ഡെങ്കിപ്പനിക്കെതിരെയുള്ള ഇന്ത്യയുടെ ദീർഘകാല പോരാട്ടത്തിൽ വൻ മുന്നേറ്റം കുറിച്ചുകൊണ്ടാണ് ഡ്രഗ് കൺട്രോളർ ജനറൽ ഓഫ് ഇന്ത്യ (DCGI) ആദ്യത്തെ ഡെങ്കി വാക്സീന് വിപണന അനുമതി നൽകിയിരിക്കുന്നത്. ജാപ്പനീസ് ബയോഫാർമസ്യൂട്ടിക്കൽ ഭീമനായ തകെഡ വികസിപ്പിച്ചെടുത്ത ‘ക്യുഡെൻഗ’ (QDENGA: TAK-003) എന്ന വാക്സീനാണ് ഇന്ത്യയിൽ അടിയന്തര ഉപയോഗത്തിന് പച്ചക്കൊടി ലഭിച്ചത്. ഓരോ വർഷവും രാജ്യത്ത് ആയിരക്കണക്കിന് ആളുകളെ ആശുപത്രിയിലാക്കുകയും ജീവനപായം വരുത്തുകയും ചെയ്യുന്ന ഡെങ്കിപ്പനിയെ ചെറുക്കാൻ ഈ അംഗീകാരം വലിയ സഹായമാകും.
2027ൽ വിപണിയിലേക്ക്; തുടക്കത്തിൽ സ്വകാര്യ മേഖല വഴി
4 വയസ്സ് മുതൽ 60 വയസ്സ് വരെയുള്ള കുട്ടികൾക്കും മുതിർന്നവർക്കും ഒരുപോലെ ഉപയോഗിക്കാൻ സാധിക്കുന്ന രീതിയിലാണ് ഈ വാക്സീൻ രൂപകൽപ്പന ചെയ്തിരിക്കുന്നത്. 2027-ന്റെ ആദ്യ പകുതിയോടെ വാക്സീൻ ഇന്ത്യൻ വിപണിയിൽ പൊതുജനങ്ങൾക്ക് ലഭ്യമായിത്തുടങ്ങുമെന്ന് നിർമ്മാതാക്കളായ തകെഡ കമ്പനി വ്യക്തമാക്കി. ആദ്യഘട്ടത്തിൽ ഇന്ത്യയിലെ പ്രമുഖ സ്വകാര്യ ആശുപത്രികൾ വഴിയായിരിക്കും വാക്സീൻ വിതരണം ചെയ്യുക. അതിനുശേഷം വിതരണ ശൃംഖല കൂടുതൽ വിപുലീകരിക്കാനും സാധാരണക്കാരിലേക്ക് എത്തിക്കാനും പദ്ധതിയുമുണ്ട്.
ഡോസുകളും നിർമ്മാണ പങ്കാളിത്തവും
ഡെങ്കിപ്പനിക്ക് കാരണമാകുന്ന നാല് പ്ര പ്രധാന വൈറസ് വകഭേദങ്ങൾക്കെതിരെയും (DENV-1, DENV-2, DENV-3, DENV-4) ഒരുപോലെ പ്രതിരോധശേഷി നൽകാൻ ക്യുഡെൻഗയ്ക്ക് കഴിയുമെന്നാണ് പഠനങ്ങൾ തെളിയിക്കുന്നത്. മൂന്ന് മാസത്തെ ഇടവേളയിൽ 0.5 മില്ലിലിറ്റർ വീതമുള്ള രണ്ട് ഡോസുകളായാണ് ഇത് കുത്തിവെക്കേണ്ടത്. ഇന്ത്യയിലെ പ്രാദേശിക നിർമ്മാണത്തിനായി ഹൈദരാബാദ് ആസ്ഥാനമായി പ്രവർത്തിക്കുന്ന പ്രമുഖ ഫാർമസ്യൂട്ടിക്കൽ കമ്പനിയായ ബയോളജിക്കൽ ഇ യുമായി തകെഡ കരാറിലെത്തിയിട്ടുണ്ട്. 2030-ഓടെ പ്രതിവർഷം 10 കോടി ഡോസ് വാക്സീൻ നിർമ്മിക്കുക എന്നതാണ് ഇവരുടെ സംയുക്ത ലക്ഷ്യം.
വാക്സീൻ വിലയും പ്രതീക്ഷകളും
ഇന്ത്യൻ വിപണിയിൽ ക്യുഡെൻഗ വാക്സീന്റെ ഒരു ഡോസിന് ഏകദേശം 6,000 മുതൽ 12,000 രൂപ വരെയായിരിക്കും വിലയെന്നാണ് പ്രാഥമിക വിവരങ്ങൾ സൂചിപ്പിക്കുന്നത്. അല്പം ചെലവേറിയതാണെങ്കിലും, മഴക്കാലങ്ങളിൽ രാജ്യത്താകമാനം പടർന്നുപിടിക്കുന്ന ഡെങ്കിപ്പനി മൂലമുണ്ടാകുന്ന ഗുരുതര ആരോഗ്യപ്രശ്നങ്ങളും സാമ്പത്തിക നഷ്ടങ്ങളും ഒഴിവാക്കാൻ ഈ വാക്സീൻ വലിയ തണലാകും. ആഗോളതലത്തിൽ തന്നെ ഡെങ്കി നിയന്ത്രണത്തിൽ വലിയ മുന്നേറ്റമുണ്ടാക്കിയ ഈ വാക്സീൻ ഇന്ത്യയിലും വലിയ പ്രതീക്ഷയാണ് സമ്മാനിക്കുന്നത്.
