അഞ്ഞൂറിലധികം ആളുകളിലാണ് രോഗലക്ഷണങ്ങൾ കണ്ടെത്തിയിട്ടുള്ളത്. പുതിയതായി പത്തുപേരെ കൂടി ആശുപത്രിയിൽ പ്രവേശിപ്പിച്ചതോടെ നിലവിൽ വിവിധ ആശുപത്രികളിലായി നാൽപ്പത്തിയഞ്ചോളം പേർ ചികിത്സയിൽ കഴിയുന്നുണ്ട്.
രോഗവ്യാപനം തടയുന്നതിനായി ആരോഗ്യപ്രവർത്തകർ രണ്ടായിരത്തിലധികം വീടുകൾ നേരിട്ട് സന്ദർശിച്ച് ഫീൽഡ് തല രോഗനിരീക്ഷണ പ്രവർത്തനങ്ങൾ നടത്തിക്കഴിഞ്ഞു. ഇതിന്റെ ഭാഗമായി ആയിരത്തിലധികം കിണറുകൾ ക്ലോറിനേറ്റ് ചെയ്യുകയും ഒആർഎസ് പാക്കറ്റുകൾ വിതരണം ചെയ്യുകയും ചെയ്തു. നിലവിൽ രോഗബാധ റിപ്പോർട്ട് ചെയ്ത സ്ഥലങ്ങളിലും മറ്റ് പ്രദേശങ്ങളിലും മൈക്ക് അനൗൺസ്മെന്റും ബോധവത്കരണ ക്ലാസുകളും തുടരുകയാണ്.
രോഗലക്ഷണങ്ങളുമായി എത്തുന്നവരെക്കുറിച്ചുള്ള വിവരങ്ങൾ കൃത്യമായി കൈമാറാൻ സ്വകാര്യ ആശുപത്രികൾക്കും ക്ലിനിക്കുകൾക്കും ആരോഗ്യവകുപ്പ് കർശന നിർദ്ദേശം നൽകിയിട്ടുണ്ട്. മെഡിക്കൽ ഷോപ്പുകളിൽ നിന്നും ഡോക്ടറുടെ കുറിപ്പടി ഇല്ലാതെ ഇത്തരം രോഗികൾക്ക് മരുന്ന് നൽകരുതെന്നും നിർദ്ദേശമുണ്ട്.
More Read
രോഗബാധ റിപ്പോർട്ട് ചെയ്ത സ്കൂളിലെ വിദ്യാർത്ഥികൾക്ക് നിലവിൽ അവധി പ്രഖ്യാപിച്ചിരിക്കുകയാണ്. കുട്ടികൾ വീട്ടിൽ സുരക്ഷിതരാണോ എന്ന് ഉറപ്പുവരുത്താൻ ഷിഗെല്ല കൺട്രോൾ സെല്ലിൽ നിന്നും ഫോൺ വഴി ഇവരുടെ ആരോഗ്യസ്ഥിതി നിരീക്ഷിക്കുന്നുണ്ട്. കുട്ടികൾ മറ്റുള്ളവരുമായുള്ള സമ്പർക്കം പരമാവധി കുറയ്ക്കണമെന്നും രോഗം മുതിർന്നവരിലേക്ക് പകരുന്നത് തടയാൻ മുൻകരുതലുകൾ എടുക്കണമെന്നും അധികൃതർ ഓർമ്മിപ്പിച്ചു.
രക്തം കലർന്നതോ അല്ലാത്തതോ ആയ വയറിളക്കം, കടുത്ത വയറുവേദന, പനി, ഛർദ്ദി, ക്ഷീണം എന്നിവയാണ് ഷിഗെല്ലയുടെ പ്രധാന ലക്ഷണങ്ങൾ. മലിനമായ ഭക്ഷണത്തിലൂടെയും വെള്ളത്തിലൂടെയും കൈകൾ വൃത്തിയായി കഴുകാതെ ഭക്ഷണം കഴിക്കുന്നതിലൂടെയുമാണ് ഈ രോഗം പ്രധാനമായും പകരുന്നത്.
രോഗം വന്ന് ചികിത്സിക്കുന്നതിനേക്കാൾ മുൻകൂട്ടി പ്രതിരോധിക്കുന്നതിനാണ് പ്രാധാന്യം നൽകേണ്ടതെന്ന് ആരോഗ്യവകുപ്പ് ഓർമ്മിപ്പിക്കുന്നു. നീർജലീകരണ ലക്ഷണങ്ങൾ കണ്ടാൽ സ്വയം ചികിത്സ ഒഴിവാക്കി ഉടൻ തന്നെ അടുത്തുള്ള സർക്കാർ ആരോഗ്യ കേന്ദ്രങ്ങളിൽ ചികിത്സ തേടാൻ പൊതുജനങ്ങൾ ശ്രദ്ധിക്കേണ്ടതാണ്.
More Read
വ്യക്തിശുചിത്വവും പരിസരശുചിത്വവും പാലിക്കുന്നതിലൂടെ ഒരു പരിധി വരെ ഈ രോഗത്തെ തടഞ്ഞുനിർത്താൻ സാധിക്കും. ഭക്ഷണം കഴിക്കുന്നതിന് മുൻപും ശൗചാലയം ഉപയോഗിച്ചതിന് ശേഷവും കൈകൾ സോപ്പുപയോഗിച്ച് നന്നായി കഴുകണം.
തിളപ്പിച്ചാറ്റിയ വെള്ളം മാത്രം കുടിക്കാനും പഴങ്ങളും പച്ചക്കറികളും പാചകം ചെയ്യുന്നതിന് മുൻപ് നന്നായി കഴുകാനും ശ്രദ്ധിക്കണം. രോഗലക്ഷണങ്ങൾ ഉള്ളവർ യാതൊരു കാരണവശാലും മറ്റുള്ളവർക്കായി ഭക്ഷണം പാകം ചെയ്യരുത്. ആരോഗ്യ വകുപ്പ് പുറപ്പെടുവിച്ചിട്ടുള്ള ജാഗ്രതാ നിർദ്ദേശങ്ങൾ പൊതുജനങ്ങൾ കർശനമായി പാലിക്കണമെന്ന് ജില്ലാ മെഡിക്കൽ ഓഫീസർ അറിയിച്ചു.
English Summary
A new case of Shigella has been confirmed in a child in Wayanad, bringing the total count to nine. The health department has intensified preventive measures, including chlorinating wells and inspecting houses, while advising schools and pharmacies to stay vigilant against the spreading symptoms.
