തൃശൂർ: കെഎസ്ഇബി സൗജന്യ വൈദ്യുതി പദ്ധതി പൂർണമായി നടപ്പാക്കാത്തത് മൂലം വീടുകളിൽ ജീവൻരക്ഷാ ഉപകരണങ്ങൾ ഉപയോഗിക്കുന്ന ആയിരക്കണക്കിന് കിടപ്പുരോഗികൾക്ക് ലഭിക്കേണ്ട ആനുകൂല്യം നഷ്ടപ്പെടുന്നതായി പരാതി. 2021-ൽ കെഎസ്ഇബി പുറത്തിറക്കിയ ഉത്തരവ് അഞ്ചുവർഷമായിട്ടും പൂർണമായി നടപ്പാക്കിയിട്ടില്ലെന്നാണ് ആരോപണം.
ജീവൻരക്ഷാ ഉപകരണങ്ങൾക്കാണ് ആനുകൂല്യം
കിടപ്പുരോഗികൾ ഉപയോഗിക്കുന്ന എയർ ബെഡ്, സക്ഷൻ ഉപകരണം, ഓക്സിജൻ കോൺസൺട്രേറ്റർ തുടങ്ങിയ വൈദ്യുതിയിൽ പ്രവർത്തിക്കുന്ന ജീവൻരക്ഷാ ഉപകരണങ്ങൾക്കുള്ള വൈദ്യുതി പൂർണമായും സൗജന്യമാക്കാനായിരുന്നു പദ്ധതി.
എന്നാൽ, ഉദ്യോഗസ്ഥരുടെ അലംഭാവവും കെടുകാര്യസ്ഥതയും കാരണം പദ്ധതി കാര്യക്ഷമമായി നടപ്പാകുന്നില്ലെന്നാണ് പരാതി. ജോലിഭാരം വർധിക്കുന്നതും ബന്ധപ്പെട്ട ഉദ്യോഗസ്ഥർ കാരണമായി ചൂണ്ടിക്കാട്ടുന്നതായും റിപ്പോർട്ടുകളുണ്ട്.
പദ്ധതി പലതവണ ഉത്തരവിറക്കിയിട്ടും നടപ്പായില്ല
More Read
2014-ലാണ് ഇതുസംബന്ധിച്ച ആദ്യ ഉത്തരവ് പുറത്തിറങ്ങിയത്. അന്ന് പ്രതിമാസം 100 യൂണിറ്റ് വരെ മാത്രമാണ് സൗജന്യമായി അനുവദിച്ചിരുന്നത്.
തുടർന്ന് 2019-ൽ പൂർണ സൗജന്യ വൈദ്യുതിക്ക് അനുമതി നൽകി. എന്നാൽ അതും നടപ്പാകാത്ത സാഹചര്യത്തിൽ 2021-ൽ വീണ്ടും ഉത്തരവിറക്കി. ഏതാനും മാസങ്ങൾ ഭാഗികമായി നടപ്പാക്കിയെങ്കിലും പിന്നീട് പദ്ധതി നിലച്ചതായാണ് വിവരം.
ആനുകൂല്യം ലഭിക്കാൻ അപേക്ഷ നിർബന്ധം
പദ്ധതിയുടെ ആനുകൂല്യം ലഭിക്കാൻ ഉപഭോക്താവ് ബന്ധപ്പെട്ട സെക്ഷൻ ഓഫീസിലെ അസിസ്റ്റന്റ് എൻജിനിയർക്ക് അപേക്ഷ നൽകണം.
ജീവൻരക്ഷാ ഉപകരണങ്ങൾ രോഗിക്ക് അത്യാവശ്യമാണെന്ന് സർക്കാർ ഡോക്ടർ സാക്ഷ്യപ്പെടുത്തിയ സർട്ടിഫിക്കറ്റും 200 രൂപ മുദ്രപത്രത്തിൽ തയ്യാറാക്കിയ സത്യവാങ്മൂലവും അപേക്ഷയ്ക്കൊപ്പം സമർപ്പിക്കണം.
ഉദ്യോഗസ്ഥർ നിർവഹിക്കേണ്ട നടപടികൾ
ലഭിക്കുന്ന അപേക്ഷയുടെ അടിസ്ഥാനത്തിൽ ജീവൻരക്ഷാ ഉപകരണങ്ങൾ പ്രവർത്തിപ്പിക്കാൻ ആവശ്യമായ പ്രതിമാസ വൈദ്യുതി ഉപഭോഗം അസിസ്റ്റന്റ് എൻജിനിയർ കണക്കാക്കണം.
കൂടാതെ, ഓരോ ആറുമാസം കൂടുമ്പോഴും രോഗിക്ക് ഈ ഉപകരണങ്ങൾ ഇപ്പോഴും ആവശ്യമായുണ്ടോയെന്ന് പരിശോധിച്ച് പദ്ധതി തുടരണോ എന്ന് വിലയിരുത്തണമെന്നും നിലവിലെ മാർഗനിർദേശങ്ങളിൽ വ്യക്തമാക്കുന്നു.
