യുദ്ധവും സാമ്പത്തിക തകർച്ചയും; ജീവിതച്ചെലവ് കണ്ടെത്താൻ ശരീരാവയവങ്ങൾ വിൽക്കാൻ ഇറാനികൾ; വൃക്ക മുതൽ വൃഷണം വരെ വിൽപ്പനയ്ക്ക് !

ജീവിതച്ചെലവ് കണ്ടെത്താൻ ശരീരാവയവങ്ങൾ വിൽക്കാൻ ഇറാനികൾ

ടെഹ്റാൻ: യുദ്ധത്തിന്റെ പശ്ചാത്തലത്തിൽ കടുത്ത സാമ്പത്തിക പ്രതിസന്ധിയിലേക്ക് കൂപ്പുകുത്തിയ ഇറാനിൽ സാധാരണക്കാരുടെ ജീവിതം ദുരിതപൂർണമായിരിക്കുകയാണ്. നിത്യജീവിതത്തിലെ ചെലവുകൾ പോലും കണ്ടെത്താൻ കഴിയാത്ത സാഹചര്യം രൂക്ഷമായതോടെ സ്വന്തം ശരീരാവയവങ്ങൾ വിൽക്കാൻ ആളുകൾ നിർബന്ധിതരാകുന്നതായാണ് പുറത്തുവരുന്ന റിപ്പോർട്ടുകൾ. വൃക്കയും കരളിന്റെ ഭാഗങ്ങളും അസ്ഥിമജ്ജയും മാത്രമല്ല, വൃഷണങ്ങൾ വരെ വിൽക്കാൻ തയാറാണെന്ന് അറിയിച്ചുള്ള പരസ്യങ്ങൾ തലസ്ഥാനമായ ടെഹ്റാനിലെ തെരുവുകളിൽ വ്യാപകമായി പ്രത്യക്ഷപ്പെട്ടിട്ടുണ്ട്.

ജീവിതച്ചെലവുകൾ കണ്ടെത്താനും കടങ്ങൾ വീട്ടാനും കുടുംബത്തെ പട്ടിണിയിൽനിന്ന് രക്ഷിക്കാനുമാണ് പലരും ഇത്തരമൊരു കടുത്ത തീരുമാനത്തിലേക്ക് എത്തുന്നത്. രക്തം വിൽക്കാൻ താൽപര്യമുള്ളവരുടെ പരസ്യങ്ങളും തെരുവുകളിൽ കാണാം. എ പോസിറ്റീവ്, എ നെഗറ്റീവ്, ഒ പോസിറ്റീവ്, ഒ നെഗറ്റീവ് തുടങ്ങിയ രക്തഗ്രൂപ്പുകൾക്കാണ് കൂടുതൽ ആവശ്യക്കാരുള്ളതെന്ന് ഇറാൻ ഇന്റർനാഷനൽ റിപ്പോർട്ട് ചെയ്തു.

കിഡ്നി സ്ട്രീറ്റായി മാറിയ ടെഹ്റാനിലെ തെരുവ്

ടെഹ്റാനിലെ ഫർഹാങ് ഹൊസൈനി സ്ട്രീറ്റ് ഇപ്പോൾ ‘കിഡ്നി സ്ട്രീറ്റ്’ എന്ന പേരിലാണ് അറിയപ്പെടുന്നത്. സമീപത്തുള്ള മെഡിക്കൽ സെന്ററും വൃക്കരോഗികൾക്ക് സാമ്പത്തിക സഹായം നൽകുന്ന ചാരിറ്റി സ്ഥാപനവുമാണ് ഈ തെരുവിന് അത്തരമൊരു പേര് ലഭിക്കാൻ കാരണം. എന്നാൽ സാമ്പത്തിക പ്രതിസന്ധി രൂക്ഷമായതോടെ അവയവങ്ങൾ വിൽക്കാൻ താൽപര്യമുള്ളവരും അവ വാങ്ങാൻ ആവശ്യക്കാരും തമ്മിൽ ബന്ധപ്പെടുന്ന പ്രധാന കേന്ദ്രമായി ഈ പ്രദേശം മാറിയിരിക്കുകയാണ്.

വൃക്ക വിൽക്കാൻ താൽപര്യമുള്ളവർ അവരുടെ വിവരങ്ങളും ആവശ്യപ്പെടുന്ന തുകയും പരസ്യങ്ങളിലൂടെ അറിയിക്കുന്നുണ്ട്. സാമ്പത്തികമായി തകർന്ന കുടുംബങ്ങൾക്ക് കടബാധ്യതകളിൽനിന്ന് രക്ഷപ്പെടാനുള്ള അവസാന മാർഗമായാണ് പലരും സ്വന്തം ശരീരത്തിന്റെ ഭാഗങ്ങൾ വിൽക്കുന്നതിനെ കാണുന്നത്. ജീവിതത്തിന്റെ അടിസ്ഥാന ആവശ്യങ്ങൾ പോലും നിറവേറ്റാൻ കഴിയാത്ത അവസ്ഥയാണ് ആളുകളെ ഇത്തരം തീരുമാനങ്ങളിലേക്ക് തള്ളിവിടുന്നതെന്നാണ് റിപ്പോർട്ടുകൾ സൂചിപ്പിക്കുന്നത്.

