ന്യൂഡൽഹി: ഡൽഹി–എൻസിആറിൽ ചൊവ്വാഴ്ച രാത്രി വീണ്ടും ഭൂചലനത്തിന്റെ പ്രകമ്പനം അനുഭവപ്പെട്ടു. ഉത്തരാഖണ്ഡിലെ ചമോലി ജില്ലയിൽ രാത്രി 10.23നാണ് 4.9 തീവ്രതയുള്ള ഭൂചലനം രേഖപ്പെടുത്തിയത്. 13 കിലോമീറ്റർ ആഴത്തിലായിരുന്നു പ്രഭവകേന്ദ്രം.
നിലവിൽ ആളപായമോ വലിയ നാശനഷ്ടങ്ങളോ റിപ്പോർട്ട് ചെയ്തിട്ടില്ല.ദേശീയ ഭൂചലന നിരീക്ഷണ കേന്ദ്രത്തിന്റെ (NCS) കണക്കനുസരിച്ച് 30.103° വടക്കൻ അക്ഷാംശത്തിലും 79.561° കിഴക്കൻ രേഖാംശത്തിലുമാണ് ഭൂചലനത്തിന്റെ പ്രഭവകേന്ദ്രം. ഡൽഹി–എൻസിആറിന്റെ വിവിധ ഭാഗങ്ങളിലും പ്രകമ്പനം അനുഭവപ്പെട്ടു.
ഡൽഹിയിൽ ഈ വർഷം അനുഭവപ്പെട്ട ഭൂചലനങ്ങൾ
ജനുവരി 19ന് ന്യൂഡൽഹിയിൽ 2.8 തീവ്രതയുള്ള നേരിയ ഭൂചലനം രേഖപ്പെടുത്തിയിരുന്നു. വടക്കൻ ഡൽഹിയിലായിരുന്നു പ്രഭവകേന്ദ്രം. ഏകദേശം അഞ്ച് കിലോമീറ്റർ ആഴത്തിലുണ്ടായ ഭൂചലനത്തിന്റെ പ്രകമ്പനം നഗരത്തിന്റെ വിവിധ ഭാഗങ്ങളിൽ അനുഭവപ്പെട്ടു.അന്ന് ആളപായമോ നാശനഷ്ടങ്ങളോ റിപ്പോർട്ട് ചെയ്തിരുന്നില്ല.
ഏപ്രിൽ 3നും ഡൽഹി–എൻസിആറിൽ ഭൂചലനത്തിന്റെ പ്രകമ്പനം അനുഭവപ്പെട്ടു.അഫ്ഗാനിസ്ഥാനിലെ ദറാവൻ മേഖലയ്ക്ക് സമീപം 5.9 തീവ്രതയുള്ള ഭൂചലനമാണ് ഏപ്രിൽ 3ന് ഉണ്ടായത്. ഇതിന്റെ പ്രകമ്പനം പഞ്ചാബ്, ഹരിയാന, ജമ്മു കശ്മീർ, കാർഗിൽ എന്നിവിടങ്ങളിലും അനുഭവപ്പെട്ടു.
ജൂണിലും ശക്തമായ ഭൂചലനം
ജൂൺ 27ന് അഫ്ഗാനിസ്ഥാനിൽ 6.2 തീവ്രതയുള്ള ശക്തമായ ഭൂചലനം രേഖപ്പെടുത്തി. ഇതിന്റെ പ്രകമ്പനം ഡൽഹി–എൻസിആറിലും വടക്കേ ഇന്ത്യയിലെ വിവിധ ഭാഗങ്ങളിലും അനുഭവപ്പെട്ടു.ദേശീയ ഭൂചലന നിരീക്ഷണ കേന്ദ്രത്തിന്റെ കണക്കനുസരിച്ച് ഏകദേശം 215 കിലോമീറ്റർ ആഴത്തിലായിരുന്നു അന്നത്തെ ഭൂചലനം.
ഭൂചലനം ഉണ്ടായാൽ വീടിനുള്ളിൽ എന്തുചെയ്യണം?
ദേശീയ ദുരന്ത നിവാരണ അതോറിറ്റിയുടെ (NDMA) നിർദേശപ്രകാരം ഭൂചലനം അനുഭവപ്പെട്ടാൽ താഴേക്ക് കുനിയുക, സുരക്ഷിതമായി ഇരിക്കുക, ഉറപ്പുള്ള ഭാഗത്തേക്ക്‌ മാറുക എന്ന രീതിയാണ് പിന്തുടരേണ്ടത്.ഉറപ്പുള്ള ഫർണിച്ചറിന്റെ അടിയിൽ കയറി തലയും ശരീരവും സംരക്ഷിക്കുക.
സമീപത്ത് സുരക്ഷിതമായ മറയില്ലെങ്കിൽ മുറിയുടെ അകത്തെ മൂലയിൽ കുനിഞ്ഞിരുന്ന് കൈകൾ ഉപയോഗിച്ച് തലയും മുഖവും സംരക്ഷിക്കണം.ജനലുകൾ, ഗ്ലാസ്, പുറംഭിത്തികൾ എന്നിവയിൽനിന്ന് അകന്നുനിൽക്കുക.
