ലോറൻസ് ബിഷ്‌ണോയി സംഘവുമായി ബന്ധം; ഗുരുമൂർത്തി പിടിയിൽ

തൃശൂർ: കുപ്രസിദ്ധ കുറ്റവാളി ലോറൻസ് ബിഷ്‌ണോയിയുടെ സംഘവുമായി ഓൺലൈനിൽ ബന്ധം പുലർത്തിയെന്ന കണ്ടെത്തലിനെ തുടർന്ന് തമിഴ്‌നാട് സ്വദേശിയായ ഗുരുമൂർത്തിയെ തൃശൂരിൽ പൊലീസ് അറസ്റ്റ് ചെയ്തു. ബോളിവുഡ് നടൻ ടൈഗർ ഷ്‌റോഫിനെ വെടിവെച്ച് കൊല്ലാൻ ശ്രമിച്ച കേസുമായി ബന്ധമുള്ള സംഘാംഗങ്ങൾക്ക് മുംബൈയിലെ വിവിധ സ്ഥലങ്ങളുടെ ചിത്രങ്ങൾ കൈമാറിയെന്നാണ് പൊലീസിന്റെ കണ്ടെത്തൽ.

ബിഷ്‌ണോയി സംഘത്തിന് ചിത്രങ്ങൾ കൈമാറിയെന്ന് സംശയം

ഫോട്ടോഗ്രാഫറായ ഗുരുമൂർത്തി മുംബൈയിലെ വിവിധ സ്ഥലങ്ങൾ ചിത്രീകരിച്ച് ബിഷ്‌ണോയി സംഘത്തിലെ അംഗങ്ങൾക്ക് അയച്ചുനൽകിയെന്നാണ് പൊലീസ് പറയുന്നത്. ബോളിവുഡ് താരങ്ങൾ പതിവായി സന്ദർശിക്കുന്ന സ്ഥലങ്ങളുടെ ചിത്രങ്ങളും കൈമാറിയതായി അന്വേഷണസംഘത്തിന് സൂചന ലഭിച്ചിട്ടുണ്ട്.

ഇതിന് പ്രതിഫലമായി പലതവണ ഡോളർ കൈപ്പറ്റിയെന്നും പൊലീസ് കണ്ടെത്തിയതായി റിപ്പോർട്ടിൽ പറയുന്നു. ചിത്രങ്ങൾ പകർത്താൻ ഉപയോഗിച്ച മൊബൈൽ ഫോൺ കണ്ടെത്തുന്നതിനായി പൊലീസ് തമിഴ്‌നാട്ടിലെ ഉദുമൽപേട്ടിലുള്ള ഇയാളുടെ ഭാര്യവീട്ടിലും പരിശോധന നടത്തി.

ഏഴുമാസമായി തൃശൂരിൽ ജോലി

ഏകദേശം ഏഴുമാസമായി തൃക്കങ്ങോട്ടെ ഒരു സ്ഥാപനത്തിൽ ഗുരുമൂർത്തി ജോലി ചെയ്തുവരികയായിരുന്നു. ഇംഗ്ലീഷ് ഉൾപ്പെടെ വിവിധ ഭാഷകൾ സംസാരിക്കുമായിരുന്ന ഇയാൾ മാന്യമായ പെരുമാറ്റമാണ് പുലർത്തിയിരുന്നതെന്ന് നാട്ടുകാർ പറയുന്നു.

സ്ഥാപനം പ്രവർത്തിച്ചിരുന്ന കെട്ടിടത്തിന്റെ മുകളിലത്തെ നിലയിൽ തമിഴ്‌നാട് സ്വദേശിയായ ഭാര്യയോടൊപ്പമായിരുന്നു താമസം. ദീപാവലിക്ക് തൊട്ടുമുൻപ് ഭാര്യ സ്വന്തം നാട്ടിലേക്ക് പോയിരുന്നു. അതിനുശേഷമാണ് ഇയാളെ പൊലീസ് കസ്റ്റഡിയിലെടുത്തത്.

നേരത്തെ നവി മുംബൈയിൽനിന്ന് തമിഴ്‌നാട്ടിലെത്തിയ ശേഷമാണ് ഗുരുമൂർത്തി കേരളത്തിലെത്തിയതെന്നാണ് വിവരം. തൃക്കങ്ങോട്ടെത്തുന്നതിനു മുൻപ് വാണിയംകുളത്തും ഒറ്റപ്പാലത്തും ചില സ്ഥാപനങ്ങളിൽ ജോലി ചെയ്തിരുന്നു. മേയ് മാസത്തിലാണ് തൃക്കങ്ങോട്ടെ സ്ഥാപനത്തിൽ പ്രവേശിച്ചത്.

