ന്യൂഡൽഹി: വനിതാ മാധ്യമപ്രവർത്തകയോട് അപമര്യാദയായി പെരുമാറിയെന്ന പരാതിയിൽ ക്രൈംബ്രാഞ്ച് അന്വേഷണം നേരിടുന്ന ഡൽഹി പോലീസ് ഉദ്യോഗസ്ഥൻ വിവേക് ഭഗത് ഡിസിപി തസ്തികയിലേക്കുള്ള പ്രമോഷൻ ഉത്തരവ് മരവിപ്പിക്കണമെന്ന് ആവശ്യപ്പെട്ടു. അന്വേഷണം പൂർത്തിയാകുന്നതുവരെ പ്രമോഷൻ നടപ്പാക്കേണ്ടതില്ലെന്ന നിലപാടാണ് അദ്ദേഹം സ്വീകരിച്ചത്.
വിവേക് ഭഗത് പ്രമോഷൻ മരവിപ്പിക്കാൻ ആവശ്യപ്പെട്ടു
ഡൽഹി ആഭ്യന്തര വകുപ്പ് ഡെപ്യൂട്ടി സെക്രട്ടറി രമേഷ് കുമാർ പുറപ്പെടുവിച്ച ഉത്തരവിലൂടെ ഡിസിപിയായി സ്ഥാനക്കയറ്റം ലഭിച്ച 12 ഉദ്യോഗസ്ഥരിൽ ഒരാളാണ് വിവേക് ഭഗത്.നിലവിൽ കനോട്ട് പ്ലേസ് പോലീസ് സ്റ്റേഷനിൽ സബ് ഡിവിഷണൽ പോലീസ് ഓഫീസറായി പ്രവർത്തിക്കുന്ന ഭഗത്, തനിക്കെതിരായ ആരോപണങ്ങളിൽ ക്രൈംബ്രാഞ്ച് അന്വേഷണം നടക്കുന്നതിനാൽ പ്രമോഷൻ ഉത്തരവ് മരവിപ്പിക്കാൻ തയ്യാറാണെന്ന് പോലീസ് കമ്മീഷണറെ അറിയിച്ചു.
ക്രൈംബ്രാഞ്ച് അന്വേഷണത്തിന് പിന്നാലെ നടപടി
ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ജന്തർ മന്തറിൽ നടന്ന പ്രതിഷേധത്തിനിടെയാണ് വിവേക് ഭഗതിനെതിരെ പരാതി ഉയർന്നത്.വനിതാ മാധ്യമപ്രവർത്തകയോട് ഉദ്യോഗസ്ഥൻ അപമര്യാദയായി പെരുമാറിയെന്നായിരുന്നു ആരോപണം.
തുടർന്ന് പരാതികളിൽ നിഷ്പക്ഷ അന്വേഷണം ഉറപ്പാക്കാൻ ഡൽഹി പോലീസ് കേസ് ക്രൈംബ്രാഞ്ചിന് കൈമാറി.അതേസമയം, ഗുരുതര ആരോപണങ്ങൾ നേരിടുന്ന ഉദ്യോഗസ്ഥന് പ്രമോഷൻ നൽകിയതിനെതിരെ വിമർശനവും ശക്തമായി. എന്നാൽ പ്രമോഷൻ ഉദ്യോഗസ്ഥന്റെ സർവീസുമായി ബന്ധപ്പെട്ട സ്വാഭാവിക നടപടിയാണെന്നും നിലവിലെ പ്രതിഷേധവുമായി അതിന് ബന്ധമില്ലെന്നും അധികൃതർ വ്യക്തമാക്കി.
നടപടി ആവശ്യപ്പെട്ട് സിജെപി
വനിതാ മാധ്യമപ്രവർത്തകയോട് മോശമായി പെരുമാറിയെന്ന ആരോപണം നേരിടുന്ന വിവേക് ഭഗതിനെ സസ്പെൻഡ് ചെയ്യണമെന്നും എഫ്ഐആർ രജിസ്റ്റർ ചെയ്യണമെന്നും സിജെപി കോ-കൺവീനർ സൗരവ് ദാസ് ആവശ്യപ്പെട്ടു.
പരാതി നൽകിയിട്ടും പോലീസ് എഫ്ഐആർ രജിസ്റ്റർ ചെയ്യാൻ തയ്യാറായില്ലെന്ന് സിജെപി സ്ഥാപകൻ അഭിജീത് ദിപ്കെയും ആരോപിച്ചിരുന്നു. ഇതോടെയാണ് പരാതികളിൽ ക്രൈംബ്രാഞ്ച് അന്വേഷണം ആരംഭിച്ചത്.
വിവേക് ഭഗതിനെതിരെ വ്യാജ ദൃശ്യങ്ങൾ പ്രചരിപ്പിച്ചെന്ന് ആരോപണം
ഇതിനിടെ, വിവേക് ഭഗതിനെ മോശമായി ചിത്രീകരിക്കാൻ എഐ ഉപയോഗിച്ച് വ്യാജ സിസിടിവി ദൃശ്യങ്ങൾ നിർമിച്ച് പ്രചരിപ്പിച്ചെന്ന കേസിൽ ഒരു സ്വതന്ത്ര മാധ്യമപ്രവർത്തകനെ ഡൽഹി പോലീസ് അറസ്റ്റ് ചെയ്തു.
ഹരിയാണ സ്വദേശിയായ പ്രതി സേനയുടെ പ്രതിച്ഛായ തകർക്കാനും പ്രതിഷേധക്കാരെ പ്രകോപിപ്പിച്ച് അക്രമത്തിന് വഴിയൊരുക്കാനും ശ്രമിച്ചെന്നാണ് അഡീഷണൽ ഡിസിപി മൻജീത് ഷിയോറാൻ പറഞ്ഞത്.
English summary:Delhi Police officer Vivek Bhagat has requested that his promotion to the post of Deputy Commissioner of Police (DCP) be kept on hold while a Crime Branch investigation into allegations of misconduct involving a woman journalist is underway. Bhagat was among 12 officers promoted through an order issued by the Home Department. The complaints arose during a protest at Jantar Mantar seeking the resignation of Chief Election Commissioner Gyanesh Kumar. Meanwhile, Delhi Police arrested an independent journalist accused of creating and circulating AI-generated fake CCTV footage allegedly intended to portray Bhagat negatively.
