അല്ലു അർജുൻ–ബേസിൽ ജോസഫ് കൂട്ടുകെട്ട്; അഭ്യൂഹങ്ങൾ വീണ്ടും

മുംബൈ: തെലുങ്ക് സൂപ്പർ താരം അല്ലു അർജുനും മലയാളത്തിന്റെ പ്രിയതാരം ബേസിൽ ജോസഫും പുതിയ ചിത്രത്തിനായി ഒന്നിക്കുന്നുവെന്ന അഭ്യൂഹങ്ങൾ വീണ്ടും ശക്തമാകുന്നു. സംവിധായകനും രചയിതാവുമായ അരുൺ അനിരുദ്ധൻ പങ്കുവച്ച ഇൻസ്റ്റഗ്രാം സ്റ്റോറിയാണ് പുതിയ ചർച്ചകൾക്ക് വഴിവച്ചത്.

അരുൺ അനിരുദ്ധന്റെ ഇൻസ്റ്റഗ്രാം സ്റ്റോറി

ബേസിൽ ജോസഫിനും പോൾസൺ സ്കറിയയ്ക്കുമൊപ്പം നിൽക്കുന്ന ചിത്രമാണ് അരുൺ അനിരുദ്ധൻ സോഷ്യൽ മീഡിയയിൽ പങ്കുവച്ചത്. അല്ലു അർജുന്റെ പ്രിയപ്പെട്ട കാറുകളിലൊന്നെന്ന് അറിയപ്പെടുന്ന ‘666’ ഫാൻസി നമ്പറുള്ള കറുത്ത റേഞ്ച് റോവറിന്റെ ചിത്രവും ഇതിൽ ഉൾപ്പെട്ടിരുന്നു.

പുഷ്പയിലെ ഗാനവും പശ്ചാത്തലമാക്കിയുള്ള സ്റ്റോറി പുറത്തുവന്നതോടെ അല്ലു അർജുൻ–ബേസിൽ ജോസഫ് കൂട്ടുകെട്ടിനെക്കുറിച്ചുള്ള ചർച്ചകൾ സോഷ്യൽ മീഡിയയിൽ സജീവമായി.

മുംബൈയിൽ അല്ലു അർജുനുമായി കൂടിക്കാഴ്ചയെന്ന് റിപ്പോർട്ട്

ചിത്രത്തിന്റെ ചർച്ചകൾക്കായി ബേസിലും സംഘവും മുംബൈയിൽ അല്ലു അർജുനുമായി കൂടിക്കാഴ്ച നടത്തിയെന്നാണ് ഏറ്റവും പുതിയ റിപ്പോർട്ടുകൾ. എന്നാൽ, ഇക്കാര്യത്തിൽ ഇതുവരെ ഔദ്യോഗിക സ്ഥിരീകരണം പുറത്തുവന്നിട്ടില്ല.

അല്ലു അർജുനുമായുള്ള ഒരു പ്രോജക്റ്റിനെക്കുറിച്ച് മുൻപ് ഒരു അഭിമുഖത്തിൽ ബേസിൽ ജോസഫ് സംസാരിച്ചിരുന്നെങ്കിലും ചിത്രത്തെ സംബന്ധിച്ച ഔദ്യോഗിക വിവരങ്ങൾ പുറത്തുവന്നിരുന്നില്ല.

‘മിന്നൽ മുരളി’ക്ക് ശേഷം ബിഗ് ബജറ്റ് പ്രോജക്റ്റ്?

‘മിന്നൽ മുരളി’ക്ക് ശേഷം ബേസിൽ ജോസഫ് സംവിധാനം ചെയ്യുന്ന ബിഗ് ബജറ്റ് ചിത്രമായിരിക്കും ഇതെന്നാണ് റിപ്പോർട്ടുകൾ. എന്നാൽ, നായകൻ, കഥ, നിർമാണം തുടങ്ങിയ കാര്യങ്ങളിൽ ഔദ്യോഗിക പ്രഖ്യാപനം വരാനിരിക്കുന്നതേയുള്ളൂ.

അതേസമയം, പ്രോജക്റ്റിനെക്കുറിച്ചുള്ള കൂടുതൽ വിവരങ്ങൾക്കായി സിനിമാപ്രേമികൾ കാത്തിരിക്കുകയാണ്.

അറ്റ്‌ലി ചിത്രത്തിന്റെ തിരക്കിൽ അല്ലു അർജുൻ

നിലവിൽ ഇന്ത്യൻ സിനിമയിലെ തിരക്കേറിയ താരങ്ങളിൽ ഒരാളാണ് അല്ലു അർജുൻ. നിരവധി വമ്പൻ പ്രോജക്റ്റുകളാണ് താരത്തിന്റേതായി അണിയറയിൽ ഒരുങ്ങുന്നത്.

തമിഴ് സംവിധായകൻ അറ്റ്‌ലിയൊപ്പമുള്ള ചിത്രത്തിന്റെ ഷൂട്ടിംഗ് തിരക്കുകളിലാണ് താരം. ഇരുവരും ആദ്യമായി ഒന്നിക്കുന്ന ചിത്രമാണിത്. ദീപിക പദുക്കോൺ, മൃണാൾ താക്കൂർ എന്നിവരും പ്രധാന വേഷങ്ങളിൽ എത്തുന്ന ചിത്രത്തിനായുള്ള കാത്തിരിപ്പിലാണ് ആരാധകർ.

English Summary:
Speculation about a possible collaboration between Telugu superstar Allu Arjun and Malayalam actor-director Basil Joseph has resurfaced. Director-writer Arun Anirudhan’s Instagram story featuring Basil Joseph and Paulson Skaria, along with an image of Allu Arjun’s Range Rover and a Pushpa song, has fueled the discussion. Reports also suggest that Basil and his team met Allu Arjun in Mumbai for project discussions. However, there is no official confirmation yet