facebook

ഐഫോണിനും ഗാലക്സിക്കും വില കൂടുന്നു; ഫ്ലാഗ്ഷിപ്പ് ഫോണുകൾ രണ്ട് ലക്ഷം രൂപയിലേക്ക്

2 Min Read

മെമ്മറി ചിപ്പുകളുടെ വില കുത്തനെ ഉയരുന്നതോടെ ഈ വർഷാവസാനത്തോടെ പ്രീമിയം ഫ്ലാഗ്ഷിപ്പ് സ്മാർട്ട്ഫോണുകൾക്ക് 30 ശതമാനത്തിലധികം വിലവർധനയുണ്ടാകാൻ സാധ്യതയെന്ന് വിപണി ഗവേഷണ സ്ഥാപനമായ കൗണ്ടർപോയിന്റ് റിസർച്ച്.

ഇതോടെ പ്രമുഖ ബ്രാൻഡുകളുടെ ഫ്ലാഗ്ഷിപ്പ് മോഡലുകളുടെ വില ഒരു ലക്ഷം രൂപ കടന്നേക്കും.

എ.ഐ. ഡേറ്റാ സെന്ററുകൾക്കായുള്ള മെമ്മറി ചിപ്പുകളുടെ ആവശ്യം വർധിച്ചതാണ് സ്മാർട്ട്ഫോൺ നിർമാണച്ചെലവിനെയും വിപണിവിലയെയും ബാധിക്കുന്നത്.

നിർമാണച്ചെലവിൽ മെമ്മറി ചിപ്പുകളുടെ വിഹിതം ഉയരുന്നു

എ.ഐ. ഡേറ്റാ സെന്ററുകൾക്കായി കൂടുതൽ മെമ്മറി ചിപ്പുകൾ ആവശ്യമായി വരുന്നത് അവയുടെ നിർമാണച്ചെലവ് വർധിപ്പിച്ചിട്ടുണ്ട്.

ഇതിന്റെ പ്രതിഫലനം സ്മാർട്ട്ഫോൺ നിർമാണമേഖലയിലും പ്രകടമാണ്. ഫോണുകളുടെ മൊത്തം നിർമാണച്ചെലവിൽ മെമ്മറി ചിപ്പുകൾക്കുള്ള വിഹിതം ഗണ്യമായി ഉയരുകയാണ്.

കൗണ്ടർപോയിന്റിന്റെ കണക്കനുസരിച്ച്, 2025-ന്റെ ആദ്യ പാദത്തിൽ സ്മാർട്ട്ഫോൺ നിർമാണച്ചെലവിൽ മെമ്മറി ചിപ്പുകളുടെ വിഹിതം 13 ശതമാനമായിരുന്നു.

2026 ഡിസംബറോടെ ഇത് 43 ശതമാനമായി ഉയരുമെന്നാണ് വിലയിരുത്തൽ.ഒരു ലക്ഷം രൂപയ്ക്ക് മുകളിലേക്ക് വിലഏതാനും വർഷങ്ങൾക്കുമുൻപ് ഇന്ത്യയിൽ ഒരു ലക്ഷം രൂപ വിലയുള്ള സ്മാർട്ട്ഫോൺ അപൂർവമായിരുന്നുവെന്ന് കൗണ്ടർപോയിന്റ് റിപ്പോർട്ട് ചൂണ്ടിക്കാട്ടുന്നു.

എന്നാൽ ഫ്ലാഗ്ഷിപ്പ് ഫോണുകളുടെ വില തുടർച്ചയായി ഉയരുന്നതോടെ ഈ വിലനിലവാരം ഇപ്പോൾ കൂടുതൽ സാധാരണമാകുകയാണ്.

റിപ്പോർട്ട് പ്രകാരം, ഫ്ലാഗ്ഷിപ്പ് ഫോണുകളുടെ വിലയിൽ കഴിഞ്ഞ വർഷത്തെ അപേക്ഷിച്ച് 82 മുതൽ 87 ശതമാനം വരെ വർധന രേഖപ്പെടുത്തിയിട്ടുണ്ട്.

ആപ്പിൾ ഐഫോണുകളുടെ വിലയിൽ വാർഷികാടിസ്ഥാനത്തിൽ 20 മുതൽ 22 ശതമാനം വരെ വർധനയുണ്ടായി.

ആപ്പിളിന്റെയും സാംസങ്ങിന്റെയും മുൻനിര മോഡലുകളുടെ വില രണ്ട് ലക്ഷം രൂപയിലേക്ക് അടുക്കുകയാണ്.

സാംസങും ഷവോമിയും വില കൂട്ടി

വിലവർധനയുടെ ഭാഗമായി ദീപാവലിക്ക് മുന്നോടിയായി ഗാലക്സി എസ്26 ഫോണിന് സാംസങ് 17 ശതമാനം വില കൂട്ടിയിരുന്നു.

ദീപാവലിക്കുശേഷം സാംസങ്ങും ഷവോമിയും തങ്ങളുടെ വിവിധ മോഡലുകൾക്ക് വീണ്ടും 2,000 മുതൽ 4,000 രൂപ വരെ വില വർധിപ്പിച്ചു.വില ഉയരുന്നതിനൊപ്പം മികച്ച പ്രവർത്തനക്ഷമത, ക്യാമറ, ബാറ്ററി എന്നിവയും ഉപഭോക്താക്കൾ പ്രതീക്ഷിക്കുന്നുണ്ട്.

ഉയർന്ന വിലയുള്ള ഐഫോൺ, ഗാലക്സി എസ് സീരീസ് മോഡലുകളിലെ ഫീച്ചറുകൾ താരതമ്യേന കുറഞ്ഞ വിലയിൽ ലഭ്യമാക്കുന്ന ഫോണുകൾ അവതരിപ്പിച്ചാണ് ഐക്യൂ, ഗൂഗിൾ തുടങ്ങിയ കമ്പനികൾ വിപണിയിൽ മത്സരിക്കുന്നത്.

English Summary : The prices of premium flagship smartphones could rise by more than 30% by the end of 2026, according to Counterpoint Research. Rising memory chip costs, driven by demand from AI data centres, are increasing smartphone manufacturing expenses. Prices of flagship models from Apple and Samsung are moving closer to the ₹2 lakh mark.

Share This Article