ന്യൂയോർക്ക്: ഫിഫ ലോകകപ്പിൽ മുൻ ചാമ്പ്യൻമാരായ ഫ്രാൻസ് വിജയത്തോടെ കുതിപ്പ് തുടങ്ങി. ഗ്രൂപ്പ് ഐയിലെ ആദ്യ മത്സരത്തിൽ അട്ടിമറി സ്വപ്നവുമായി ഇറങ്ങിയ സെനഗലിനെ ഒന്നിനെതിരെ മൂന്ന് ഗോളുകൾക്കാണ് ഫ്രഞ്ച് പട കീഴടക്കിയത്. രണ്ടാം പകുതിയിൽ പിറന്ന ഇരട്ടഗോളുകളുമായി ക്യാപ്റ്റൻ കിലിയൻ എംബാപ്പെ ഫ്രാൻസിന്റെ വിജയശിൽപിയായി.
ആദ്യ പകുതിയിൽ മികച്ച പ്രകടനം പുറത്തെടുത്തത് സെനഗലായിരുന്നു. നിക്കോളാസ് ജാക്സണും ഇസ്മായില സാറും ഉൾപ്പെടെയുള്ള താരങ്ങൾക്ക് ലഭിച്ച അവസരങ്ങൾ മുതലാക്കാൻ കഴിയാതിരുന്നതാണ് ആഫ്രിക്കൻ ടീമിന് തിരിച്ചടിയായത്. 26-ാം മിനിറ്റിൽ ജാക്സന്റെ ഷോട്ട് പോസ്റ്റിൽ തട്ടി മടങ്ങിയപ്പോൾ, ആദ്യ പകുതിയുടെ അവസാന നിമിഷത്തിൽ ഗോളിക്കു മുന്നിൽ നിന്നുള്ള സുവർണാവസരം ഇസ്മായില സാർ നഷ്ടപ്പെടുത്തി.
രണ്ടാം പകുതിയിൽ ശക്തമായി തിരിച്ചുവന്ന ഫ്രാൻസ് 66-ാം മിനിറ്റിൽ എംബാപ്പെയിലൂടെ ലീഡ് സ്വന്തമാക്കി. മൈക്കൽ ഒലിസെയുടെ പാസിൽ നിന്നായിരുന്നു ഫ്രഞ്ച് നായകന്റെ ആദ്യ ഗോൾ. തുടർന്ന് 82-ാം മിനിറ്റിൽ പകരക്കാരനായി ഇറങ്ങിയ ബ്രാഡ്ലി ബാർകോല ഫ്രാൻസിന്റെ ലീഡ് ഇരട്ടിയാക്കി.
മത്സരത്തിന്റെ ഇഞ്ചുറി ടൈമിൽ സെനഗലിനായി ഇബ്രാഹിം എംബായെ ഒരു ഗോൾ മടക്കിയെങ്കിലും, തൊട്ടുപിന്നാലെ എംബാപ്പെ വീണ്ടും ലക്ഷ്യം കണ്ടതോടെ ഫ്രാൻസ് 3-1ന്റെ ആധികാരിക വിജയത്തോടെ ടൂർണമെന്റിന് തുടക്കമിട്ടു.
ആദ്യ പകുതിയിൽ സമ്മർദത്തിലായിരുന്നെങ്കിലും രണ്ടാം പകുതിയിലെ മികവാർന്ന പ്രകടനമാണ് ഫ്രാൻസിന് നിർണായക വിജയമൊരുക്കിയത്.
More Read
English Summary:
France opened their FIFA World Cup campaign with a convincing 3-1 victory over Senegal in Group I. Captain Kylian Mbappe starred with two goals, while Bradley Barcola added another. Senegal dominated the first half but failed to convert their chances, allowing France to take control after the break.
