ഫുജൈറ: യുഎഇയിലെ ഷെയ്ഖ് ഖലീഫ ബിൻ സായിദ് റോഡിൽ ഫുജൈറ അതിർത്തിക്ക് സമീപമുണ്ടായ വൻ വാഹനാപകടത്തിൽ 14 പേർ മരിച്ചു. 30 പേർക്ക് പരുക്കേറ്റതായി ആഭ്യന്തര മന്ത്രാലയം അറിയിച്ചു.
ഗതാഗതക്കുരുക്കിൽ വാഹനങ്ങൾ സാവധാനത്തിൽ നീങ്ങുന്നതിനിടെയാണ് അർധരാത്രിയോടെ അപകടമുണ്ടായത്.നിയന്ത്രണം വിട്ടെത്തിയ ട്രക്ക് മറ്റൊരു വാഹനത്തിലേക്ക് ഇടിച്ചുകയറുകയായിരുന്നു.
തുടർന്ന് ട്രക്ക് മറിഞ്ഞ് സമീപത്തുണ്ടായിരുന്ന അഞ്ച് ട്രക്കുകളിലും 18 കാറുകളിലും കൂട്ടിയിടിച്ചു. ഇടിയുടെ ആഘാതത്തിൽ ട്രക്കിന് തീപിടിക്കുകയും തീ മറ്റ് വാഹനങ്ങളിലേക്കും അതിവേഗം പടരുകയും ചെയ്തു.
30 പേർക്ക് പരുക്ക്
അപകടത്തിൽ പരുക്കേറ്റ 30 പേരിൽ 15 പേർ പ്രാഥമിക ചികിത്സയ്ക്ക് ശേഷം ആശുപത്രി വിട്ടു. ശേഷിക്കുന്ന 15 പേർ തീവ്രപരിചരണ വിഭാഗത്തിൽ ചികിത്സയിൽ തുടരുകയാണ്.
ഇന്ത്യ, യുഎഇ, ഒമാൻ, ബ്രസീൽ, പാക്കിസ്ഥാൻ, ജോർദാൻ, ഈജിപ്ത് എന്നീ രാജ്യങ്ങളിലെ പൗരന്മാരാണ് പരുക്കേറ്റവരിലുള്ളത്.
More Read
മരിച്ചവരുടെ തിരിച്ചറിയൽ തുടരുന്നു
മരിച്ചവരിൽ യുഎഇ പൗരന്മാരുമുണ്ടെന്ന് ഫുജൈറ പൊലീസ് വ്യക്തമാക്കി. തിരിച്ചറിയാൻ സാധിക്കാത്ത മൃതദേഹങ്ങളിൽ ഡിഎൻഎ പരിശോധന നടത്തിവരികയാണ്.
അപകടത്തിൽ നിരവധി വാഹനങ്ങൾ കൂട്ടിയിടിക്കുകയും തീപിടിത്തമുണ്ടാകുകയും ചെയ്തതാണ് ദുരന്തത്തിന്റെ തീവ്രത വർധിപ്പിച്ചത്. സംഭവത്തിൽ കൂടുതൽ നടപടികൾ തുടരുകയാണ്.
English Summary : A major vehicle accident near the Fujairah border on Sheikh Khalifa bin Zayed Road in the UAE has killed 14 people and injured 30 others, the Ministry of Interior said. A truck lost control amid slow-moving traffic and collided with several vehicles, triggering a fire that spread to other vehicles. Fifteen injured people were discharged after initial treatment, while another 15 remain in intensive care.
