ഫുട്ബോൾ സ്പോൺസർഷിപ്പ് കേസ്; വി. അബ്ദുറഹ്മാനെ പ്രോസിക്യൂട്ട് ചെയ്യാൻ ഗവർണറുടെ അനുമതി

തിരുവനന്തപുരം: ഫുട്ബോൾ സ്പോൺസർഷിപ്പ് തട്ടിപ്പ് കേസിൽ മുൻ കായികമന്ത്രി വി. അബ്ദുറഹ്മാനെ പ്രോസിക്യൂട്ട് ചെയ്യാൻ ഗവർണർ ഓംപ്രകാശ് മാഥൂർ അനുമതി നൽകി. സർക്കാരിന്റെയും മുഖ്യമന്ത്രിയുടെയും ആവശ്യപ്രകാരമാണ് രാജ്ഭവന്റെ നടപടി. അനുമതി ലഭിച്ചതോടെ കേസിൽ തുടർ നിയമനടപടികളുമായി പ്രത്യേക അന്വേഷണ സംഘത്തിന് (എസ്.ഐ.ടി) മുന്നോട്ടുപോകാം.

നിയമോപദേശം തേടിയശേഷം ഗവർണറുടെ തീരുമാനം

മുൻ ഗവർണർ രാജേന്ദ്ര അർലേക്കറുടെ കാലത്ത് സമർപ്പിച്ച ഫയലാണ് നിലവിലെ ഗവർണർ വിശദമായി പരിശോധിച്ചത്. നിയമോപദേശം തേടിയ ശേഷമാണ് പ്രോസിക്യൂഷൻ അനുമതി നൽകിയത്.

മുൻ ഗവർണറുടെ കാലത്ത് ഫയലിൽ അന്തിമ തീരുമാനമെടുത്തിരുന്നില്ല. വിഷയം പഠിച്ചുവരികയാണെന്നായിരുന്നു അന്നത്തെ നിലപാട്. എന്നാൽ പുതിയ ഗവർണറായി ചുമതലയേറ്റ ഓംപ്രകാശ് മാഥൂർ ഫയൽ പരിശോധിച്ച് തുടർനടപടി സ്വീകരിക്കുകയായിരുന്നു.

അഞ്ചുപേരെ പ്രതിചേർക്കാൻ എസ്.ഐ.ടി നീക്കം

വിശദമായ അന്വേഷണത്തിനുശേഷം എസ്.ഐ.ടി സമർപ്പിച്ച റിപ്പോർട്ടിൽ വി. അബ്ദുറഹ്മാനെ കൂടാതെ റിപ്പോർട്ടർ ബ്രോഡ്കാസ്റ്റിങ് കമ്പനി ഉടമ ആന്റോ അഗസ്റ്റിൻ, യു. ഷറഫലി, സി. സത്യപാലൻ എന്നിവരടക്കം അഞ്ചുപേരെ പ്രതിചേർക്കാൻ അനുമതി തേടിയിരുന്നു.

ഗവർണറുടെ അനുമതി ലഭിച്ചതോടെ മുൻ മന്ത്രിയെ ഔദ്യോഗികമായി പ്രതിചേർക്കുന്നതിനും ചോദ്യംചെയ്യൽ ഉൾപ്പെടെയുള്ള തുടർനടപടികൾക്കും അന്വേഷണ സംഘത്തിന് വഴിതുറന്നു. അറസ്റ്റ് ഉൾപ്പെടെയുള്ള നടപടികൾ നിയമാനുസൃതമായ തുടർനടപടികൾക്കും അന്വേഷണത്തിനും വിധേയമായിരിക്കും.

ടെൻഡർ നടപടികളിൽ ക്രമക്കേടെന്ന് എസ്.ഐ.ടി

മാനദണ്ഡങ്ങളും നടപടിക്രമങ്ങളും ലംഘിച്ച് അനധികൃതമായി ടെൻഡർ നൽകി റിപ്പോർട്ടർ ബ്രോഡ്കാസ്റ്റിങ് കമ്പനിക്ക് സ്പോൺസർഷിപ്പ് അനുവദിച്ചെന്നാണ് എസ്.ഐ.ടി കണ്ടെത്തിയതായി റിപ്പോർട്ടിലുള്ളത്.

ബന്ധപ്പെട്ട വകുപ്പുകളെ അറിയിക്കാതെ ഔദ്യോഗിക പദവിയും സർക്കാർ രേഖകളും ദുരുപയോഗം ചെയ്തതായും അന്വേഷണ സംഘം ആരോപിക്കുന്നു. കൂടാതെ ജി.എസ്.ടി തട്ടിപ്പും കോടികളുടെ സാമ്പത്തിക ക്രമക്കേടും നടന്നതായി എസ്.ഐ.ടി വിലയിരുത്തിയിട്ടുണ്ട്.

പ്രോസിക്യൂഷൻ അനുമതിക്കായി നിയമോപദേശം

കേസിൽ ആഭ്യന്തര വകുപ്പിന്റെ അനുമതി മാത്രം മതിയാകുമെന്നായിരുന്നു ഡയറക്ടർ ജനറൽ ഓഫ് പ്രോസിക്യൂഷന്റെ നിർദേശം. എന്നാൽ കൂടുതൽ നിയമോപദേശം തേടിയതിന്റെ അടിസ്ഥാനത്തിലാണ് രാജ്ഭവനിൽനിന്ന് പ്രോസിക്യൂഷൻ അനുമതി വാങ്ങിയത്.

English Summary:

Kerala Governor Om Prakash Mathur has granted sanction to prosecute former Sports Minister V. Abdurahiman in the football sponsorship scam case. The Special Investigation Team (SIT) can now proceed with further legal steps, including questioning him and formally naming accused persons. The SIT report reportedly identified alleged irregularities in tender procedures, misuse of official position and government records, and possible GST-related financial violations.