സർക്കാർ ഫയലുകൾ നിരീക്ഷിക്കാൻ എ.ഐ; ജനസ്പർശം അദാലത്ത് കാര്യക്ഷമമാക്കും

തിരുവനന്തപുരം: കെട്ടിക്കിടക്കുന്ന സർക്കാർ ഫയലുകളുടെ തീർപ്പാക്കൽ വേഗത്തിലാക്കാൻ നിർമിതബുദ്ധി (എ.ഐ) സാങ്കേതികവിദ്യ പ്രയോജനപ്പെടുത്താൻ സർക്കാർ. 

ജനങ്ങളുടെ പരാതികൾക്ക് വേഗത്തിലും ഫലപ്രദമായും പരിഹാരം കാണുന്നതിനായി നടപ്പാക്കുന്ന ‘ജനസ്പർശം’ ഫയൽ അദാലത്ത് കൂടുതൽ കാര്യക്ഷമമാക്കുകയാണ് ലക്ഷ്യം. 

വകുപ്പ് സെക്രട്ടറിമാരുടെ യോഗത്തിൽ മുഖ്യമന്ത്രി വി.ഡി. സതീശനാണ് ഇതുസംബന്ധിച്ച നിർദ്ദേശം നൽകിയത്.

ഫയൽ നീക്കം നിരീക്ഷിക്കാൻ എ.ഐ സംവിധാനം

വകുപ്പുകളിൽ ഫയലുകൾ അനാവശ്യമായി വൈകുന്നത് കണ്ടെത്തുന്നതിനും അവയുടെ നീക്കം നിരീക്ഷിക്കുന്നതിനും എ.ഐ സാങ്കേതികവിദ്യയുടെ സാധ്യതകൾ പ്രയോജനപ്പെടുത്താനാണ് നീക്കം.

 നിശ്ചിത സമയപരിധിക്കുള്ളിൽ തീർപ്പാക്കാത്ത ഫയലുകൾ തിരിച്ചറിയാനും കാലതാമസത്തിന്റെ കാരണങ്ങൾ കണ്ടെത്താനും സംവിധാനം സഹായകമാകുമെന്നാണ് പ്രതീക്ഷ.

ഫയലുകൾ അനാവശ്യമായി തടഞ്ഞുവയ്ക്കുന്നതിലൂടെ അഴിമതിക്ക് സാഹചര്യമുണ്ടാകുന്നുണ്ടോയെന്നും നടപടിക്രമങ്ങളിൽ ക്രമക്കേടുകളുണ്ടോയെന്നും നിരീക്ഷിക്കുന്നതിനുള്ള സാധ്യതകളും പരിഗണനയിലുണ്ട്. 

കോടതി വിധികളുമായി ബന്ധപ്പെട്ട നിർദ്ദേശങ്ങളും നടപടിക്രമങ്ങളിലെ പിഴവുകളും ശ്രദ്ധയിൽപ്പെടുത്തുന്ന പരിശോധനാ സംവിധാനവും ഇതിന്റെ ഭാഗമായി ലക്ഷ്യമിടുന്നു.

വകുപ്പ് സെക്രട്ടറിമാരുടെ യോഗം എല്ലാ മാസവും

വകുപ്പ് സെക്രട്ടറിമാരുടെ ജോലിഭാരം കുറയ്ക്കുന്നതിനും ഫയൽ കൈകാര്യം ചെയ്യൽ കൂടുതൽ കാര്യക്ഷമമാക്കുന്നതിനും ഫയൽ ക്രമീകരണ നടപടികൾ സ്വീകരിക്കും. ഇതിന്റെ ഭാഗമായി വകുപ്പ് സെക്രട്ടറിമാരുടെ യോഗം എല്ലാ മാസവും ചേരാനും തീരുമാനിച്ചു.

കേന്ദ്ര സർക്കാർ ആവിഷ്കരിക്കുന്ന പദ്ധതികൾ പരമാവധി സംസ്ഥാനത്തിന് പ്രയോജനപ്പെടുത്തണമെന്നും നിലവിലുള്ള പദ്ധതികളുടെ പുരോഗതി വിലയിരുത്തി നടത്തിപ്പ് വേഗത്തിലാക്കണമെന്നും മുഖ്യമന്ത്രി നിർദ്ദേശിച്ചു.

ഫ്ലാഗ്ഷിപ്പ് പദ്ധതികൾക്കും വേഗം കൂട്ടും

മുഖ്യമന്ത്രിയുടെ ഫ്ലാഗ്ഷിപ്പ് പദ്ധതികളുടെ നടത്തിപ്പ് വേഗത്തിലാക്കാനും അവയുടെ പുരോഗതി കൃത്യമായി വിലയിരുത്താനും സെക്രട്ടറിമാർക്ക് നിർദ്ദേശം നൽകി. 

വിവിധ വകുപ്പുകളിലെ ഫയലുകളുമായി ബന്ധപ്പെട്ട നിയമപ്രശ്നങ്ങൾ സമയബന്ധിതമായി പരിഹരിക്കുന്നതിനും പ്രത്യേക ശ്രദ്ധ നൽകണമെന്ന് മുഖ്യമന്ത്രി ആവശ്യപ്പെട്ടു.

ഫയലുകൾ തീർപ്പാക്കുന്നതിലെ കാലതാമസം കുറച്ച് ജനങ്ങൾക്ക് സർക്കാർ സേവനങ്ങൾ വേഗത്തിൽ ലഭ്യമാക്കുകയാണ് നടപടികളുടെ ലക്ഷ്യം.

 ഭരണനിർവഹണത്തിലെ ഏകോപനവും കാര്യക്ഷമതയും മെച്ചപ്പെടുത്തുന്നതിനുള്ള തുടർനടപടികളും സർക്കാർ പരിഗണിക്കുന്നുണ്ട്.

English Summary:

The Kerala government plans to use artificial intelligence to improve the efficiency of the Janasparsham file adalat and speed up the disposal of pending files. Chief Minister V.D. Satheesan has directed departments to streamline file management, review flagship programmes and resolve legal issues within a time frame. Meetings of department secretaries will be held every month.