കണ്ണൂർ: ചൊക്ലിയിൽനിന്ന് കാണാതായ 17കാരൻ ശിവസൂര്യയെ കണ്ടെത്താനുള്ള അന്വേഷണം 100 ദിവസം പിന്നിട്ടിട്ടും ഫലത്തിലെത്തിയില്ല.
കുട്ടിയെക്കുറിച്ച് നിലവിൽ യാതൊരു വിവരവും ലഭിച്ചിട്ടില്ലെന്ന് ക്രൈംബ്രാഞ്ച് എസ്.പി. കെ.വി. വേണുഗോപാൽ അറിയിച്ചു.
ശിവസൂര്യ എത്താൻ സാധ്യതയുള്ള സ്ഥലങ്ങളിൽ പരിശോധന തുടരുകയാണെന്നും പ്രത്യേക അന്വേഷണസംഘത്തെ രൂപീകരിച്ചിട്ടുണ്ടെന്നും അദ്ദേഹം വ്യക്തമാക്കി.
ഓഗസ്റ്റ് എട്ടിന് വീടുവിട്ടിറങ്ങി; കൈവശം 3,000 രൂപ
ഓഗസ്റ്റ് എട്ടിനാണ് ശിവസൂര്യ വീടുവിട്ടിറങ്ങിയത്. മൊബൈൽ ഫോൺ ഉപയോഗിക്കുന്നത് വീട്ടുകാർ വിലക്കിയതിനെത്തുടർന്ന് കാശിയിലേക്ക് പോകുകയാണെന്ന് കുറിപ്പെഴുതിവച്ച ശേഷമായിരുന്നു കുട്ടി പോയത്.
ഏകദേശം 3,000 രൂപയും കൈവശമുണ്ടായിരുന്നുവെന്നാണ് വിവരം.
ശിവസൂര്യയെ കണ്ടെത്താൻ ആദ്യം ചൊക്ലി പൊലീസും പിന്നീട് പ്രത്യേക അന്വേഷണസംഘവും പരിശോധന നടത്തിയിരുന്നു.
കണ്ണൂർ യൂണിറ്റിലെ ഡിവൈ.എസ്.പി. കെ. സനിൽകുമാറിനായിരുന്നു അന്വേഷണച്ചുമതല. കേരളത്തിലുടനീളം അന്വേഷണം നടത്തിയെങ്കിലും കുട്ടിയെക്കുറിച്ച് വിവരമൊന്നും ലഭിച്ചില്ല.
ബെംഗളൂരുവിലും മംഗളൂരുവിലും വാരണാസിയിലും തിരച്ചിൽ
കേരളത്തിന് പുറമെ ബെംഗളൂരു, മൈസൂരു, മംഗളൂരു എന്നിവിടങ്ങളിലും പൊലീസ് പരിശോധന നടത്തി. ഒടുവിൽ കാശിയിലും അന്വേഷണം നടത്തിയെങ്കിലും ശിവസൂര്യയെക്കുറിച്ച് സൂചന ലഭിച്ചില്ല.
പരിശോധിച്ച സ്ഥലങ്ങളിലെ സിസിടിവി ദൃശ്യങ്ങളിലും കുട്ടിയെ കണ്ടെത്താനായില്ല. ശിവസൂര്യയ്ക്ക് മറ്റാരുടെയെങ്കിലും സഹായം ലഭിക്കുന്നുണ്ടാകാമെന്ന സംശയം പൊലീസിനും വീട്ടുകാർക്കുമുണ്ടായിരുന്നതായും റിപ്പോർട്ടുകളുണ്ട്.
കുടുംബത്തിന്റെ ആവശ്യത്തെത്തുടർന്ന് ക്രൈംബ്രാഞ്ച് അന്വേഷണം
ആദ്യഘട്ടത്തിൽ അന്വേഷണം കാര്യക്ഷമമായി നടന്നില്ലെന്ന് കുടുംബം ആരോപിച്ചിരുന്നു.
തുടർന്ന് ആഭ്യന്തരമന്ത്രിയെ നേരിൽക്കണ്ട് ക്രൈംബ്രാഞ്ച് അന്വേഷണം വേണമെന്ന് കുടുംബം ആവശ്യപ്പെട്ടു.
ഇതിന്റെ അടിസ്ഥാനത്തിൽ ഒക്ടോബർ 17നാണ് ക്രൈംബ്രാഞ്ച് കേസ് ഏറ്റെടുത്തത്. എന്നാൽ, അന്വേഷണത്തിൽ കാര്യമായ പുരോഗതി ഉണ്ടാക്കാൻ ക്രൈംബ്രാഞ്ചിനും കഴിഞ്ഞിട്ടില്ല. പിന്നാലെ ലുക്ക് ഔട്ട് നോട്ടീസും പുറത്തിറക്കി.
പാലക്കാടിന് സമീപവും പരിശോധന തുടരുന്നു
നിലവിൽ പാലക്കാടിന് സമീപമുള്ള സ്ഥലങ്ങൾ കേന്ദ്രീകരിച്ചും അന്വേഷണസംഘം പരിശോധന നടത്തുന്നുണ്ട്.
ശിവസൂര്യയെ കണ്ടെത്താൻ കഴിയാത്തതിൽ പ്രതിഷേധവുമായി നാട്ടുകാരും രംഗത്തെത്തിയിട്ടുണ്ട്.
100 ദിവസം പിന്നിട്ടിട്ടും കുട്ടിയെക്കുറിച്ച് യാതൊരു വിവരവും ലഭിക്കാത്തത് കുടുംബത്തെയും നാട്ടുകാരെയും ആശങ്കയിലാക്കുകയാണ്.
ശിവസൂര്യയെ കണ്ടെത്താനുള്ള അന്വേഷണം തുടരുമെന്നാണ് ക്രൈംബ്രാഞ്ച് അറിയിച്ചിരിക്കുന്നത്.
English Summary:
The search for 17-year-old Shivasurya, who went missing from Chokli in Kannur on August 8, has continued for 100 days without any breakthrough. Crime Branch SP K.V. Venugopal said a special investigation team has been formed and searches are ongoing in locations where the boy may have travelled. Police have searched across Kerala, as well as Bengaluru, Mysuru, Mangaluru and Varanasi. The Crime Branch took over the case on October 17 following the family’s request and has also issued a lookout notice. Searches are currently being conducted near Palakkad.
