തിരുവനന്തപുരം: എൽപിഎസ്ടി നിയമനവുമായി ബന്ധപ്പെട്ട് സെക്രട്ടേറിയറ്റിന് മുന്നിൽ പി.എസ്.സി റാങ്ക് ഹോൾഡേഴ്‌സ് നടത്തുന്ന സമരം കൂടുതൽ ആശങ്കയിലേക്ക്. 18 ദിവസമായി നിരാഹാര സമരം തുടരുന്ന സമരസമിതി നേതാവ് വളർമതിയുടെ ആരോഗ്യനില മോശമായതിനെ തുടർന്ന് വീണ്ടും ആശുപത്രിയിൽ പ്രവേശിപ്പിച്ചു. രാത്രി 11 മണിയോടെ തിരുവനന്തപുരം ജനറൽ ആശുപത്രിയിലെത്തിച്ച വളർമതിയെ തീവ്രപരിചരണ വിഭാഗത്തിൽ പ്രവേശിപ്പിച്ചു.
ചികിത്സയ്ക്ക് പിന്നാലെ സമരപ്പന്തലിൽ തിരിച്ചെത്തി
ആരോഗ്യപ്രശ്നങ്ങളെ തുടർന്ന് കഴിഞ്ഞ ദിവസവും വളർമതിയെ പൊലീസ് ആശുപത്രിയിലേക്ക് മാറ്റിയിരുന്നു. ചികിത്സയ്ക്കുശേഷം വെള്ളിയാഴ്ച രാവിലെ സമരപ്പന്തലിൽ തിരിച്ചെത്തിയ അവർ നിരാഹാര സമരം പുനരാരംഭിച്ചു.
എന്നാൽ രാത്രിയോടെ ആരോഗ്യനില വീണ്ടും വഷളായതിനെ തുടർന്ന് ആശുപത്രിയിൽ പ്രവേശിപ്പിക്കുകയായിരുന്നു.
ജയകൃഷ്ണൻ നിരാഹാര സമരം തുടരുന്നു
More Read
വളർമതിയെ ആശുപത്രിയിൽ പ്രവേശിപ്പിച്ചതിന് പിന്നാലെ എൽപിഎസ്ടി ഉദ്യോഗാർഥി എം. ജയകൃഷ്ണൻ നിരാഹാര സമരം ഏറ്റെടുത്തു. നിലവിൽ അദ്ദേഹമാണ് സമരം തുടരുന്നത്.
പൊലീസ് പൊളിച്ചുനീക്കിയ സമരപ്പന്തലിന് പകരം ബുധനാഴ്ച രാത്രി ഡിവൈഎഫ്ഐ പ്രവർത്തകർ ഒരുക്കിയ പന്തലിലാണ് ഇപ്പോൾ സമരം നടക്കുന്നത്.
വിദ്യാർഥി-അധ്യാപക അനുപാതത്തിൽ തർക്കം
More Read
നിരാഹാര സമരം അവസാനിപ്പിക്കണമെന്ന് സർക്കാർ നേരത്തെ സമരക്കാരോട് ആവശ്യപ്പെട്ടിരുന്നു. സമരസമിതി മുന്നോട്ടുവച്ച മറ്റു ചില ആവശ്യങ്ങൾ പരിഗണിച്ചെങ്കിലും പ്രധാന ആവശ്യമായ വിദ്യാർഥി-അധ്യാപക അനുപാതം കുറയ്ക്കുന്നതിൽ സർക്കാർ അനുകൂല നിലപാട് സ്വീകരിച്ചില്ലെന്നാണ് സമരക്കാരുടെ ആരോപണം.
ഈ ആവശ്യം അംഗീകരിക്കാതെ സമരത്തിൽനിന്ന് പിന്നോട്ടില്ലെന്ന നിലപാടിലാണ് പി.എസ്.സി റാങ്ക് ഹോൾഡേഴ്‌സ്. സർക്കാരിന്റെ ഭാഗത്തുനിന്ന് അനുകൂല തീരുമാനം ഉണ്ടാകുന്നതുവരെ സമരം തുടരാനാണ് സമരസമിതിയുടെ തീരുമാനം.
English Summary:
The health condition of Valarmathi, a leader of the LPST PSC rank holders’ protest in front of the Kerala Secretariat, deteriorated after 18 days of fasting. She was admitted to the ICU at Thiruvananthapuram General Hospital around 11 pm. LPST candidate M. Jayakrishnan has continued the hunger strike. The protesters are demanding a favourable government decision on reducing the student-teacher ratio.