യുഎപിഎ ചുമത്തി റിമാൻഡ്

രാജ്യസുരക്ഷയെ ബാധിക്കുന്ന പ്രവർത്തനങ്ങൾക്ക് സാമ്പത്തിക സഹായം നൽകൽ, കുറ്റവാളികളെ സഹായിക്കൽ, തെളിവുകൾ നശിപ്പിക്കാനുള്ള സാധ്യത തുടങ്ങിയ കാരണങ്ങൾ ചൂണ്ടിക്കാട്ടിയാണ് അറസ്റ്റ് ചെയ്തതെന്ന് സ്ഥാപന ഉടമയ്ക്ക് പൊലീസ് രേഖാമൂലം അറിയിച്ചതായാണ് റിപ്പോർട്ട്.

ടെലിഗ്രാം വഴി ബിഷ്‌ണോയിയുടെ കൂട്ടാളികളുമായി നിരന്തരം ബന്ധപ്പെട്ടിരുന്നുവെന്ന് അന്വേഷണത്തിൽ കണ്ടെത്തിയെങ്കിലും ഏതെങ്കിലും കുറ്റകൃത്യത്തിൽ ഗുരുമൂർത്തി നേരിട്ട് പങ്കെടുത്തതിന് തെളിവ് ലഭിച്ചിട്ടില്ലെന്നാണ് റിപ്പോർട്ടിലുള്ളത്.

രാജ്യസുരക്ഷയ്ക്ക് ഭീഷണിയെന്ന് വിലയിരുത്തുന്ന സംഘവുമായി ബന്ധമുണ്ടെന്ന കണ്ടെത്തലിന്റെ അടിസ്ഥാനത്തിൽ യുഎപിഎ ചുമത്തിയാണ് ഇയാളെ റിമാൻഡ് ചെയ്തത്. ദേശീയ അന്വേഷണ ഏജൻസിയായ എൻഐഎയ്ക്ക് കൈമാറുമെന്നാണ് വിവരം.

കേന്ദ്ര ഇന്റലിജൻസ് വിവരത്തെ തുടർന്ന് പരിശോധന

ബിഷ്‌ണോയി സംഘവുമായി നേരിട്ട് ബന്ധമുള്ള ഒരാൾ ഒറ്റപ്പാലം മേഖലയിൽ രഹസ്യമായി താമസിക്കുന്നുവെന്ന് കേന്ദ്ര ഇന്റലിജൻസ് ബ്യൂറോ വിവരം നൽകിയതിനെ തുടർന്നാണ് അന്വേഷണം ആരംഭിച്ചത്.

തൃശൂർ എസിപി ടി.ആർ. രാജേഷിന്റെ നേതൃത്വത്തിലുള്ള സംഘം നടത്തിയ പരിശോധനയിലാണ് ഗുരുമൂർത്തിയെ കണ്ടെത്തിയത്. ബുധനാഴ്ച അർധരാത്രിയോടെ തൃക്കങ്ങോട്ടെത്തിയ അന്വേഷണസംഘം മണിക്കൂറുകളോളം ചോദ്യംചെയ്തു. തുടർന്ന് വ്യാഴാഴ്ച പുലർച്ചെ അഞ്ചുമണിയോടെ കസ്റ്റഡിയിലെടുത്ത് തൃശൂരിലേക്ക് കൊണ്ടുപോയി.

തൃശൂർ ഈസ്റ്റ് പൊലീസ് സ്റ്റേഷൻ പരിധിയിൽ നടന്ന ചില ഗൂഢാലോചനകളിലും ഇയാൾക്ക് പങ്കുണ്ടോയെന്ന് പൊലീസ് പരിശോധിക്കുന്നുണ്ട്. അധോലോക സംഘവുമായുള്ള ബന്ധത്തിന്റെ വ്യാപ്തിയും കുറ്റകൃത്യങ്ങളുടെ പശ്ചാത്തലവും സംബന്ധിച്ച അന്വേഷണം തുടരുകയാണ്. ദേശീയ അന്വേഷണ ഏജൻസികളും കേസിൽ സജീവമാണെന്നാണ് റിപ്പോർട്ട്.

English Summary:

Tamil Nadu native Gurumurthy, a photographer, has been arrested in Thrissur over alleged online links with associates of gangster Lawrence Bishnoi. Police suspect he shared photographs of locations in Mumbai, including places frequented by Bollywood celebrities, and received payments in dollars. He has been remanded under the UAPA. Investigators say there is no evidence so far that he directly participated in a crime. Further investigation is underway, with national agencies also involved