കോട്ടയം: പാഴ്ത്തടിക്ക് ഡിമാൻഡ് കുത്തനെ ഉയർന്നതോടെ കർഷകരും തടിവ്യാപാരികളും ആവേശത്തിലാണ്. പാചകവാതക വിലവർധനയും മുൻകാല ക്ഷാമവും കാരണം വിറകടുപ്പിലേക്ക് മാറിയ ഹോട്ടലുകളിൽ ഭൂരിഭാഗവും ഇപ്പോഴും അതേ സംവിധാനം തുടരുന്നതാണ് വിറകിനും പാഴ്ത്തടിക്കും വിപണിയിൽ വലിയ ആവശ്യകത സൃഷ്ടിച്ചത്.
ഒരു ടൺ പാഴ്ത്തടിക്ക് 9,000 രൂപ വരെ
നിലവിൽ ഒരു ടൺ പാഴ്ത്തടിക്ക് 9,000 രൂപവരെയും വളർച്ചയെത്തിയ വാളംപുളി, മരുത്, പെരുമരം, മുള്ള് വേങ്ങ തുടങ്ങിയ മരങ്ങൾക്ക് ടണ്ണിന് 10,000 രൂപവരെയും ലഭിക്കുന്നതായി വ്യാപാരികൾ പറയുന്നു.
അതേസമയം, മധ്യകേരളത്തിൽ പ്രതിദിനം 500 ടണ്ണിലധികം വിറക് വ്യാപാരം നടക്കുന്നുണ്ടെന്നാണ് കണക്കുകൾ.
70 ശതമാനം ഹോട്ടലുകളും ഇപ്പോഴും വിറകടുപ്പിൽ
More Read
ഏകദേശം 70 ശതമാനം ഹോട്ടലുകളിലും ഭക്ഷണം ഇപ്പോഴും വിറകടുപ്പിലാണ് തയ്യാറാക്കുന്നത്. പാചകവാതകത്തേക്കാൾ ചെലവ് കുറവായതിനാലാണ് ഹോട്ടൽ ഉടമകൾ ഈ സംവിധാനം തുടരുന്നതെന്ന് വ്യാപാരികൾ പറയുന്നു.
നിലവിൽ ഒരു കിലോ കീറിയ വിറകിന് 10 മുതൽ 12 രൂപവരെയാണ് വില. കൂടാതെ, വ്യവസായ ആവശ്യങ്ങൾക്കായി കേരളത്തിൽ നിന്ന് മറ്റ് സംസ്ഥാനങ്ങളിലേക്കും വിറക് കയറ്റുമതി ചെയ്യുന്നുണ്ട്.
ഉത്തരേന്ത്യയിലെ ആവശ്യകതയും വിലക്കയറ്റത്തിന് കാരണം
ഉത്തരേന്ത്യയിൽ തടികൊണ്ടുള്ള പാക്കിംഗ് ബോക്സുകളുടെ നിർമ്മാണം വർധിച്ചതും പാഴ്ത്തടിയുടെ ആവശ്യകതയും വിലയും ഉയരാൻ കാരണമായതായി വ്യാപാരികൾ ചൂണ്ടിക്കാട്ടുന്നു.
വിപണി അനുകൂലമായതോടെ പഴക്കംചെന്ന മരങ്ങൾ വിറ്റ് കർഷകർക്ക് അധിക വരുമാനം കണ്ടെത്താനും അവസരം ലഭിച്ചിട്ടുണ്ട്.
തടിമില്ലുകൾ കുറഞ്ഞത് വെല്ലുവിളി
ജില്ലയിൽ തടിമില്ലുകളുടെ എണ്ണം കുറഞ്ഞതും പ്രാദേശിക തടിവ്യാപാരം ചുരുങ്ങിയതും വ്യാപാരം പെരുമ്പാവൂരിലേക്ക് മാറിയതും മേഖലയ്ക്ക് വെല്ലുവിളിയായി തുടരുകയാണ്.
തടിവ്യാപാരിയായ സലിയുടെ വാക്കുകളിൽ, മുമ്പ് കാര്യമായ വില ലഭിക്കാതിരുന്ന പാഴ്ത്തടികൾക്ക് ഇപ്പോൾ മികച്ച വിപണിയാണ് ലഭിക്കുന്നത്.