ഷെൽഫുകൾ, ലൈറ്റ് ഫിറ്റിങ്ങുകൾ തുടങ്ങിയ വീഴാൻ സാധ്യതയുള്ള വസ്തുക്കളിൽനിന്നും മാറിനിൽക്കണം.കിടക്കയിലാണെങ്കിൽ അവിടെത്തന്നെ തുടരുകയും തലയിണ ഉപയോഗിച്ച് തല സംരക്ഷിക്കുകയും ചെയ്യുക.
മുകളിലായി ഭാരമുള്ള വസ്തു തൂങ്ങിക്കിടക്കുന്നുണ്ടെങ്കിൽ മാത്രം സുരക്ഷിതമായ മറ്റൊരു സ്ഥലത്തേക്ക് ശ്രദ്ധയോടെ മാറുക.വാതിൽപ്പടി അടുത്തും കെട്ടിടത്തിന്റെ ഘടനാപരമായി സുരക്ഷിതവുമാണെങ്കിൽ മാത്രം അത് ഉപയോഗിക്കുക. ഭൂചലനം പൂർണമായി അവസാനിക്കുന്നതുവരെ വീടിനുള്ളിൽ തുടരുന്നതാണ് സുരക്ഷിതം.
പുറത്താണെങ്കിൽ എങ്ങനെ സുരക്ഷിതരാകാം?
ഭൂചലനം ഉണ്ടാകുമ്പോൾ പുറത്താണെങ്കിൽ അവിടെത്തന്നെ തുടരുക. എന്നാൽ കെട്ടിടങ്ങൾ, മരങ്ങൾ, വൈദ്യുതി തൂണുകൾ, വൈദ്യുതി കമ്പികൾ എന്നിവയിൽനിന്ന് അകന്നുമാറണം.
പ്രകമ്പനം അവസാനിക്കുന്നതുവരെ തുറസ്സായ സ്ഥലത്ത് തുടരുക. കെട്ടിടങ്ങളുടെ പുറംഭിത്തികൾക്കും പ്രവേശന കവാടങ്ങൾക്കും സമീപം വീഴുന്ന അവശിഷ്ടങ്ങൾ മൂലം അപകടസാധ്യത കൂടുതലാണ്.
വാഹനത്തിലാണെങ്കിൽ ശ്രദ്ധിക്കേണ്ടത്
വാഹനത്തിലാണെങ്കിൽ സുരക്ഷിതമായ ഉടൻ വാഹനം റോഡിന്റെ വശത്തേക്ക് ഒതുക്കിനിർത്തുക. മേൽപ്പാലങ്ങൾ, വൈദ്യുതി ലൈനുകൾ, കെട്ടിടങ്ങൾ എന്നിവയ്ക്ക് സമീപം വാഹനം നിർത്തരുത്.
പ്രകമ്പനം അവസാനിക്കുന്നതുവരെ വാഹനത്തിനുള്ളിൽത്തന്നെ തുടരുക. പിന്നീട് യാത്ര തുടരുമ്പോൾ തകർന്ന റോഡുകളും പാലങ്ങളും ഒഴിവാക്കി ജാഗ്രതയോടെ വാഹനം ഓടിക്കണം.
അവശിഷ്ടങ്ങൾക്കിടയിൽ കുടുങ്ങിയാൽ
കെട്ടിടാവശിഷ്ടങ്ങൾക്കിടയിൽ കുടുങ്ങിയാൽ തീപ്പെട്ടി കത്തിക്കരുത്. പൊടി ഉയരുന്ന തരത്തിൽ ചവിട്ടുകയോ ചലിക്കുകയോ ചെയ്യുന്നതും ഒഴിവാക്കണം.വായയും മൂക്കും വസ്ത്രത്തിന്റെ ഒരു ഭാഗം ഉപയോഗിച്ച് മൂടുക.
സഹായം തേടാൻ പൈപ്പിലോ ചുമരിലോ തട്ടാം. വിസിൽ ഉപയോഗിച്ചും രക്ഷാപ്രവർത്തകരുടെ ശ്രദ്ധ ക്ഷണിക്കാം.നിലവിളിക്കുന്നത് അവസാന മാർഗമായി മാത്രം ഉപയോഗിക്കുക. ഇത് കൂടുതൽ പൊടി ശ്വസിക്കാൻ ഇടയാക്കാം.
കൂടാതെ വൈദ്യുതി മുടക്കം, ഫയർ അലാറം, സ്പ്രിങ്ക്ലർ സംവിധാനം പ്രവർത്തനക്ഷമമാകൽ തുടങ്ങിയ സാഹചര്യങ്ങൾക്കും തയ്യാറായിരിക്കണമെന്ന് NDMA നിർദേശിക്കുന്നു.
English summary:A magnitude 4.9 earthquake struck Uttarakhand’s Chamoli district at 10.23 pm on Tuesday, with tremors felt across parts of Delhi-NCR. The National Centre for Seismology placed the quake at a depth of 13 km. No casualties or major damage were immediately reported.Delhi-NCR has experienced tremors several times this year. A magnitude 2.8 earthquake struck North Delhi on January 19, while tremors were felt in the region on April 3 following a 5.9-magnitude earthquake in Afghanistan. On June 27, a stronger 6.2-magnitude earthquake in Afghanistan also caused tremors across Delhi-NCR and northern India.The National Disaster Management Authority advises people indoors to drop, cover and hold on, stay away from windows and falling objects, and remain indoors until shaking stops. Those outdoors should move away from buildings, trees and power lines, while people in vehicles should pull over safely and remain inside until the shaking ends.
