കൽപ്പറ്റ: വയനാട്ടിലെ ഉരുൾപൊട്ടലിൽ തകർന്ന ചൂരൽമല പാലത്തിന് പകരമായി പുതിയ പാലത്തിന്റെ നിർമാണം ആരംഭിച്ചു. സൈന്യം നിർമിച്ച ബെയ്‌ലി പാലത്തിന് സമാന്തരമായാണ് 34 കോടി രൂപ ചെലവിൽ പുതിയ പാലം ഒരുങ്ങുന്നത്. ഊരാളുങ്കൽ ലേബർ കോൺട്രാക്ട് സൊസൈറ്റിക്കാണ് നിർമാണ ചുമതല.
ചൂരൽമല പുതിയ പാലത്തിന് പൈലിങ് തുടങ്ങി
ചൂരൽമല ടൗണിൽ പാലത്തിന്റെ പൈലിങ് ജോലികൾ ആരംഭിച്ചു. ടൗണിൽനിന്ന് തുടങ്ങി മറുകരയിൽ അട്ടമല, മുണ്ടക്കൈ റോഡുകൾ സംഗമിക്കുന്ന സ്ഥലത്താണ് പാലം അവസാനിക്കുക.
ബോസ്ട്രിങ് മാതൃകയിൽ നിർമാണം
ഗർഡറുകൾ പരസ്പരം ബന്ധിപ്പിക്കുന്ന ബോസ്ട്രിങ് മാതൃകയിലാണ് ചൂരൽമല പുതിയ പാലം രൂപകൽപ്പന ചെയ്തിരിക്കുന്നത്. പുഴയ്ക്ക് മുകളിലൂടെ 107 മീറ്ററും ഇരുകരകളിലുമായി 80 മീറ്ററും നീളമുണ്ടാകും.
പാലത്തിന്റെ ഉയരം വർധിപ്പിച്ചാണ് നിർമാണം. അതിനാലാണ് ഇരുകരകളിലും 80 മീറ്റർ വീതം നീളത്തിൽ നിർമിക്കുന്നത്. പുഴയ്ക്കുള്ളിൽ തൂണുകൾ സ്ഥാപിക്കാത്ത രീതിയിലാണ് രൂപകൽപ്പന.
പ്രളയജലനിരപ്പിനേക്കാൾ ഉയരത്തിൽ പാലം
ദുരന്തകാലത്ത് പുന്നപ്പുഴയിൽ രേഖപ്പെടുത്തിയ പരമാവധി ജലനിരപ്പ് കണക്കിലെടുത്താണ് പാലത്തിന്റെ ഉയരം നിശ്ചയിച്ചിരിക്കുന്നത്. അന്നത്തെ ഉയർന്ന ജലനിരപ്പിനേക്കാൾ മുകളിലായിരിക്കും പാലം.
More Read
നിർമാണം പൂർത്തിയാക്കാൻ നാല് വർഷം
പുതിയ പാലത്തിന്റെ നിർമാണം നാല് വർഷത്തിനകം പൂർത്തിയാക്കാനാണ് ലക്ഷ്യമിടുന്നത്. ചൂരൽമല, മുണ്ടക്കൈ, അട്ടമല മേഖലകളിലേക്കുള്ള ഗതാഗത സൗകര്യം മെച്ചപ്പെടുത്തുന്നതിൽ പാലം നിർണായകമാകും.
English Summary:
Construction has begun on a new bridge at Chooralmala in Wayanad, replacing the bridge destroyed in the landslide. The ₹34-crore bridge is being built by the Uralungal Labour Contract Co-operative Society, parallel to the Bailey bridge constructed by the Army. Designed as a bowstring bridge without pillars in the river, it will span 107 metres over the river and extend 80 metres on either bank. The project is targeted for completion in four years.