ഒരു വൃക്കയ്ക്ക് 19 ലക്ഷം രൂപ വരെ

ഇറാനിൽ ഒരു വൃക്കയ്ക്ക് 30 ബില്യൻ മുതൽ 40 ബില്യൻ റിയാൽ വരെ ലഭിക്കുമെന്നാണ് പുറത്തുവരുന്ന കണക്കുകൾ. ഇന്ത്യൻ രൂപയിൽ ഏകദേശം 14.74 ലക്ഷം മുതൽ 19.66 ലക്ഷം രൂപ വരെയാണിത്. അപൂർവ രക്തഗ്രൂപ്പുകളുള്ളവരുടെ കാര്യത്തിൽ 50 ബില്യൻ റിയാൽ വരെ ലഭിക്കാൻ സാധ്യതയുണ്ടെന്നും റിപ്പോർട്ടുകളുണ്ട്.

ഫർഹാങ് ഹൊസൈനി സ്ട്രീറ്റിലെ സദ്ര ആശുപത്രിയിലെ ജീവനക്കാരനെ ഉദ്ധരിച്ച് വാർത്താ ഏജൻസിയായ ഐഎൽഎൻഎയാണ് ഇക്കാര്യം റിപ്പോർട്ട് ചെയ്തത്. സാമ്പത്തികമായി പിന്നാക്കം നിൽക്കുന്നവർക്ക് ഈ തുക വലിയ ആശ്വാസമായി തോന്നാമെങ്കിലും അതിനായി സ്വന്തം ആരോഗ്യവും ഭാവിയും അപകടത്തിലാക്കേണ്ടിവരുന്ന സാഹചര്യം മനുഷ്യാവകാശ പ്രവർത്തകരിൽ ആശങ്ക സൃഷ്ടിച്ചിട്ടുണ്ട്.

കടം തീർക്കാൻ 35 ബില്യൻ റിയാൽ വേണമെന്ന് തൊഴിലാളി

രാജ്യത്തെ സാമ്പത്തിക പ്രതിസന്ധി സാധാരണക്കാരെ എത്രത്തോളം ബാധിച്ചുവെന്നതിന് ഉദാഹരണമാണ് 30 വയസ്സുകാരനായ ഒരു മോട്ടോർസൈക്കിൾ ഡെലിവറി തൊഴിലാളിയുടെ അനുഭവം. കടബാധ്യതകളിൽ കഴിയുന്ന ഇയാൾക്ക് ഒരു വൃക്കയ്ക്ക് 15 ബില്യൻ റിയാൽ വാഗ്ദാനം ലഭിച്ചിരുന്നു. എന്നാൽ ഈ തുകകൊണ്ട് തന്റെ കടങ്ങൾ പൂർണമായി തീർക്കാൻ കഴിയില്ലെന്നാണ് ഇയാളുടെ നിലപാട്.

കുറഞ്ഞത് 35 ബില്യൻ റിയാൽ ലഭിച്ചാൽ മാത്രമേ നിലവിലുള്ള സാമ്പത്തിക ബാധ്യതകളിൽനിന്ന് മോചനം നേടാൻ കഴിയൂവെന്നാണ് ഇയാൾ കരുതുന്നത്. അതുകൊണ്ടുതന്നെ ലഭിച്ച വാഗ്ദാനം സ്വീകരിക്കാൻ ഇയാൾ തയ്യാറായിട്ടില്ല. കടം വീട്ടുന്നതിനായി ശരീരാവയവം വിൽക്കുന്നതിനെക്കുറിച്ച് ആലോചിക്കേണ്ടിവരുന്ന സാഹചര്യം രാജ്യത്തെ സാമ്പത്തിക തകർച്ചയുടെ ആഴം വ്യക്തമാക്കുന്നതാണ്.

