തിരുവനന്തപുരം: നെടുമങ്ങാട് ജില്ലാ ആശുപത്രിയിൽ യുവ വനിതാ ഡോക്ടർക്കെതിരെ ലൈംഗികാതിക്രമം നടത്തിയെന്ന പരാതിയിൽ സീനിയർ ഡോക്ടർ പിടിയിൽ. ഡോക്ടർ വിനുവിനെ ഇന്നലെ രാത്രി കുമാരപുരത്തെ വീട്ടിൽനിന്ന് നെടുമങ്ങാട് പൊലീസ് കസ്റ്റഡിയിലെടുത്തു. ചികിത്സയുമായി ബന്ധപ്പെട്ട വിവരങ്ങൾ ചോദിക്കാനെന്ന വ്യാജേന മുറിയിലേക്ക് വിളിച്ചുവരുത്തി ഉപദ്രവിക്കാൻ ശ്രമിച്ചെന്നാണ് പരാതി.
ചികിത്സാവിവരം ചോദിച്ചുവിളിപ്പിച്ച് അതിക്രമമെന്ന് പരാതി
ഹൗസ് സർജൻസി ചെയ്യുന്ന പി.ജി. വിദ്യാർഥിനിയായ യുവ ഡോക്ടർക്കെതിരെയാണ് അതിക്രമമുണ്ടായതെന്നാണ് പരാതി. ഇന്നലെ ഉച്ചയോടെ രോഗിയുടെ ചികിത്സാ വിവരങ്ങൾ തേടി സീനിയർ ഡോക്ടർ യുവതിയെ തന്റെ മുറിയിലേക്ക് വിളിപ്പിക്കുകയായിരുന്നു.
തുടർന്ന് ഡോക്ടറുടെ ക്യാബിനിൽവച്ച് കടന്നുപിടിച്ചെന്നാണ് പരാതിക്കാരിയുടെ മൊഴി. സംഭവത്തെ തുടർന്ന് യുവ ഡോക്ടർ നിലവിളിച്ച് മുറിയിൽനിന്ന് പുറത്തേക്ക് ഓടിരക്ഷപ്പെട്ടു.
സഹപ്രവർത്തകരുടെ സഹായത്തോടെ പൊലീസ് സ്റ്റേഷനിൽ പരാതി
More Read
പുറത്തിറങ്ങിയ യുവ ഡോക്ടർ സഹപ്രവർത്തകരെ വിവരം അറിയിച്ചു. അവരുടെ സഹായത്തോടെ നെടുമങ്ങാട് പൊലീസ് സ്റ്റേഷനിലെത്തിയാണ് പരാതി നൽകിയത്.
പരാതിയുടെ അടിസ്ഥാനത്തിൽ പൊലീസ് നടപടി സ്വീകരിക്കുകയും കുമാരപുരത്തെ വീട്ടിൽനിന്ന് ഡോക്ടർ വിനുവിനെ കസ്റ്റഡിയിലെടുക്കുകയും ചെയ്തു.
പ്രതിയെ കോടതിയിൽ ഹാജരാക്കും
More Read
വൈദ്യപരിശോധനയ്ക്ക് ശേഷം സ്റ്റേഷനിലെത്തിച്ച പ്രതിയെ പൊലീസ് വിശദമായി ചോദ്യം ചെയ്യുകയാണ്. ഇന്ന് ഉച്ചയോടെ നെടുമങ്ങാട് കോടതിയിൽ ഹാജരാക്കുമെന്നാണ് റിപ്പോർട്ട്.
സംഭവത്തിൽ പൊലീസ് അന്വേഷണം തുടരുകയാണ്.
English Summary: A senior doctor named Vinu was taken into police custody following a complaint of sexual assault by a young woman doctor at Nedumangad District Hospital in Thiruvananthapuram. The complainant, a postgraduate medical student undergoing house-surgeon training, alleged that he called her into his room on the pretext of discussing a patient’s treatment and assaulted her. Police are questioning the accused.
