ന്യൂഡൽഹി: ഹിമാലയത്തിലെ അതീവ ഉയരമുള്ളതും പ്രതികൂല കാലാവസ്ഥയുള്ളതുമായ മേഖലകളിൽ സൈനികരെ സുരക്ഷിതമായി ഇറക്കുന്നതിനുള്ള ശേഷി തെളിയിച്ച് ഡിആർഡിഒ പാരച്യൂട്ട്. പ്രതിരോധ ഗവേഷണ സ്ഥാപനമായ ഡിആർഡിഒ വികസിപ്പിച്ച ‘അഡ്വാൻസ്ഡ് ഹൈ-ആൾട്ടിറ്റ്യൂഡ് പാരച്യൂട്ട്’ പരീക്ഷണം വിജയകരമായി പൂർത്തിയാക്കി. ലഡാക്കിലെ ന്യോമയിൽ സമുദ്രനിരപ്പിൽ നിന്ന് 16,000 അടി ഉയരത്തിലായിരുന്നു നിർണായക പരീക്ഷണം.
ഡിആർഡിഒ പാരച്യൂട്ട്: 16,000 അടി ഉയരത്തിൽ പരീക്ഷണം
16,000 അടി ഉയരത്തിൽ നിന്നാണ് പാരച്യൂട്ട് ജമ്പ് നടത്തിയത്. 15,500 അടി ഉയരത്തിൽവെച്ച് പാരച്യൂട്ട് തുറന്നു.
തുടർന്ന് സമുദ്രനിരപ്പിൽ നിന്ന് 13,700 അടി ഉയരത്തിലുള്ള ന്യോമ ഡ്രോപ്പ് സോണിൽ സുരക്ഷിതമായി ലാൻഡ് ചെയ്തു. ഉയർന്ന പ്രദേശങ്ങളിലെ സൈനിക വിന്യാസത്തിന് പാരച്യൂട്ടിന്റെ പ്രവർത്തനക്ഷമത വിലയിരുത്തുകയായിരുന്നു പരീക്ഷണത്തിന്റെ പ്രധാന ലക്ഷ്യം.
18,000 അടി വരെ പ്രവർത്തനക്ഷമമാകുന്ന രൂപകൽപ്പന
ഓക്സിജന്റെ അളവ് കുറവും കാലാവസ്ഥ പ്രതികൂലവുമായ ഉയർന്ന പ്രദേശങ്ങളിൽ പാരച്യൂട്ട് ഉപയോഗിച്ച് സൈനികരെ ഇറക്കുന്നത് വലിയ വെല്ലുവിളിയാണ്. ഇത്തരം സാഹചര്യങ്ങളിലും കുറഞ്ഞ വേഗതയിൽ സുരക്ഷിതമായി ലാൻഡ് ചെയ്യാൻ കഴിയുന്ന തരത്തിലാണ് പുതിയ പാരച്യൂട്ട് രൂപകൽപ്പന ചെയ്തിരിക്കുന്നത്.
സമുദ്രനിരപ്പിൽ നിന്ന് 18,000 അടി വരെ ഉയരത്തിൽ കാര്യക്ഷമമായി പ്രവർത്തിക്കാൻ പാരച്യൂട്ടിന് കഴിയുമെന്നാണ് വിലയിരുത്തൽ. അതേസമയം, ഹിമാലയൻ മേഖലകളിലെ ഇന്ത്യൻ പ്രതിരോധ സേനാംഗങ്ങളുടെ ഉപയോഗത്തിന് ഇത് കൂടുതൽ അനുയോജ്യമാകുമെന്നാണ് പ്രതീക്ഷ.
ആഗ്രയിലെ എഡിആർഇ വികസിപ്പിച്ചു
ആഗ്ര ആസ്ഥാനമായ എയറോനോട്ടിക്കൽ ഡെവലപ്‌മെന്റ് റിസർച്ച് ആൻഡ് ഡെവലപ്‌മെന്റ് എസ്റ്റാബ്ലിഷ്‌മെന്റ് (എഡിആർഡിഇ) ആണ് പാരച്യൂട്ട് രൂപകൽപ്പന ചെയ്ത് വികസിപ്പിച്ചത്.
പരമ്പരാഗതമായി സൈനികരെ കൂട്ടത്തോടെ വിമാനത്തിൽ നിന്ന് ഇറക്കാൻ ഉപയോഗിക്കുന്ന സ്റ്റാറ്റിക് ലൈൻ പാരച്യൂട്ട് സംവിധാനമാണിത്. കാൺപൂരിലെ ഓർഡനൻസ് പാരച്യൂട്ട് ഫാക്ടറിയിലാണ് പാരച്യൂട്ട് നിർമിച്ചത്.
ഗുണനിലവാര പരിശോധനകൾക്ക് ശേഷം പരീക്ഷണം
ഡയറക്ടറേറ്റ് ജനറൽ ഓഫ് എയറോനോട്ടിക്കൽ ക്വാളിറ്റി അഷ്വറൻസ് പരിശോധനകൾ പൂർത്തിയാക്കിയ ശേഷമാണ് പാരച്യൂട്ട് പരീക്ഷണം നടത്തിയത്.
പാരച്യൂട്ടിന് സെന്റർ ഫോർ മിലിട്ടറി എയർവർത്തിനെസ് ആൻഡ് സർട്ടിഫിക്കേഷന്റെ അംഗീകാരവും ലഭിച്ചിട്ടുണ്ട്. ഉയർന്ന മലനിരകളിലെ സൈനിക നീക്കങ്ങൾക്ക് കൂടുതൽ സുരക്ഷയും കാര്യക്ഷമതയും ഉറപ്പാക്കാൻ പുതിയ സാങ്കേതികവിദ്യയ്ക്ക് വഴിയൊരുക്കുന്നതാണ് വിജയകരമായ പരീക്ഷണം.
English Summary
DRDO has successfully completed trials of its Advanced High-Altitude Parachute in Nyoma, Ladakh. The test involved a jump from 16,000 feet, with the parachute opening at 15,500 feet and a safe landing at the 13,700-foot Nyoma Drop Zone. The system is designed for safe deployment in high-altitude Himalayan regions and is expected to operate effectively up to 18,000 feet.