ലക്ഷക്കണക്കിന് ആളുകൾ കടുത്ത ദാരിദ്ര്യത്തിൽ

ഇറാനിലെ സാമ്പത്തിക പ്രതിസന്ധി സാധാരണ കുടുംബങ്ങളുടെ ഭക്ഷണം, താമസം, ചികിത്സ, വിദ്യാഭ്യാസം തുടങ്ങിയ അടിസ്ഥാന ആവശ്യങ്ങളെയെല്ലാം ബാധിച്ചിട്ടുണ്ട്. ഏകദേശം 80 ലക്ഷം പേർ രാജ്യത്ത് കടുത്ത ദാരിദ്ര്യത്തിൽ കഴിയുന്നതായാണ് കണക്കുകൾ സൂചിപ്പിക്കുന്നത്. ഭക്ഷണം വാങ്ങാൻ പോലും സാമ്പത്തിക ശേഷിയില്ലാത്തവരുടെ എണ്ണം അഞ്ചുകോടിയോളം വരുമെന്നാണ് ഇറാൻ പാർലമെന്റിന്റെ സാമൂഹികകാര്യ സമിതി അധ്യക്ഷൻ അലി ബാബായി കർനാമി വ്യക്തമാക്കിയിരുന്നത്.

രാജ്യത്തെ കുറഞ്ഞ വേതനം ലഭിക്കുന്ന തൊഴിലാളികൾക്ക് പ്രതിമാസം 200 ദശലക്ഷം മുതൽ 300 ദശലക്ഷം റിയാൽ വരെയാണ് ലഭിക്കുന്നത്. എന്നാൽ ഒരു കുടുംബത്തിന്റെ സാധാരണ ജീവിതച്ചെലവുകൾ നിറവേറ്റാൻ ഏകദേശം ഒരു ബില്യൻ റിയാൽ ആവശ്യമായി വരുന്ന സാഹചര്യമാണ് നിലവിലുള്ളത്. വരുമാനവും ചെലവും തമ്മിലുള്ള ഈ വലിയ അന്തരമാണ് നിരവധി കുടുംബങ്ങളെ കടക്കെണിയിലാക്കുന്നത്.

അവയവ വിൽപ്പനയുടെ റിപ്പോർട്ടുകൾ മുമ്പും പുറത്തുവന്നിരുന്നു

ഇറാനിൽ സാമ്പത്തിക പ്രതിസന്ധിയെ തുടർന്ന് ശരീരാവയവങ്ങൾ വിൽക്കുന്ന പ്രവണതയെക്കുറിച്ചുള്ള വാർത്തകൾ ഇതാദ്യമായല്ല പുറത്തുവരുന്നത്. 2023ലും വിദേശരാജ്യങ്ങളിലുള്ളവർക്ക് ഇറാനികൾ അവയവങ്ങൾ വിൽക്കുന്നതായി റിപ്പോർട്ടുകളുണ്ടായിരുന്നു. കുടുംബത്തിന്റെ ചെലവുകൾ കണ്ടെത്താനും ചികിത്സയ്ക്കും കടങ്ങൾ വീട്ടാനുമായി വൃക്ക, കരൾ, കണ്ണിന്റെ കോർണിയ, അസ്ഥിമജ്ജ എന്നിവയ്ക്കൊപ്പം ബീജവും അണ്ഡവും വരെ വിൽക്കുന്നതായാണ് അന്ന് റിപ്പോർട്ടുകൾ പുറത്തുവന്നത്.

ഓരോ അവയവത്തിനും ഏകദേശം 5,500 മുതൽ 12,000 പൗണ്ട് വരെ ലഭിച്ചിരുന്നതായും റിപ്പോർട്ടുകൾ വ്യക്തമാക്കിയിരുന്നു. ദശലക്ഷക്കണക്കിന് ഡോളറിന്റെ ഇടപാടുകൾക്ക് പിന്നിൽ ഇടനിലക്കാരുടെ ശൃംഖല പ്രവർത്തിക്കുന്നുണ്ടെന്നും അവയവങ്ങൾ വിദേശരാജ്യങ്ങളിലേക്ക് എത്തിക്കുന്നതായും ആരോപണങ്ങളുണ്ട്.

ഓൺലൈൻ പരസ്യങ്ങളിലൂടെയും മറ്റ് മാർഗങ്ങളിലൂടെയും നടക്കുന്ന ഇത്തരം ഇടപാടുകൾ നിയന്ത്രിക്കാൻ അധികൃതർ കാര്യമായ നടപടികൾ സ്വീകരിക്കുന്നില്ലെന്ന വിമർശനവും ഉയർന്നിട്ടുണ്ട്. സാമ്പത്തികമായി ദുർബലരായ ആളുകളെ വഞ്ചനയിലൂടെയും ഭീഷണിയിലൂടെയും അവയവ വിൽപ്പനയ്ക്ക് പ്രേരിപ്പിക്കുന്ന സംഭവങ്ങളും റിപ്പോർട്ട് ചെയ്യപ്പെട്ടിട്ടുണ്ട്.

