സ്കൂട്ടറിൽ ജീപ്പ് ഇടിച്ചു; സുപ്രീംകോടതി അഭിഭാഷകന് ദാരുണാന്ത്യം

ഗ്രേറ്റർ നോയിഡ: ഉത്തർപ്രദേശിലെ ഗ്രേറ്റർ നോയിഡയിൽ ജീപ്പ് സ്കൂട്ടറിൽ ഇടിച്ച് സുപ്രീംകോടതി അഭിഭാഷകനായിരുന്ന നീരജ് (40) മരിച്ചു. അപകടത്തിൽ ഗുരുതരമായി പരുക്കേറ്റ ഭാര്യയുടെ നില അതീവ ഗുരുതരമായി തുടരുന്നു. യുവതി കോമയിലാണെന്ന് നീരജിന്റെ സഹോദരൻ അമിത് അറിയിച്ചു.

ഭാര്യ അതീവ ഗുരുതരാവസ്ഥയിൽ കോമയിൽ തുടരുന്നു

സ്കൂട്ടറിൽ യാത്ര ചെയ്യുകയായിരുന്ന ദമ്പതികളെ ജീപ്പ് ഇടിച്ചാണ് അപകടമുണ്ടായത്. ഇടിയുടെ ആഘാതത്തിൽ ഇരുവരും സ്കൂട്ടറിൽനിന്ന് തെറിച്ചുവീണു.

നീരജിനെ ആശുപത്രിയിലെത്തിച്ചപ്പോഴേക്കും മരിച്ചതായി ഡോക്ടർമാർ സ്ഥിരീകരിച്ചു. അതേസമയം, ഭാര്യയ്ക്ക് ഗുരുതര പരുക്കുകളാണ് സംഭവിച്ചത്.

ഭാര്യയ്ക്ക് 18 എല്ലുകൾക്ക് ഒടിവ്

നീരജിന്റെ ഭാര്യയുടെ ശരീരത്തിന്റെ ഇടതുവശം പൂർണമായും തളർന്നതായി സഹോദരൻ അമിത് പറഞ്ഞു. 18 എല്ലുകൾക്ക് ഒടിവുണ്ടായെന്നും ഇടുപ്പെല്ല് പൂർണമായി തകർന്നെന്നും അദ്ദേഹം വ്യക്തമാക്കി.

ഇതിനകം നിരവധി ശസ്ത്രക്രിയകൾക്ക് യുവതി വിധേയയായി. ചികിത്സയ്ക്കായി ഏകദേശം ഏഴ് ലക്ഷം രൂപയുടെ മെഡിക്കൽ ചെലവുണ്ടായതായും അമിത് പറഞ്ഞു.

ജീപ്പിലുണ്ടായിരുന്നത് നാല് യുവാക്കൾ

അപകടത്തിന് പിന്നാലെ ജീപ്പിലുണ്ടായിരുന്ന നാല് യുവാക്കൾക്കെതിരെ ആരോപണമുയർന്നു. ഇവർ മദ്യപിച്ചിരുന്നതായി ദൃക്സാക്ഷികൾ പറഞ്ഞതായി അമിത് വ്യക്തമാക്കി.

ഇടിയുടെ പിന്നാലെ ആളുകൾ സ്ഥലത്ത് തടിച്ചുകൂടി. ഇതിനിടെ ജീപ്പ് ഓടിച്ചിരുന്നയാൾ വാഹനം ഉപേക്ഷിച്ച് രക്ഷപ്പെട്ടു. ദൃക്സാക്ഷികൾ രണ്ട് പേരെ പിടികൂടിയെങ്കിലും മറ്റ് രണ്ടുപേർ ഓടി രക്ഷപ്പെട്ടു.

ഒളിവിലുള്ളവർക്കായി പൊലീസ് തിരച്ചിൽ

സംഭവമറിഞ്ഞ് പൊലീസ്, ആംബുലൻസ് സംഘങ്ങൾ സ്ഥലത്തെത്തി. നാട്ടുകാരുടെയും പൊലീസിന്റെയും സഹായത്തോടെ പരുക്കേറ്റ ദമ്പതികളെ സമീപത്തെ ആശുപത്രിയിൽ എത്തിച്ചു.

അപകടത്തിനിടയാക്കിയ ജീപ്പ് പൊലീസ് കസ്റ്റഡിയിലെടുത്തു. അതേസമയം, രക്ഷപ്പെട്ടവർക്കായി തിരച്ചിൽ ഊർജിതമാക്കിയതായി പൊലീസ് അറിയിച്ചു.അപകടം നടന്ന് 20 മണിക്കൂറിലേറെ പിന്നിട്ടിട്ടും ഒളിവിലുള്ളവരെ കണ്ടെത്താനായിട്ടില്ലെന്നാണ് കുടുംബം പറയുന്നത്. നീരജിന്റെ മൃതദേഹം ഇൻക്വസ്റ്റ് നടപടികൾ പൂർത്തിയാക്കി പോസ്റ്റുമോർട്ടത്തിനായി അയച്ചു.

English summary: A 40-year-old former Supreme Court lawyer, Neeraj, died after a jeep collided with the scooter he was travelling on with his wife in Greater Noida, Uttar Pradesh. His wife suffered critical injuries and is currently in a coma, according to Neeraj’s brother Amit.The family said she suffered fractures to 18 bones, a severely damaged hip and paralysis on the left side of her body. She has undergone multiple surgeries, with medical expenses reportedly reaching around ₹7 lakh.According to eyewitnesses cited by the family, four youths in the jeep were allegedly intoxicated. Two were caught at the scene while two others fled. Police seized the jeep and launched a search for those who escaped.