സമൂഹമാധ്യമത്തിലൂടെ പരിചയം, അവിവാഹിതനെന്ന് പറഞ്ഞ് വിവാഹം; 60 ലക്ഷം രൂപ വാങ്ങി മുങ്ങിയ ഭർത്താവിനെത്തേടി തായ്ലാൻഡ് സ്വദേശിനി ഇന്ത്യയിൽ

60 ലക്ഷം രൂപ വാങ്ങി മുങ്ങിയ ഭർത്താവിനെത്തേടി തായ്ലാൻഡ് സ്വദേശിനി ഇന്ത്യയിൽ

കാൺപൂർ: സമൂഹമാധ്യമത്തിലൂടെ പരിചയപ്പെട്ട തായ്‌ലൻഡ് സ്വദേശിനിയെ വിവാഹം കഴിച്ച ശേഷം 60 ലക്ഷം രൂപ കൈക്കലാക്കി ഇന്ത്യയിലേക്ക് മടങ്ങിയെന്ന പരാതിയിൽ ഉത്തർപ്രദേശ് സ്വദേശി അറസ്റ്റിൽ. കാൺപൂർ സ്വദേശിയായ ഇർഫാനെയാണ് പൊലീസ് അറസ്റ്റ് ചെയ്തത്. തായ്‌ലൻഡ് സ്വദേശിനിയും റസ്റ്ററന്റ് നടത്തിപ്പുകാരിയുമായ ഉപ്സോൺ നൽകിയ പരാതിയുടെ അടിസ്ഥാനത്തിലാണ് നടപടി.

തുകൽ വ്യാപാരിയായ ഇർഫാനും ഉപ്സോണും സമൂഹമാധ്യമത്തിലൂടെയാണ് പരിചയപ്പെട്ടത്. ആദ്യം സൗഹൃദത്തിലായിരുന്ന ഇരുവരും പിന്നീട് പ്രണയബന്ധത്തിലേക്ക് കടന്നതായാണ് പരാതിയിൽ പറയുന്നത്. അവിവാഹിതനാണെന്ന് പരിചയപ്പെടുത്തിയാണ് ഇർഫാൻ യുവതിയുമായി ബന്ധം സ്ഥാപിച്ചതെന്നും പരാതിയിലുണ്ട്.

തായ്‌ലൻഡിലെത്തി വിവാഹം

രണ്ട് വർഷം മുൻപ് ഉപ്സോണിനെ കാണുന്നതിനായി ഇർഫാൻ തായ്‌ലൻഡിലെത്തിയിരുന്നു. അവിടെവച്ച് ഇരുവരും വിവാഹിതരായെന്നാണ് യുവതി പൊലീസിനോട് പറഞ്ഞത്. വിവാഹശേഷം ഇരുവരും തമ്മിലുള്ള ബന്ധം തുടരുകയും ചെയ്തിരുന്നു.

എന്നാൽ വിവാഹത്തിന് പിന്നാലെ ഇർഫാൻ വിവിധ ആവശ്യങ്ങൾക്കായി പണം ആവശ്യപ്പെട്ടുതുടങ്ങിയെന്നാണ് പരാതി. ബിസിനസ് ആവശ്യങ്ങൾക്കും മറ്റ് ചെലവുകൾക്കുമാണെന്ന് പറഞ്ഞാണ് പണം ആവശ്യപ്പെട്ടതെന്നും യുവതി പറയുന്നു.

60 ലക്ഷം രൂപ നൽകി

ഇർഫാന്റെ ആവശ്യപ്രകാരം ഉപ്സോൺ 60 ലക്ഷം രൂപ നൽകിയതായി പരാതിയിൽ പറയുന്നു. സ്വന്തം റസ്റ്ററന്റിൽ നിന്നുള്ള വരുമാനത്തിന് പുറമെ കുടുംബാംഗങ്ങളിൽനിന്ന് കടം വാങ്ങിയുമാണ് യുവതി ഇത്രയും തുക കണ്ടെത്തിയതെന്നാണ് വിവരം.

എന്നാൽ പണം ലഭിച്ചതിന് പിന്നാലെ ഇർഫാൻ യുവതിയുമായുള്ള ബന്ധം അവസാനിപ്പിച്ചെന്നാണ് പരാതി. തുടർന്ന് ഇന്ത്യയിലേക്ക് മടങ്ങിയ ഇയാൾ ഉപ്സോണിന്റെ ഫോൺ കോളുകൾക്കും സന്ദേശങ്ങൾക്കും പ്രതികരിക്കാതായതായും യുവതി ആരോപിച്ചു.

ഇന്ത്യയിലെത്തിയപ്പോൾ മറ്റൊരു വിവരം

മാസങ്ങളോളം ഭർത്താവുമായി ബന്ധപ്പെടാൻ ശ്രമിച്ചിട്ടും മറുപടി ലഭിക്കാതായതോടെയാണ് ഉപ്സോൺ ഇന്ത്യയിലെത്താൻ തീരുമാനിച്ചത്. ഒക്ടോബർ ആറിന് കാൺപൂരിലെ ഇർഫാന്റെ വീട്ടിലെത്തിയപ്പോഴാണ് താൻ വഞ്ചിക്കപ്പെട്ടതായി മനസ്സിലായതെന്നാണ് യുവതിയുടെ മൊഴി.

ഇർഫാൻ നേരത്തെ വിവാഹിതനായിരുന്നുവെന്നും മൂന്ന് മക്കളുണ്ടെന്നും അപ്പോഴാണ് അറിഞ്ഞതെന്നും ഉപ്സോൺ പൊലീസിനോട് പറഞ്ഞു. താൻ അവിവാഹിതനാണെന്നായിരുന്നു ഇർഫാൻ പരിചയപ്പെടുത്തിയിരുന്നതെന്നും യുവതി ആരോപിച്ചു.

പണം ചോദിച്ചപ്പോൾ മർദിച്ചെന്ന് പരാതി

താൻ നൽകിയ 60 ലക്ഷം രൂപ തിരികെ ആവശ്യപ്പെട്ടപ്പോൾ ഇർഫാൻ ശാരീരികമായി ഉപദ്രവിച്ചെന്നും മതം മാറാൻ നിർബന്ധിച്ചെന്നും ഉപ്സോൺ പരാതിയിൽ ആരോപിച്ചു. തുടർന്ന് യുവതി പൊലീസിനെ സമീപിക്കുകയായിരുന്നു.

പരാതിയുടെ അടിസ്ഥാനത്തിൽ പൊലീസ് കേസെടുത്ത് ഇർഫാനെ അറസ്റ്റ് ചെയ്തു. സംഭവവുമായി ബന്ധപ്പെട്ട് പരാതിയിൽ ഉന്നയിച്ചിരിക്കുന്ന ആരോപണങ്ങളിൽ പൊലീസ് അന്വേഷണം തുടരുകയാണ്. പണം കൈമാറിയതുമായി ബന്ധപ്പെട്ട രേഖകളും വിവാഹവുമായി ബന്ധപ്പെട്ട വിവരങ്ങളും ഉൾപ്പെടെയുള്ള കാര്യങ്ങളും അന്വേഷണത്തിന്റെ ഭാഗമായി പരിശോധിക്കുമെന്ന് അധികൃതർ അറിയിച്ചു.