ഭീകരവിരുദ്ധ നടപടി; 14 സംസ്ഥാനങ്ങളിൽ 253 പേർ പിടിയിൽ

ന്യൂദൽഹി: സ്വാതന്ത്ര്യദിനത്തിന് മുന്നോടിയായി രാജ്യവ്യാപകമായി നടത്തിയ ഭീകരവിരുദ്ധ നടപടിയിൽ 253 പേർ പിടിയിലായതായി റിപ്പോർട്ട്. കേരളമടക്കം 14 സംസ്ഥാനങ്ങളിൽ നടത്തിയ പരിശോധനയിലാണ് ഐഎസ്ഐ, ജെയ്ഷെ മുഹമ്മദ് ബന്ധമുണ്ടെന്ന് അന്വേഷണ ഏജൻസികൾ ആരോപിക്കുന്ന ഷെഹ്‌സാദ് ഭാട്ടി സംഘവുമായി ബന്ധമുള്ളവരെ കസ്റ്റഡിയിലെടുത്തത്.

കേന്ദ്ര ആഭ്യന്തര മന്ത്രാലയത്തിന് ലഭിച്ച വിവരങ്ങളുടെ അടിസ്ഥാനത്തിൽ ഓഗസ്റ്റ് 12ന് സുരക്ഷാ സേനകളും കേന്ദ്ര ഇന്റലിജൻസ് വിഭാഗവും സംസ്ഥാന പൊലീസും സംയുക്തമായാണ് പരിശോധന നടത്തിയത്. പിടിയിലായവരിൽ 200 പേരുടെ അറസ്റ്റ് രേഖപ്പെടുത്തിയതായാണ് വിവരം.

253 പേർ പിടിയിൽ; 14 സംസ്ഥാനങ്ങളിൽ നടപടി

ഉത്തർപ്രദേശിൽ 62 പേരും ഹരിയാനയിൽ 52 പേരും ഡൽഹിയിൽ 51 പേരുമാണ് പിടിയിലായത്. പഞ്ചാബിൽ 44 പേരെയും രാജസ്ഥാനിൽ 15 പേരെയും മഹാരാഷ്ട്രയിൽ എട്ട് പേരെയും ഉത്തരാഖണ്ഡിൽ അഞ്ച് പേരെയും കസ്റ്റഡിയിലെടുത്തു.

കർണാടക, ഗുജറാത്ത്, ബിഹാർ എന്നിവിടങ്ങളിൽ മൂന്ന് പേർ വീതവും തെലങ്കാന, ഹിമാചൽ പ്രദേശ്, ജമ്മു കശ്മീർ, കേരളം എന്നിവിടങ്ങളിൽ രണ്ട് പേർ വീതവും പിടിയിലായതായാണ് കേന്ദ്ര ആഭ്യന്തര മന്ത്രാലയത്തിന്റെ കണക്ക്.

കേരളത്തിലും രണ്ട് പേർ പിടിയിൽ

കേരളത്തിൽ രണ്ട് പേരെയാണ് നടപടിയുടെ ഭാഗമായി പിടികൂടിയത്. തിരുനാവായയിലെ മാഘമഹോത്സവവുമായി ബന്ധപ്പെട്ട് ആക്രമണത്തിന് ഗൂഢാലോചന നടത്തിയെന്ന കേസിൽ ടി.എ. ഹാരിസിനെ എൻഐഎ നേരത്തെ അറസ്റ്റ് ചെയ്തിരുന്നു. കേസിൽ 10 പേരെ പിടികൂടിയതിന് പിന്നാലെയാണ് കേരളത്തിൽ രണ്ട് പേർ കൂടി അറസ്റ്റിലായതെന്നാണ് റിപ്പോർട്ട്.

അതേസമയം, സൈനിക കേന്ദ്രങ്ങൾ ഉൾപ്പെടെയുള്ള പ്രധാന സ്ഥലങ്ങൾ നിരീക്ഷിക്കാൻ സംഘം സിസിടിവി ക്യാമറകൾ ഉപയോഗിച്ചിരുന്നുവെന്നാണ് അന്വേഷണത്തിൽ കണ്ടെത്തിയതെന്ന് ആഭ്യന്തര മന്ത്രാലയം അറിയിച്ചു.

സ്ഫോടക വസ്തുക്കളും ആയുധങ്ങളും പിടിച്ചെടുത്തു

പാകിസ്ഥാൻ ഓർഡനൻസ് ഫാക്ടറിയുടെ മുദ്രയുള്ള ഗ്രനേഡുകൾ, പിസ്റ്റളുകൾ, വെടിയുണ്ടകൾ, ചാരപ്രവർത്തനങ്ങൾക്ക് ഉപയോഗിച്ച സിസിടിവി ക്യാമറകൾ എന്നിവ പിടിച്ചെടുത്തതായി അധികൃതർ അറിയിച്ചു.

സൈനിക കേന്ദ്രങ്ങൾ, ആരാധനാലയങ്ങൾ, പൊലീസ് സ്റ്റേഷനുകൾ തുടങ്ങിയ സ്ഥലങ്ങൾ നിരീക്ഷിച്ചിരുന്നതായും കണ്ടെത്തിയിട്ടുണ്ട്. യുഎപിഎ, ആംസ് ആക്ട്, എൻഡിപിഎസ് ആക്ട്, സ്ഫോടക വസ്തു നിയമം എന്നിവ പ്രകാരം ഡൽഹിയിലും കർണാടകയിലും പുതിയ എഫ്ഐആറുകളും രജിസ്റ്റർ ചെയ്തിട്ടുണ്ട്.

ഷെഹ്‌സാദ് ഭാട്ടി സംഘത്തിനെതിരെ 80 എഫ്ഐആർ

ഷെഹ്‌സാദ് ഭാട്ടി സംഘത്തിനെതിരെ ഇതുവരെ 80 എഫ്ഐആറുകൾ രജിസ്റ്റർ ചെയ്തതായി കേന്ദ്ര ആഭ്യന്തര മന്ത്രാലയം അറിയിച്ചു.

ഇതിനിടെ, ജന്തർ മന്തറിൽ നടന്ന പ്രതിഷേധത്തിൽ പങ്കെടുത്തവരിൽ ഐഎസ്ഐ, ജെയ്ഷെ മുഹമ്മദ്, ഷെഹ്‌സാദ് ഭാട്ടി സംഘവുമായി ബന്ധമുണ്ടെന്ന് ആരോപിക്കപ്പെടുന്ന 12 പേരെയും ഏതാനും ആഴ്ചകൾക്ക് മുമ്പ് അറസ്റ്റ് ചെയ്തിരുന്നു. പശ്ചിമ ബംഗാളിൽ നിന്നും പഞ്ചാബിൽ നിന്നുമാണ് ഇവരെ പിടികൂടിയത്. അറസ്റ്റിലായവരിൽ നാല് പേർ പ്രായപൂർത്തിയാകാത്തവരാണെന്നും അധികൃതർ അറിയിച്ചു.