നഗോയ: ഏഷ്യൻ ഗെയിംസ് ക്രിക്കറ്റിൽ ശ്രീലങ്കയെ 124 റൺസിന് തകർത്ത് ഇന്ത്യ ഫൈനലിൽ. 170 റൺസ് വിജയലക്ഷ്യവുമായി ഇറങ്ങിയ ശ്രീലങ്ക 9.5 ഓവറിൽ വെറും 45 റൺസിന് ഓൾഔട്ടായി. 15 റൺസെടുത്ത നുവനിദു ഫെർണാണ്ടോ മാത്രമാണ് ലങ്കൻ നിരയിൽ രണ്ടക്കം കടന്നത്.
ഏഷ്യൻ ഗെയിംസ് ക്രിക്കറ്റിൽ ഇന്ത്യക്ക് 124 റൺസ് ജയം
ആദ്യം ബാറ്റ് ചെയ്ത ഇന്ത്യ 20 ഓവറിൽ ഏഴ് വിക്കറ്റ് നഷ്ടത്തിൽ 169 റൺസെടുത്തു. ഇഷാൻ കിഷന്റെ അപരാജിത അർധസെഞ്ച്വറിയാണ് ഇന്ത്യക്ക് മികച്ച സ്കോർ സമ്മാനിച്ചത്.
46 പന്തിൽ നാല് ഫോറും അഞ്ച് സിക്സും ഉൾപ്പെടെ 80 റൺസാണ് ഇഷാൻ നേടിയത്. വൈഭവ് സൂര്യവംശി 38 റൺസെടുത്തപ്പോൾ മറ്റ് ഇന്ത്യൻ ബാറ്റർമാർക്ക് വലിയ സംഭാവന നൽകാനായില്ല.
ആദ്യ ഓവറിൽ തന്നെ ശ്രീലങ്ക തകർന്നു
170 റൺസ് വിജയലക്ഷ്യം പിന്തുടർന്ന ശ്രീലങ്കയ്ക്ക് തുടക്കം മുതൽ തിരിച്ചടിയേറ്റു. ജസ്പ്രീത് ബുംറ എറിഞ്ഞ ആദ്യ ഓവറിൽ തന്നെ സിനത് ജയവർദനയും സോഹൻ ഡിലവരയും പൂജ്യത്തിന് പുറത്തായി.
തൊട്ടടുത്ത ഓവറിൽ പന്ത് നേരിടുന്നതിന് മുമ്പ് ലസിത് ക്രൂസ്പുലെ റണ്ണൗട്ടായതോടെ ലങ്കൻ മുൻനിര പൂർണമായി തകർന്നു.
സ്കോർ 18ൽ നിൽക്കെ ക്യാപ്റ്റൻ സഹൻ അരച്ചിഗെ ഒൻപത് റൺസിന് വൈഭവ് സൂര്യവംശിയുടെ ക്യാച്ചിൽ പുറത്തായി. ഇതേ സ്കോറിൽ അശേൻ ബന്ദാരയും പൂജ്യത്തിന് മടങ്ങി.
45 റൺസിന് ലങ്ക ഓൾഔട്ട്
രണ്ടക്കം കടന്ന ഏക ബാറ്ററായ നുവനിദു ഫെർണാണ്ടോ 15 റൺസെടുത്ത് റണ്ണൗട്ടായി. തുടർന്ന് ക്രീസിലെത്തിയവർക്കൊന്നും ഇന്ത്യൻ ബൗളർമാർക്കെതിരെ പിടിച്ചുനിൽക്കാനായില്ല.
പത്താം ഓവർ എറിയാനെത്തിയ അഭിഷേക് ശർമ അഞ്ച് പന്തുകൾക്കിടെ അവസാന രണ്ട് വിക്കറ്റുകളും വീഴ്ത്തി ശ്രീലങ്കൻ ഇന്നിങ്സിന് വിരാമമിട്ടു.
More Read
ഇതോടെ 9.5 ഓവറിൽ 45 റൺസിന് ശ്രീലങ്ക ഓൾഔട്ടായി. 124 റൺസിന്റെ വമ്പൻ ജയത്തോടെയാണ് ഇന്ത്യ ഫൈനലിൽ പ്രവേശിച്ചത്.
ഫൈനലിൽ ഇന്ത്യ-പാകിസ്ഥാൻ പോരാട്ടം
ഒന്നാം സെമിയിൽ ബംഗ്ലാദേശിനെ ആറ് വിക്കറ്റിന് തോൽപ്പിച്ച പാകിസ്ഥാനാണ് ഫൈനലിൽ ഇന്ത്യയുടെ എതിരാളി. മോശം കാലാവസ്ഥയെ തുടർന്ന് 13 ഓവറാക്കി ചുരുക്കിയ മത്സരത്തിൽ ബംഗ്ലാദേശ് ഏഴ് വിക്കറ്റ് നഷ്ടത്തിൽ 111 റൺസെടുത്തു.
തൗഹിദ് ഹൃദോയ് 42 റൺസെടുത്തപ്പോൾ സെയ്ഫ് ഹസ്സൻ 19 റൺസ് നേടി. പാകിസ്ഥാനുവേണ്ടി സൂഫിയാൻ മൊഖിം മൂന്ന് വിക്കറ്റ് വീഴ്ത്തി.
മറുപടി ബാറ്റിങ്ങിൽ നാല് വിക്കറ്റ് നഷ്ടമായെങ്കിലും ഒൻപത് പന്തുകൾ ബാക്കിനിൽക്കെ പാകിസ്ഥാൻ ലക്ഷ്യം മറികടന്നു. ഇതോടെ സ്വർണ മെഡലിനായുള്ള കലാശപ്പോരിൽ ഇന്ത്യയും പാകിസ്ഥാനും ഏറ്റുമുട്ടും.
ശനിയാഴ്ചയാണ് ഫൈനൽ. കഴിഞ്ഞ വർഷം നടന്ന ഏഷ്യാകപ്പ് ഫൈനലിലും ഇന്ത്യയും പാകിസ്ഥാനും തമ്മിലായിരുന്നു പോരാട്ടം.
English Summary
India stormed into the Asian Games cricket final with a 124-run victory over Sri Lanka. After scoring 169/7, India bowled Sri Lanka out for just 45 in 9.5 overs. Ishan Kishan top-scored with an unbeaten 80 off 46 balls, while Jasprit Bumrah and Abhishek Sharma played key roles with the ball. Pakistan, who defeated Bangladesh by six wickets in the other semifinal, will face India in Saturday’s final.