ആരോഗ്യപ്രവർത്തകർ പോലും അവയവ വിൽപ്പനയ്ക്ക് തയ്യാറാകുന്ന സാഹചര്യം

2019ലും ഇറാനിലെ ദാരിദ്ര്യവും അവയവ വിൽപ്പനയും സംബന്ധിച്ച് ഗുരുതരമായ ആരോപണങ്ങൾ ഉയർന്നിരുന്നു. ദാരിദ്ര്യത്തിൽ കഴിയുന്നവർക്ക് സ്വന്തം അവയവങ്ങൾ വിൽക്കേണ്ടിവരുന്ന സാഹചര്യം സർക്കാർ അംഗീകരിച്ചിട്ടുണ്ടെന്നായിരുന്നു അന്ന് പ്രതിപക്ഷത്തിന്റെ ആരോപണം.

നാഷനൽ കൗൺസിൽ ഓഫ് റെസിസ്റ്റൻസുമായി സഹകരിക്കുന്ന ഇറാൻ ഹ്യൂമൻ റൈറ്റ്സ് മോണിറ്റർ പുറത്തുവിട്ട റിപ്പോർട്ടിൽ കരാജിലെ ഖമനയി ആശുപത്രിയിലെ ജീവനക്കാർ പോലും ജീവിതച്ചെലവുകൾ കണ്ടെത്താൻ വൃക്ക വിൽക്കാൻ തയ്യാറാകുന്നതായി ചൂണ്ടിക്കാട്ടിയിരുന്നു.

മാസങ്ങളായി ശമ്പളം ലഭിക്കാത്തതും വീട്ടുവാടക അടയ്ക്കാൻ കഴിയാത്തതും മക്കളുടെ സർവകലാശാലാ ഫീസ് കണ്ടെത്താനാകാത്തതുമാണ് ആശുപത്രി ജീവനക്കാരെ ഇത്തരമൊരു തീരുമാനത്തിലേക്ക് നയിച്ചതെന്ന് അന്നത്തെ നഗരസഭാംഗം ഗദീർ മഹ്ദവി വ്യക്തമാക്കിയിരുന്നു. ആരോഗ്യകേന്ദ്രം സന്ദർശിച്ചപ്പോഴാണ് ജീവനക്കാരുടെ ദുരിതാവസ്ഥ നേരിട്ട് മനസ്സിലാക്കിയതെന്നും അദ്ദേഹം പറഞ്ഞിരുന്നു.

നിയമപരമായ നിയന്ത്രണങ്ങൾക്കിടയിലും തുടരുന്ന പ്രതിസന്ധി

ഇറാനിൽ വൃക്ക ഉൾപ്പെടെയുള്ള ചില അവയവങ്ങൾ പണത്തിന് കൈമാറുന്നതിനുള്ള സംവിധാനം നിലനിൽക്കുന്നത് സ്ഥിതിഗതികൾ കൂടുതൽ സങ്കീർണമാക്കുന്നു. 2022ലെ റിപ്പോർട്ടുകൾ പ്രകാരം അവയവ വിൽപ്പനയ്ക്ക് സർക്കാർ നിശ്ചയിച്ച കുറഞ്ഞ വിലയാണ് രാജ്യത്തെ പ്രധാന നിയന്ത്രണങ്ങളിലൊന്ന്. അതേസമയം, ഇത്തരം ഇടപാടുകൾ സാമ്പത്തികമായി പിന്നാക്കം നിൽക്കുന്നവരെ ചൂഷണം ചെയ്യാനുള്ള സാധ്യതയും ഉയർത്തുന്നുണ്ട്.

കുടുംബത്തിന്റെ സാമ്പത്തിക ഉത്തരവാദിത്തം പുരുഷന്മാരിൽ കൂടുതലായി പ്രതീക്ഷിക്കുന്ന സാമൂഹിക സാഹചര്യം കാരണം വൃക്ക വിൽക്കാനോ ദാനം ചെയ്യാനോ മുന്നോട്ടുവരുന്നവരിൽ പുരുഷന്മാരാണ് കൂടുതലെന്നും റിപ്പോർട്ടുകൾ ചൂണ്ടിക്കാട്ടുന്നു.

യുദ്ധവും സാമ്പത്തിക തകർച്ചയും വിലക്കയറ്റവും ചേർന്ന് സാധാരണക്കാരുടെ ജീവിതം പ്രതിസന്ധിയിലാക്കിയിരിക്കുകയാണ്. കുടുംബത്തെ പോറ്റാൻ സ്വന്തം ശരീരത്തിന്റെ ഭാഗങ്ങൾ പോലും വിൽക്കേണ്ടിവരുന്ന അവസ്ഥ ഇറാനിലെ സാമൂഹിക-സാമ്പത്തിക സാഹചര്യങ്ങളുടെ ഗുരുതരാവസ്ഥയാണ് തുറന്നുകാട്ടുന്നത്.