കണ്ണൂർ: പരിയാരം മെഡിക്കൽ കോളേജിൽ രണ്ടര മാസം പ്രായമുള്ള കുഞ്ഞിന് നടത്തിയ ശസ്ത്രക്രിയയിൽ വീഴ്ചയുണ്ടായെന്ന് കുടുംബത്തിന്റെ പരാതി. പൈലോറിക് പേശിയിലെ തടിപ്പ് നീക്കം ചെയ്യാൻ നടത്തിയ ശസ്ത്രക്രിയ പൂർണമായില്ലെന്നും ഇതേത്തുടർന്ന് കുഞ്ഞിനെ വീണ്ടും ശസ്ത്രക്രിയയ്ക്ക് വിധേയനാക്കേണ്ടി വന്നെന്നുമാണ് ആരോപണം. സംഭവത്തിൽ ആരോഗ്യ മന്ത്രിക്ക് നൽകിയ പരാതിയിൽ അന്വേഷണം ആരംഭിച്ചതായി മെഡിക്കൽ കോളേജ് അധികൃതർ അറിയിച്ചു.
പരിയാരം മെഡിക്കൽ കോളേജിൽ പൈലോറിക് സ്റ്റേനോസിസ് ശസ്ത്രക്രിയ
കണ്ണൂർ പാടിയോട്ടുച്ചാൽ സ്വദേശി ജ്യോതിഷിന്റെ രണ്ടര മാസം പ്രായമുള്ള കുഞ്ഞിനെയാണ് ആരോഗ്യപ്രശ്നങ്ങളെ തുടർന്ന് പരിയാരം മെഡിക്കൽ കോളേജിൽ പ്രവേശിപ്പിച്ചത്. പൈലോറിക് പേശിക്ക് കട്ടി കൂടി ആഹാരം കടന്നുപോകുന്ന വഴി അടയുന്ന പൈലോറിക് സ്റ്റേനോസിസ് എന്ന അവസ്ഥയാണ് കുഞ്ഞിന് കണ്ടെത്തിയത്.
തുടർച്ചയായ ഛർദ്ദിയെ തുടർന്ന് പേശിയിലെ തടിപ്പ് നീക്കം ചെയ്യാൻ ഒക്ടോബർ 11ന് ശസ്ത്രക്രിയ നടത്തി. ഏഴു ദിവസത്തിന് ശേഷം കുഞ്ഞിനെ ആശുപത്രിയിൽനിന്ന് ഡിസ്ചാർജ് ചെയ്തു. എന്നാൽ പിന്നീട് കുഞ്ഞ് രക്തം ഛർദ്ദിച്ചതായി കുടുംബം പറയുന്നു.
സ്വകാര്യ ആശുപത്രിയിലെ പരിശോധനയിൽ വീഴ്ച കണ്ടെത്തിയെന്ന് ആരോപണം
More Read
തുടർന്ന് കുഞ്ഞിനെ മംഗളൂരുവിലെ സ്വകാര്യ ആശുപത്രിയിൽ പ്രവേശിപ്പിച്ചു. അവിടെ നടത്തിയ അൾട്രാസൗണ്ട് പരിശോധനയിൽ പരിയാരം മെഡിക്കൽ കോളേജിൽ നടത്തിയ ശസ്ത്രക്രിയയിൽ തടിപ്പ് പൂർണമായും നീക്കിയിരുന്നില്ലെന്ന് വ്യക്തമായെന്നാണ് കുടുംബത്തിന്റെ ആരോപണം.
ഇതോടെ കുഞ്ഞിന് വീണ്ടും ശസ്ത്രക്രിയ നടത്തേണ്ടിവന്നതായി പിതാവ് ജ്യോതിഷ് പറഞ്ഞു. പരിയാരത്ത് ശസ്ത്രക്രിയ നടത്തിയ ഡോക്ടറുടെ ഭാഗത്ത് ഗുരുതര വീഴ്ചയുണ്ടായെന്നും കുടുംബം ആരോപിച്ചു.
ആരോഗ്യമന്ത്രിക്ക് പരാതി; അന്വേഷണം ആരംഭിച്ചു
More Read
സംഭവത്തിൽ കുടുംബം ആരോഗ്യ മന്ത്രിക്ക് പരാതി നൽകിയിട്ടുണ്ട്. പരാതിയിൽ അന്വേഷണം ആരംഭിച്ചതായി മെഡിക്കൽ കോളേജ് സൂപ്രണ്ട് അറിയിച്ചു.
അന്വേഷണ സമിതിയുടെ റിപ്പോർട്ട് ലഭിച്ചശേഷം തുടർനടപടികൾ സ്വീകരിക്കുമെന്നും സൂപ്രണ്ട് വ്യക്തമാക്കി.
