സമസ്തിപുർ (ബിഹാർ): ഇന്ത്യൻ ക്രിക്കറ്റിൽ ശ്രദ്ധേയ സാന്നിധ്യമായി മാറിയ വൈഭവ് സൂര്യവംശിയുടെ കുടുംബത്തിൽനിന്ന് മറ്റൊരു പ്രതിഭ കൂടി ഉയർന്നുവരുന്നു. വൈഭവിന്റെ ഇളയ സഹോദരനായ ആശിർവാദ് സൂര്യവംശി പ്രാദേശിക പരിശീലന മത്സരത്തിൽ സെഞ്ച്വറി നേടി ശ്രദ്ധ പിടിച്ചുപറ്റി.
ബിഹാറിലെ സമസ്തിപുറിലുള്ള ക്രിക്കറ്റ് അക്കാദമി താജ്പുറിനായി കളത്തിലിറങ്ങിയ ആശിർവാദ്, 87 പന്തുകളിൽ നിന്ന് 103 റൺസ് നേടി. 20 ഫോറുകളും ഒരു സിക്സറും ഉൾപ്പെട്ട ഇന്നിങ്സിൽ 118.39 എന്ന മികച്ച സ്ട്രൈക്ക് റേറ്റും താരം സ്വന്തമാക്കി.
ഇളയ സഹോദരന്റെ മികച്ച പ്രകടനത്തിന് പിന്നാലെ, സമൂഹമാധ്യമങ്ങളിലൂടെ വൈഭവ് ആശിർവാദിനെ അഭിനന്ദിക്കുകയും ചെയ്തു. സൂര്യവംശി കുടുംബത്തിൽ നിന്ന് മറ്റൊരു വാഗ്ദാന താരത്തിന്റെ ഉദയമായാണ് ഈ പ്രകടനത്തെ ക്രിക്കറ്റ് പ്രേമികൾ വിലയിരുത്തുന്നത്.
ഐപിഎൽ 2026 സീസണിലെ തകർപ്പൻ ബാറ്റിങ് പ്രകടനത്തോടെയാണ് വൈഭവ് ദേശീയ ശ്രദ്ധ നേടിയത്. 16 മത്സരങ്ങളിൽ നിന്ന് 776 റൺസ് നേടി ഓറഞ്ച് ക്യാപ്പ് സ്വന്തമാക്കിയ താരം, പ്രമുഖ താരങ്ങളെ പിന്നിലാക്കി ടൂർണമെന്റിലെ മികച്ച ബാറ്റർമാരിൽ ഒരാളായി മാറിയിരുന്നു.
ഇന്ത്യൻ ടീമിലേക്കുള്ള വൈഭവിന്റെ ആദ്യ തിരഞ്ഞെടുപ്പ് പ്രഖ്യാപിക്കപ്പെട്ടപ്പോൾ, ജന്മനാടായ സമസ്തിപുറിലെ താജ്പുർ ഗ്രാമം ആഘോഷങ്ങളാൽ നിറഞ്ഞിരുന്നു. മധുരം വിതരണം ചെയ്തും പടക്കം പൊട്ടിച്ചും നാട്ടുകാർ സന്തോഷം പങ്കുവെച്ചിരുന്നു. മകന്റെ നേട്ടം വർഷങ്ങളായുള്ള കഠിനാധ്വാനത്തിന്റെ ഫലമാണെന്ന് പിതാവ് സഞ്ജീവ് സൂര്യവംശി പ്രതികരിച്ചിരുന്നു.
More Read
English Summary
Ashirvad Suryavanshi, younger brother of Indian cricketer Vaibhav Suryavanshi, scored a brilliant century in a local practice match in Bihar, continuing the family’s impressive rise in cricket.
