ന്യൂഡൽഹി: രാജ്യത്തെ മൊത്തം ചരക്ക് സേവന നികുതി (ജിഎസ്ടി) വരുമാനം ഒക്ടോബറിൽ 23 ശതമാനം വർധിച്ച് 2.31 ലക്ഷം കോടി രൂപയായി.
ആഭ്യന്തര ഇടപാടുകളിലും ഇറക്കുമതിയിലും നിന്നുള്ള നികുതി സമാഹരണം ഉയർന്നതാണ് വളർച്ചയ്ക്ക് പ്രധാന കാരണം. ഞായറാഴ്ച പുറത്തുവിട്ട കേന്ദ്രസർക്കാരിന്റെ കണക്കുകളിലാണ് ഇക്കാര്യം വ്യക്തമാക്കിയത്.
ആഭ്യന്തര വിൽപ്പനയിൽ നിന്നുള്ള ജിഎസ്ടി വരുമാനം കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 16 ശതമാനം ഉയർന്ന് 1.59 ലക്ഷം കോടി രൂപയിലധികമായി. ഇറക്കുമതിയിൽ നിന്നുള്ള വരുമാനമാകട്ടെ 42 ശതമാനം വർധിച്ച് 72,246 കോടി രൂപയിലെത്തി.
കേന്ദ്ര-സംസ്ഥാന ജിഎസ്ടി വരുമാനം
ഒക്ടോബറിലെ ആകെ നികുതി സമാഹരണത്തിൽ 42,935 കോടി രൂപ കേന്ദ്ര ജിഎസ്ടിയും (CGST) 51,340 കോടി രൂപ സംസ്ഥാന ജിഎസ്ടിയും (SGST) ആണ്. സംയോജിത ജിഎസ്ടി (IGST) ഇനത്തിൽ 1.37 ലക്ഷം കോടി രൂപയിലധികവും ലഭിച്ചു.
ഇതേ കാലയളവിൽ ജിഎസ്ടി റീഫണ്ടുകളും വർധിച്ചു. വാർഷികാടിസ്ഥാനത്തിൽ 6.5 ശതമാനം ഉയർന്ന് 27,934 കോടി രൂപയാണ് ഒക്ടോബറിൽ റീഫണ്ടായി നൽകിയത്.
റീഫണ്ടിന് ശേഷമുള്ള വരുമാനത്തിലും വളർച്ച
റീഫണ്ടുകൾ കുറച്ചുള്ള അറ്റ ജിഎസ്ടി വരുമാനവും മികച്ച വളർച്ച രേഖപ്പെടുത്തി. ഒക്ടോബറിൽ അറ്റ നികുതി സമാഹരണം 26 ശതമാനം ഉയർന്ന് 2.03 ലക്ഷം കോടി രൂപയിലധികമായി.
മൊത്തം വരുമാനത്തിലുണ്ടായ വർധനയ്‌ക്കൊപ്പം റീഫണ്ടുകൾ ക്രമീകരിച്ച ശേഷവും നികുതി വരുമാനത്തിൽ ഗണ്യമായ മുന്നേറ്റമുണ്ടായതായി കണക്കുകൾ വ്യക്തമാക്കുന്നു.
ഏപ്രിൽ–ഒക്ടോബറിൽ 14.77 ലക്ഷം കോടി
നടപ്പ് സാമ്പത്തിക വർഷത്തിലെ ഏപ്രിൽ മുതൽ ഒക്ടോബർ വരെയുള്ള ഏഴുമാസക്കാലയളവിലും ജിഎസ്ടി വരുമാനം ഉയർന്നു. ഈ കാലയളവിലെ മൊത്തം സമാഹരണം 13.2 ശതമാനം വർധിച്ച് 14.77 ലക്ഷം കോടി രൂപയായി.
ഇതേ കാലയളവിൽ റീഫണ്ടുകൾ ക്രമീകരിച്ചുള്ള അറ്റ ജിഎസ്ടി വരുമാനം 13 ശതമാനം ഉയർന്ന് 12.69 ലക്ഷം കോടി രൂപയിലെത്തി.
English Summary : India’s gross GST revenue rose 23 per cent year-on-year to ₹2.31 lakh crore in October, driven by strong domestic transactions and imports. Import-related GST collections increased 42 per cent, while net GST revenue after refunds grew 26 per cent to over ₹2.03 lakh crore. Gross GST collections during April–October reached ₹14.77 lakh crore.
