സോണിയ ഗാന്ധിയുടെ ആത്മകഥ സിനിമയാകുന്നു; തെലുങ്കിൽ ഒരുങ്ങും

അമരാവതി: കോൺഗ്രസ് നേതാവ് സോണിയ ഗാന്ധിയുടെ ജീവിതവും രാഷ്ട്രീയ യാത്രയും സിനിമയാകുന്നു.

സോണിയയുടെ ആത്മകഥയായ ‘ബിലോഗിംഗ് എ ജേർണി ഓഫ് ലവ്’ ആസ്പദമാക്കി തെലുങ്കിലാണ് ചിത്രം ഒരുങ്ങുന്നത്.

തെലങ്കാന പ്രദേശ് കോൺഗ്രസ് കമ്മിറ്റി വർക്കിംഗ് പ്രസിഡന്റ് ജഗ്ഗ റെഡ്ഡിയാണ് സങ്കറെഡ്ഡിയിൽ നടന്ന കോൺഗ്രസ് പ്രവർത്തകരുടെ യോഗത്തിൽ സിനിമയുടെ പ്രഖ്യാപനം നടത്തിയത്.

സോണിയ ഗാന്ധി സിനിമയ്ക്ക് സംഭാവന അഭ്യർഥിച്ച് ജഗ്ഗ റെഡ്ഡി

സിനിമയുടെ നിർമാണത്തിനായി സങ്കറെഡ്ഡി മണ്ഡലത്തിലെ കോൺഗ്രസ് നേതാക്കളോടും പ്രവർത്തകരോടും ജഗ്ഗ റെഡ്ഡി സംഭാവന അഭ്യർഥിച്ചു.

മണ്ഡലം കോൺഗ്രസ് കൺവീനർ ജൂലകാന്തി ആഞ്ജനേയുലു സിനിമയ്ക്കായി രണ്ട് കോടി രൂപ വാഗ്ദാനം ചെയ്തു.

നിർമാണവുമായി ബന്ധപ്പെട്ട കാര്യങ്ങൾ വിലയിരുത്താൻ 50 അംഗ കമ്മിറ്റിയെ നിയോഗിക്കുമെന്നും ജഗ്ഗ റെഡ്ഡി അറിയിച്ചു.

ഗാന്ധിഭവൻ പബ്ലിക് റിലേഷൻസ് ഓഫീസർ ഹരിപ്രസാദ് കമ്മിറ്റിയുടെ പ്രവർത്തനങ്ങൾക്ക് മേൽനോട്ടം വഹിക്കുമെന്നും അദ്ദേഹം വ്യക്തമാക്കി.

ഗാന്ധി കുടുംബവും സോണിയയുടെ രാഷ്ട്രീയ ജീവിതവും പ്രമേയം

സോണിയ ഗാന്ധിയുടെ ജീവിതത്തിലെ വിവിധ ഘട്ടങ്ങളാണ് സിനിമയുടെ പ്രമേയമാകുക.

ഗാന്ധി കുടുംബവുമായുള്ള ബന്ധവും ഇന്ത്യയിലെ പ്രമുഖ രാഷ്ട്രീയ നേതാവായി അവർ വളർന്നുവന്ന സാഹചര്യങ്ങളും ചിത്രത്തിൽ ഉൾപ്പെടുത്തുമെന്ന് ജഗ്ഗ റെഡ്ഡി പറഞ്ഞു.

ഇന്ദിരാ ഗാന്ധിയുടെ മരുമകളായും രാജീവ് ഗാന്ധിയുടെ ഭാര്യയായും രാഹുൽ ഗാന്ധിയുടെയും പ്രിയങ്ക ഗാന്ധിയുടെയും അമ്മയായും സോണിയ പിന്നിട്ട ജീവിതയാത്ര സിനിമയിൽ ആവിഷ്കരിക്കും.

ഇന്ദിരയുടെയും രാജീവിന്റെയും വധത്തിന് ശേഷമുള്ള കാലഘട്ടവും

ഇന്ദിരാ ഗാന്ധിയുടെയും രാജീവ് ഗാന്ധിയുടെയും വധത്തെത്തുടർന്ന് കുടുംബം നേരിട്ട പ്രതിസന്ധികളും സിനിമയിൽ ഉൾപ്പെടുമെന്നാണ് പ്രഖ്യാപനം.

അതിനുശേഷം സോണിയ ഗാന്ധി അഭിമുഖീകരിച്ച വെല്ലുവിളികളും രാഷ്ട്രീയ ഉത്തരവാദിത്തങ്ങൾക്കിടയിലും മക്കളെ വളർത്തിയ രീതിയും ചിത്രത്തിന്റെ ഭാഗമാകുമെന്ന് ജഗ്ഗ റെഡ്ഡി വ്യക്തമാക്കി.

സിനിമയുടെ മറ്റ് അണിയറ പ്രവർത്തകരെക്കുറിച്ചോ അഭിനേതാക്കളെക്കുറിച്ചോ പ്രഖ്യാപനത്തിൽ വിവരങ്ങൾ നൽകിയിട്ടില്ല.

English Summary:

Congress leader Sonia Gandhi’s autobiography, ‘Belonging: A Journey of Love’, is set to be adapted into a Telugu film. Telangana Pradesh Congress Committee working president Jagga Reddy announced the project at a party meeting in Sangareddy. Local Congress leaders and workers have been asked to contribute to the production, with constituency convener Julakanti Anjaneyulu reportedly pledging ₹2 crore. The film is expected to portray Sonia Gandhi’s family life, political journey and the challenges she faced.